ފުޑް ކޯޓުގެ ބައެއް ޔުނިޓްތައް ބީލަމަށް

އެސްޓީއޯއިން މާލޭގެ ހުޅަނގު ދެކުނު (އާހަބަރު) ސަރަހައްދުގައި ތަރައްގީ ކޮށްފައިވާ ފުޑް ކޯޓުގެ ޔުނިޓްތަކުގެ ތެރެއިން ބައެއް ޔުނިޓްތައް އަލުން ބީލަމަށް ހުޅުވާލައިފިއެވެ.

އެސްޓީއޯއިން އާހާބަރު ސަރަހައްދުގައި ތަރައްގީކޮށްފައިވާ "ރާވެރިބޭ ކޮއްތުވެނި" ޔުނިޓްތަކުގެ ތެރެއިން 13 ޔުނިޓެއް ބީލަމަށް ހުޅުވާލާފައިވާއިރު، ޕްރޮޕޯސަލް ހުށަހެޅުމުގެ އެންމެފަހު ދުވަހަކީ މި ޖެނުއަރީ މަހުގެ 14 ވަނަ ދުވަހުގެ 14:00ގެ ނިޔަލަށެވެ.

އެސްޓިއޯއިން ކޮށްފައިވާ އިއުލާނެއްގައި ބުނެފައިވަނީ، މި ބީލަމުގައި ބައިވެރިވުމަށް ޝައުގުވެރިވާ ފަރާތްތަކުން ފުޓް ކޯޓުގެ ޔުނިޓްތަކާއި އެތަންތަނުގެ ހާލަތު ބެލުމުގެ ފުރުސަތު މިމަހުގެ ހަތްވަނަ ދުވަހާއި މިމަހުގެ 10 ވަނަ ދުވަހުގެ 14:00ން 15:00ށް ލިބޭނެ ކަމަށެވެ.

އެސްޓީއޯއިން ބުނެފައިވާ ގޮތުގައި، ޕްރޮޕޯސަލް ހުށަހަޅަން ޝައުވެރިވާ ފަރާތްތަކުން އެސްޓީއޯގެ ވެބްސައިޓް މެދުވެރިކޮށް ފޯމް ޑައުންލޯޑް ކުރެވޭނެ އެވެ. އަދި ފުޓް ކޯޓުގެ ޔުނިޓްތަކަށް ޕްރޮޕޯސަލް ހުށަހެޅުމުގެ ސުންގަޑިއަކީ މިމަހުގެ 14 ވަނަ ދުވަހުގެ 14:00 ކަމަށާއި އެސްޓީއޯގެ އެޑް އޮފީހުގެ ރިޝެޕްޝަނުން ޕްރޮޕޯސަލްތައް ބަލައިގަންނަމުންދާނެ ކަމަށެވެ. އަދި ޕްރޮޕޯސަލްތައް ހުޅުވުމަށް ހަމަޖެހިފައިވަނީ މި މަހުގެ 14 ވަނަ ދުވަހުގެ 14:00ގައި، ޕްރޮޕޮސަލް ހުށަހެޅި ފަރާތްތަކުގެ ހާޒިރުގައި ކަމަށް އެސްޓީއޯއިން ބުނެއެވެ.

އެސްޓީއޯއިން "ރާވެރިބޭ ކޮއްތުވެނި" ޔުނިޓްތަކުގެ ތެރެއިން 13 ޔުނިޓެއް ޕްރޮޕޯސަލް ހުށަހެޅުމަށް ހުޅުވާލާފައިވާއިރު، އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ކުރެއްވި ޓްވީޓެއްގައި ވިދާޅުވެފައިވަނީ، އެތަންތަނުގެ ކުލި ކުޑަކުރެވިފައިވާ ކަމަށާއި އަދި ކުރިން ނެގި 3 މަހުގެ ސެކިއުރިޓީ ޑިޕޮސިޓް މިހާރު ދެ މަހަށް ކުޑަކުރެވިފައިވާ ކަމަށެވެ.

މީގެއިތުރުން އަމްރު ވިދާޅުވީ، ކުރިން ނެގި، 100،000ރގެ ބިޑް ސެކިއުރިޓީ މިހާރު ނުނަގާނެކަމަށާއި އަދި ކުރިން ނެގި އެޑްވާންސް ކުލި ވެސް މިހާރު ނުނަގާނެ ކަމަށެވެ. އަދި ކުރިން ބިޑްކުރި އިރު ހުށަހަޅަންޖެހޭ ބިޒްނަސް ޕްރޮޕޯސަލް މިހާރު ބޭނުމެއް ނުވާނެ ކަމަށްވެސް އަމްރު ވިދާޅުވި އެވެ.

ކޮވިޑް-19ގެ ސަބަބުން، ވިޔަފާރި ދައްވެ، ގެއްލުންވަމުންދާތީ، ފުޑް ކޯޓުގެ ގިނަ ޔުނިޓްތައް ހުރީ ހުސްކޮށެވެ.