ރިޕޯޓްކޮށްފައިވާ އަދަދަށްވުރެ ވޫހާންގެ ކޮވިޑް ކޭސްތައް 10 ގުނަ އިތުރު - އެންޓިބޮޑީ ދިރާސާ

ޗައިނާގެ ވޫހާން އިން ރިޕޯޓްކޮށްފައިވާ ކޭސްތަކަށްވުރެ އެ ސިޓީގައި ކޮވިޑް-19 ގެ ކޭސްތައް 10 ގުނަ އިތުރުކަމަށް އެންޓިބޮޑީ ދިރާސާއިން ދައްކައިފިއެވެ.

ދާދިފަހުން ޗައިނީސް ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން އިން ކުރިއަށް ގެންދިޔަ މި އެންޓިބޮޑީ ދިރާސާއިން ދައްކާގޮތުން ބައި މިލިއަނަށް ވުރެ ގިނަ މީހުންނަށް ވަނީ ވޫހާންގައި ކޮވިޑް-19 ޖެހިފައެވެ.

އޭޕްރިލް މަހުގެ މެދުތެރޭގައި ނެގި ލޭގެ ސާމްޕަލް ތަަކަކުން މިދިރާސާ އެސެންޓަރުން ކުރިއަށް ގެންގޮސްފައިވާިއރު، ދިރާސާގެ ނަތީޖާ ދައްކާގޮތުން 11 މިލިއަން އާބާދީގެ 4.43 އިންސައްތަ މީހުންގެ ގައިގައި އެންޓިބޮޑީސް ހުރިކަމަށް ވަނީ ދައްކާފައެވެ. އެހެން ކަމުން ވޫހާންގެ 500،000 އެއްހާ މީހުންނަށް ކޮވިޑް-19 ޖެހިފައިވާކަމަށް ކަމާބެހޭ މީހުން ލަފާކުރާއިރު، މި މުއްދަތުގައި ވޫހާން އިން ޕޮޒިޓިވްވެފައިވާ ކަަމަށް ރިޕޯޓްކޮށްފައި ވަނީ 50،000 މީހުންނެވެ.

ދިރާސާ ކުރިއަށް ގެންދިޔަ ފަރާތްތަކުން ވަނީ މުޅި ޗައިނާއިން 34،000 މީހުންގެ ލޭގެ ސާމްޕަލް ޓެސްޓު ކޮށްފައެވެ. މީގެ ތެރޭގައި ވޫހާންގެ 11،000 މީހުން ހިމެނެއެވެ.

މީގެ އިތުރުން ނޭޗަރ މެޑިސިން އިން ޖޫން މަހު ކުރިއަށް ގެންދިޔަ ދިރާސާއެއްގައި ވޫހާންގައި ބައްޔަށް ހުށައެޅިފައިވާ މީހުންގެ އިންސައްތައް ދައްކަމަަށް ވަނީ ދައްކާފައެވެ. އެގޮތުން 17،000 މީހުންގެ ސާމްޕަލް ބޭނުން ކޮށްގެން ކުރިއަށް ގެންދިޔަ މި ދިރާސާގެ ނަތީޖާ ދައްކާގޮތުން އެންޓިބޮޑީސް ހުރިކަމަށް ދައްކާފައި ވަނީ 3.2 އިންސައްތަ އާއި 3.8 އިންސައްތައާއި ދެމެދުގެ މީހުންގެ ގައިގައެވެ.

ކޮވިޑް-19 ގެ ކޭސްތައް އެންމެ ފުރަތަމަ ފެންނަނަން ފަށާފައި ވަނީ ޗައިނާގެ ވޫހާން އިންނެވެ. އެގޮތުން މިއަދާ ހަމައަށް ޗައިނާއިން 87،000 އަށް ވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާ އިރު، އެގައުމުން ބަލީގައި މަރުވި މީހުންގެ އަދަދު ވަނީ 4،600 އަށް ވުރެ މައްޗަށް އަރާފައެވެ.