ނިޔާމަ ރިސޯޓުން 7 މީހަކު ކޮވިޑަށް ޕޮޒިޓިވްވެ ރަށް މޮނިޓަރިންގ އަށް
31 ޑިސެމްބަރު 2020 | ބުރާސްފަތި 01:54ޕޮޒިޓިވްވި މީހުންގެ ތެރޭގައި ހިމެނެނީ 2 ފަތުރުވެރިޔަކާއި 5 ސްޓާފުން
ނިޔާމަ އައިލެންޑް
ނިޔާމަ ރިސޯޓުން 7 މީހަކު ކޮވިޑް-19 އަށް ޕޮޒިޓިވްވެ އެރަށް މޮނިޓަރިންގ އަށް ލައިފިއެވެ.
ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ސެންޓަރުގެ ތަރުޖަމާން ޑރ ނަޒްލާ ރަފީގު ވިދާޅުވީ އެ ރިސޯޓުން ޕޮޒިޓިވްވި މީހުންގެ ތެރޭގައި ހިމެނެނީ 2 ފަތުރުވެރިޔަކާއި 5 ސްޓާފުންކަމަށެވެ. މީގެތެރެއިން 2 ފަތުރުވެރިންނާއި 3 ސްޓާފަކު ޓެސްޓް ކުރީ ބަލީގެ އަލާމާތްތައް ފެނިގެންކަމަށް ޑރ ނަޒްލާ ވިދާޅުވިއެވެ.
އަދި އިތުރު 2 ސްޓާފުން އެއީ ކޮންޓެކްޓުންކަމަށާއި އެމީހުން ޓެސްޓްކުރިއިރު ވައިރަހަށް ޕޮޒިޓިވްވެފައިވާ ކަމަށް ޑރ ނަޒްލާ ވިދާޅުވިއެވެ.
ޑރ ނަޒްލާ ވިދާޅުވީ މިވަގުތު ދަނީ ރެންޑަމް ސާމްޕަލް އެރަށުން ނެގުމުގެ އިންތިޒާމުތައް ދ. އަތޮޅު ހޮސްޕިޓަލާއި ނިޔާމަ ރިސޯޓާއި ގުޅިގެން ކުރަމުންކަމަށެވެ. އަދި ބުރާސްފަތި ދުވަހު ރެންޑަމް ސާމްޕަލް ނަގާ ޓެސްޓް ކުރުމުގެ މަސައްކަތް ކުރިޔަށްގެންދާނެ ކަމަށް ޑރ ނަޒްލާ ވިދާޅުވިއެވެ.
އެޗްޕީއޭއިން ބުނެފައިވަނީ ފާއިތުވި 24 ގަޑިއިރު ރާއްޖެއިން ޕޮޒިޓިވްވި 47 މީހުންގެ ތެރޭގައި 15 މީހަކު ހިމެނޭކަމަށެވެ.
