ބިލިއަން ޑޮލަރުގެ ސިނާއަތަކަށް މަސްވެރިކަން ހެދެނޭ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ މެނޭޖިންގ ޑިރެކްޓަރު އިސްމާޢީލް ފައުޒީ ވިދާޅުވެއްޖެއެވެ.

މަސްވެރިންގެ ސައްލާ 2020 ގައި ބުދަ ދުވަހުގެ ރޭ ވާހަކަ ދައްކަވަމުން ވިދާޅުވީ މަސްވެރިކަމުގެ ސިނާއަތް ކުރިއެރުވުމަށްޓަކައި ސަރުކާރުން ގިނަ ޕްލޭންތައް ރާވާފައިވާ ކަމަށެވެ.

އެގޮތުން ފެލިވަރުގައި 4،000 ޓަނުގެ ސްޓޯރޭޖާއި، ފްރީޒީން ކެޕޭސިޓީ އިތުރު 200 ޓަނުން އިތުރުކުރުމާއި، އާރްއެސްޑަބްލިއުގެ އިތުރު 80 ތަނު ގާއިމުކުރުމުގެ މަސައްކަތްކުރަމުންދާކަން ފައުޒީ ފާހަގަކުރެއްވިއެވެ. މީގެ އިތުރުން ފެލިވަރުގެ ކޭނަރީ އިތުރަށް ތަރައްގީކުރުމުގެ ގޮތުން އައު ކޭނަރީއެއް ފެލިވަރުގައި ގާއިމުކުރެވޭނެ ކަމަށާއި، މި ކޭނަރީ ވެގެންދާނީ ދުވާލަކަށް 100 ޓަނުގެ މަސް ޕްރޮސެސް ކުރެވޭ ކޭނަރީއަކަށް ކަމަށްވެސް ފައުޒީ ވިދާޅުވިއެވެ.

ރާއްޖޭގައި ބާނާ މަސް، ރާއްޖޭގައި ޕްރޮސެސް ކުރެވޭނެ އަދި މަސްވެރިން ބޭނުންވާ ހަމަ އަގު ލިބޭނެ ކަމަށް ވެސް ވިދާޅުވިއެވެ.

މަސް ކިރުމަށް ގިނައިރު ކިޔޫގައި ތިބެންޖެހޭ ކަމުގެ ޝަކުވާ މަސްވެރިން ވަނީ މި ސައްލާގައި ކޮށްފައެވެ. ފައުޒީ ވިދާޅުވީ މަސްވެރިންނަށް ދިމާވާ ދަތިތަކަށް ވަގުތީ ހައްލެއް ހޯދަން ޖެހުނަސް އެ މަސައްކަތް ވެސް ކުރާނެ ކަމަށެވެ.

އެންމެ ކައިރިން މަސް ރައްކާ ކުރެވޭނެ ގޮތްތައް ހޯދާ މިހާރު ވެސް ބަލަމުންދާ ކަމަށް މިފްކޯ އިން ވަނީ ބުނެފައެވެ.

ދެކުނުގައި މަސް ކިރުމުގެ ނިޒާމް ހަމަޖެހިފައި އޮތް ނަމަވެސް އުތުރުގައި މަސް ކިރުމުގެ ދަތިތައް އެބަހުރި ކަމަށާއި އެކަންތައްތަކަށް ވެސް އަވަސް ހައްލެއް ލިބިގެންދާނެ ކަމަށް ޤަބޫލު ކުރައްވާ ކަމަށް ފައުޒީ ވިދާޅުވިއެވެ.