ސްޓެލްކޯއިން ގްރީން ލައިފް ސޯލާ ޕޮޑް ތައާރަފްކޮށްފި
ސޯލާ ޕޮޑުތަކުގެ ސްޓޭންޑާޑް ސައިޒްތަކަކީ 8 ޕެނަލްގެ ސިސްޓަމްތަކާއި 16 ޕެނަލްގެ ސިސްޓަމްތައް
ސްޓެލްކޯގެ \"ގްރީން ލައިފް ސޯލާ ޕޮޑް\" ތައާރަފްކުރުން
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އިޔާދަކުރަނިވި ހަކަތައިން ކަރަންޓު އެފުއްދުމަށް "ގްރީން ލައިފް ސޯލާ ޕޮޑް" ތައާރަފްކޮށްފިއެެވެ.
ބުދަ ދުވަހުގެރޭ އުސްފަސްގަނޑު ސަރަހައްދު ހެލި ޕެޑުގައި ކުރިއަށްދިޔަ ހާއްސަ ރަސްމިއްޔާތެއްގައި ސްޓެލްކޯގެ "ގްރީން ލައިފް ސޯލާ ޕޮޑް" ތައާރަފްކޮށްދެއްވީ އެކުންފުނީގެ ބޯޑުގެ ޗެއަރމަން މުހައްމަދު ރަޝީދު އެވެ.
މި ރަސްމިއްޔާތުގައި ވާހަކަ ދައްކަވަމުން ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީ ވިދާާޅުވީ، ސްޓެލްކޯ ގްރީން ލައިފް ސޯލާ ޕޮޑަކީ ސެޓްލެކޯގެ ގްރީން ލައިފް ޕްރޮގްރާމުގެ ދަށުން ތިމާވެއްޓާއި ރަހުމަތްތެރި ސަގާފަތެއް ގާއިމުކުރުމުގެ މަސައްކަތުގެ ތެރެއިން ދިވެހިރާއްޖޭގެ މާހައުލާއި ގުޅޭ ވަރަށްވެސް ފުރިހަމަ އީޖާދީ މަސައްކަތެއް ކަމަށެވެ.
މުޣުނީ ވިދާޅުވީ، މި ސޯލާ ޕޮޑު ފަރުމާ ކޮށްފައިވަނީ ދުނިޔޭގެ އެކި ހިސާބުތަކުގައި އަވިން ހަކަތަ އުފެއްދުމާއި ބޭނުންކުރާ ސިސްޓަމުތަކުގެ ތެރެއިން ފެންމަތީގައި ހިފެހެއްޓޭގޮތަށް ކޯރުކޯރުގައި އަދި މޫދުގައި ތައްޔާރުކުރެވިފައިވާ ސިސްޓަމްތައް ދިރާސާކުރުމަށްފަހު އެއަށްވުރެ ކޮލެޓީ އަދި އަގުހެޔޮ އުފެއްދުމެއްގެ ގޮތުގައި ކަމަށެވެ.
މުޣުނީ ވިދާޅުވީ، މި ސޯލާ ޕޮޑުތަކުގެ ސްޓޭންޑާޑް ސައިޒްތަކަކީ 8 ޕެނަލްގެ ސިސްޓަމްތަކާއި 16 ޕެނަލްގެ ސިސްޓަމްތައް ކަމުގައި ވީނަމަވެސް ޑިމާންޑް އޮންނަ ގޮތަކަށް ބަލައި މިއުފެއްދުން އެހެން ސައިޒުތަކުންވެސް ލިބިގެންދާނެ ކަމަށެވެ. އަދި އަންނަ އަހަރުން ފެށިގެން މިސޯލާ ޕޮޑު ގަންނަން ބޭނުންވާ ފަރާތްތަކަށް ގަތުމުގެ ފުރުސަތު ލިބިގެންދާނެ ކަމަށްވެސް މުޣުނީ ވިދާޅުވިއެވެ.
ސްޓެލްކޯއިން ބުނީ މި ސޯލާ ޕޮޑަކީ މަދު ވަސީލަތްތަކަކާއެކު، ރަނގަޅަށް ބެލެހެއްޓޭނަމަ، 25 އަހަރުދުވަހު ބޭނުން ކުރެވޭ ގޮތަށް ތައްޔާރުކޮށްފައިވާ ޕޮޑެއް ކަމަށެވެ. އަދި މި ސޯލާ ޕޮޑްގައި 330 ވޮޓްގެ 8 ސޯލާ ޕެނަލް ހަރުކޮށްފައިވާނެ ކަމަށްވެސް އެ ކުންފުނިން ބުނެއެވެ. މީގެ އިތުރުން އެ ޕެނަލްތަކުގެ އެފިޝެންސީ ފުރާޅެއްގައި ހަރުކުރާ ޕެނަލްތަކަށްވުރެ އެތައްތަނެއް ރަނގަޅު އިރު، އެއިން ގާތްގަނޑަކަށް މަހަކަށް 360 ޔުނިޓުގެ ހަކަތަ އުފައްދައިދޭނެ ކަމަށްވެސް ސްޓެލްކޯއިން ބުނެއެވެ.
ސްޓެލްކޯއިން ބުނީ މި ސޯލާ ޕޮޑްތައް ފަރުމާކޮށްފައިވާނީ ޕްލަގް އެންޑް ޕްލޭ ކޮންސެޕްޓަށް އެކަތި އަނެކައްޗާއި ފަސޭހައިން، ގުޅުވާލެވޭ ގޮތަށް ކަމަށެވެ. އަދި ސީދާ ރަށްރަށުގެ ކަރަންޓު ގްރިޑާއި ގުޅާލުމުގެ އިތުރުން، ގްރިޑް ނުހުންނަ ރަށްރަށުގައި، ވަކިން ބެޓްރި ސިސްޓަމަކާއި ގުޅާލެވި، އޭގެ ބޭނުން އެންމެ ފުރިހަމަގޮތުގައި ހިފޭނެ ކަމަށްވެސް ސްޓެލްކޯއިން ވަނީ ބުނެފައެވެ.
