ރައީސް ޓްރަމްޕް އެމެރިކާ ތިންވަނަ ބޮޑު ހަނގުރާމައަކަށް ވައްޓާލަފާނެ:ބޮބް ކޯކަރ

އެމެރިކާގެ ރައީސް ޑޮނަލްޑް ޓްރަމްޕް އެ ގައުމު " ތިންވަނަ ބޮޑު ހަނގުރާމައެއްގެ މަގަށް ގެންދަވާފާނެ"ކަމަށް ރިޕަބްލިކަން ޕާޓީއަށް ނިސްބަތްވެ ވަޑައިގަންނަވާ ސެނޭޓްގެ ޚާރިޖީ ގުޅުންތަކާ ބެހޭ ކޮމިޓީގެ ޗެއަރމަން އިންޒާރު ދެއްވައިފިއެވެ.

ސެނޭޓަރ ބޮބް ކޯކަރ ވިދާޅުވީ ރައީސްކަމުގެ މަގާމާމެދު ޓްރަމްޕް އަމަލު ކުރައްވަމުން ގެންދަވަނީ "ރިއަލިޓީ ޝޯއެއް ފަދައިން" ކަމަށެވެ.

ޓެނެސީ ތަމްސީލް ކުރައްވާ ގޮނޑިން ރިޓަޔަރ ކުރައްވަން ތައްޔާރުވެ ވަޑައިގަންނަވަމުން ގެންދަވާ މެމްބަރު ވިދާޅުވީ ވައިޓް ހައުސްގެ ސްޓާފުން ވެސް ޓްރަމްޕް ހުންނެވުމުން އުނދަގޫތައް ތަހައްމަލް ކުރަމުން ދާކަމަށެވެ.

ކޯކަރގެ މި ބަސްފުޅުތަކަކީ ރައީސް ކަމުގެ މަގާމު ފުރުއްވަމުން ގެންދަވާ ބޭފުޅަކަށް އަމިއްލަ ފުޅު ޕާޓީގެ މެމްބަރެއްގެ ފަރާތުން ދެވިގެންދިޔަ ފާހަގަ ކޮށްލެވޭ ހަމަލާތަކެކެވެ.

ސެކްރެޓަރީ އޮފް ސްޓޭޓްގެ މަގާމަށް ކޯކަރ ގެނައުމަށް ރައީސް ޓްރަމްޕް މިދިޔަ އަހަރު ނިންމެވި ނަމަވެސް އެ ޚިޔާލުފުޅު ފަހުންވަނީ ބަދަލު ކުރައްވާފައެވެ.

އާދީއްތަ ދުވަހު ނިއުޔޯކް ޓައިމްސްއަށް ފޯނުން ދެއްވި އިންޓަވިއުއެއްގައި ކޯކަރވަނީ ރައީސް ޓްރަމްޕްގެ އަޚްލާގު ހުންނަ ގޮތާމެދު ކަންބޮޑުވެ ވަޑައިގަންނަވާކަމަށް ވެސް ވިދާޅުވެފައެވެ.

"އަޅުގަނޑަކަށް ހިޔެއް ނުވޭ އެމަނިކުފާނު ގަބޫލު ފުޅު ކުރައްވާ ހެނެއް އެމެރިކާގެ ރައީސް ގެ ތަގުރީރުން އަދި އެ މަނިކުފާނު ވިދާޅުވާ އެއްޗަކުން މުޅި ދުނިޔެއަށް އޭގެ އަސަރު ކުރާކަމެއް، ވަކިން ޚާއްސަކޮށް އެ ތަގްރީރު ކުރައްވާ ސަރަހައްދަކުން" އެ މަނިކުފާނު ވިދާޅުވިއެވެ.