އައު ސްޓްރެއިންއާއިއެކު އިނގިރޭސިވިލާތަށް ކޮވިޑްގެ ތިންވަނަ ރާޅެއް!

އިނގިރޭސިވިލާތުން ފެނުނު އައު ސްޓްރެއިންނާއިއެކު، އެގައުމަށް ކޮވިޑްގެ ތިންވަނަ ރާޅު ބިންދާލާފައިވާކަމަށް އިނގިރޭސިވިލާތުގެ ސިއްހަތާއި ބެހޭ ވުޒާރާއިން ބުނެފިއެވެ.

ޑިސެމްބަރު މަހުގެ ފަހު ދެ ހަފްތާގައި އިނގިރޭސިވިލާތުން ކޮވިޑަށް ޕޮޒިޓިވްވި މީހުންގެ އަދަދު ދެ ގުނައަށް އިތުރުވެފައިވާއިރު، މިދިޔަ ހޯމަ ދުވަހު އެކަނިވެސް އެގައުމުން 41،385 މީހުން ވަނީ ބައްޔަށް ޕޮޒިޓިވްވެފައެވެ. މިއީ މި ބަލި އިނގިރޭސިވިލާތުން ފެނުނު ފަހުން 40،000 އަށްވުރެ ގިނަ މީހުން 24 ގަޑިއިރު ތެރޭގައި ބައްޔަށް ޕޮޒިޓިވްވި ފުރަތަމަ ފަހަރެވެ.

މީގެ ކުރިން އިނގިރޭސިވިލާތަށް ކޮވިޑްގެ ދެ ރާޅު ބިންދާލާފައިވާއިރު އެގައުމަށް ކޮވިޑްގެ ފުރަތަމަ ރާޅު ބިންދާލާފައިވަނީ އޭޕްރީލް މަހުން ފެށިގެން މޭ މަހަށެވެ. އަދި ދެވަނަ ރާޅު އޮކްޓޯބަރުން ފެށިގެން ނޮވެމްބަރާއި ހަމައަށް ފެނިފައިވެއެވެ.

ކޮވިޑްގެ ދެވަނަ ރާޅާއިއެކު އެގައުމުން ދުވާލެއްގެ މައްޗަށް 20،000 މީހުން ބައްޔަށް ޕޮޒިޓިވްވެފައިވާއިރު، މި އަދަދު ތިންވަނަ ރާޅާއިއެކު އިތުރުވާނެ ކަމަށް ސިއްހަތާއި ބެހޭ ވުޒާރާއިން ވަނީ ބުނެފައެވެ.

ކޮވިޑްގެ އައު ސްޓްރެއިން އިނގިރޭސިވިލާތުން ފެނިގެން ރިޕޯޓް ކޮށްފައިވަނީ ޑިސެމްބަރު މަހުގެ 11 ވަނަ ދުވަހުއެވެ. އަދި އައު ސްޓްރެއިންގެ ސަބަބުން ވައިރަސް ގައިން ގަޔަށް އަރާ މިންވަރު 70 އިންސައްތަ އަވަސްކަމަށް ރިޕޯޓްތަކުން ވަނީ ދައްކާފައެވެ.

އިނގިރޭސިވިލާތުގެ ސިއްހަތާއި ބެހޭ ވަޒީރު މެޓް ހެންކޮކް ވިދާޅުވީ އައު ސްޓްރެއިންނާއިއެކު ވައިރަސް ފެތުރެން ފަށާފައިވާ މިންވަރު ވަނީ ނު ހުއްޓުވޭ ވަރަށް އިތުރުވެފައި ކަމަށެވެ. އަދި މިއީ ކޮވިޑްގެ ތިންވަނަ ރާޅު ކަމަށް އެމަނިކުފާނު ވަނީ ވިދާޅުވެފައެވެ.

އައު ސްޓްރެއިންނާއިއެކު އިނގިރޭސިވިލާތުން އަންނަނީ ވައިރަސް ކޮންޓްރޯލް ކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިހާރު އަޅާފައިވާ ރައްކާތެރިކަމުގެ ފިޔަވަޅުތައް އިތުރަށް ހަރުދަނާ ކުރުމަށް އަންނަނީ މަސައްކަތް ކުރަމުންނެވެ.

އިނގިރޭސިވިލާތަކީ މުޅި ދުނިޔެއިން 6 ވަނައަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ. އެގޮތުން އެގައުމުން މިހާތަނަށް 2،382،865 (ދެ މިލިއަން ތިންލައްކަ އަށްޑިހަ ދެހާސް އަށްސަތޭކަ ފަސްދޮޅަސް ފަހެއް) މީހުން ވަނީ ކޮވިޑަށް ޕޮޒިޓިވްވެފައެވެ. އަދި މިބަލީގައި 71،567 މީހަކު ވަނީ މަރުވެފައެވެ.