ކާށިދޫގެ ބިމުން ބައެއް ފަތުރުވެރިކަމަށް ދޫކުރަނީ
ކާށިދޫ ބިމުން ދޫކުރަނީ 200،000 އަކަފޫޓު
އަހުމަދު މުހުސިނު | 10 އެޕްރީލު 2018 | އަންގާރަ 12:26
ކ ކާށިދޫ: ބިންބޮޑު ރަށެއް
މާލެއަތޮޅު ކާށިދޫގެ ބިމުގެ ބައެއް ފަތުރުވެރިކަމަށް ދޫކުރުމަށް ޓޫރިޒަމް މިނިސްޓްރީން ނިންމައި ފަތުރުވެރިކަމާ ބެހޭ ކަން ކަމަށް ދޫކުރާ ތަންތަނުގެ ލިސްޓަށް ކާށިދޫ ބިން އިތުރުކޮށްފިއެވެ.
ޓޫރިޒަމް މިނިސްޓްރީން އަންގާރަ ދުވަހު ކުރި އިއުލާނެއްގައި ބުނެފައި ވަނީ ފަތުރުވެރިކަމާ ބެހޭ ކަން ކަމަށް ދޫކުރާނެ ރަށްރަށާއި ފަޅުތަކުގެ އަދަދާއި، އެ ތަންތަނާ ބެހޭ މައުލޫމާތު ހިމެނޭ ލިސްޓަށް "ކާށިދޫ ބިން (ދެކުނު)" އިތުރުކޮށްފައިވާ ކަމަށެވެ.
ކާށިދޫ ބިމުން 200،000 އަކަފޫޓު ފަތުރުވެރިކަމަށް ދޫކުރަން ނިންމާފައިވާއިރު އަންދާޒާ ކުރެވޭ އެކުއިޒިޝަން ކޮސްޓަކީ 15 މިލިއަން ރުފިޔާ ކަމަށް ޓޫރިޒަމް މިނިސްޓްރީގެ އިއުލާނުގައި ބުނެފައިވެއެވެ.
މީގެ ކުރިން ވެސް ފަތުރުވެރިކަމާ ބެހޭ ކަންކަމަށް ރަށްތައް ދޫކޮށްފައިވެއެވެ.
