ޖަޕާނުން ރާއްޖެއަށް ދޫކޮށްފައިވާ ލޯނުތައް ދެއްކުން ޖީ-20 ޑެޓް ސަރވިސް ސަސްޕެންޝަން އިނީޝިއޭޓިވްގެ ދަށުން ފަސްކޮށްދޭން ނިންމައިފިއެވެ.
ޖީ-20 ޑެޓް ސަރވިސް ސަސްޕެންޝަން އިނީޝިއޭޓިވްގެ އެކްސްޗޭންޖް އޮފް ނޯޓްސްގައި ދެގައުމުން ވަނީ ސޮއިކޮށްފައެވެ.
އެގޮތުން ހޯމަ ދުވަހު ދިވެހި ސަރުކާރުގެ ފަރާތުން މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ސޮއިކުރައްވާފައިވާއިރު، ޖަޕާން ސަރުކާރުގެ ފަރާތުން ސޮއިކުރައްވާފައި ވަނީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ކެއިކޯ ޔަނާއީއެވެ.
ޖަޕާނާއި އެކު ސޮއިކުރެވިގެން މިދިޔަ އެކްސްޗޭންޖް އޮފް ނޯޓްސްް، ބަލިމަޑުކަމުގެ ސަބަބުުން ރާއްޖޭގެ އިގްތިސާދަށް ދިމާވެފައިވާ ގޮންޖެހުންތަކުން އަރައިގަތުމަށް އެހީތެރިވާނެ ކަމަށް ފޮރިންގ މިނިސްޓްރީން ފާހަގަކުރެއެވެ. އަދި ދަރަނިތައް އަދާކުރުން ފަސްކޮށްދިނުމާއެކު ރާއްޖޭގެ ދަރަނި މެނޭޖް ކުރުމަށް އިތުރު އެހީތެރިކަމެއް ލިބިގެންދާނެ ކަމަށް މިނިސްޓްރީން ފާހަގަކުރެއެވެ.
ދަރަނި އަދާކުރުން ފަސްކުރުމާ ގުޅޭގޮތުން މި އަހަރުގެ ސެޕްޓެމްބަރު މަހު ފިނޭންސް މިނިސްޓަރ އިބްރާހިމް އަމީރު މެމޮރެންޑަމް އޮފް އަންޑަސްޓޭންޑިންގައި ސޮއިކުރައްވާފައިވާ ގައުމުތަކުގެ ތެރޭގައި ޖަޕާން ހިމެނެއެވެ.
އެހެން ކަމުން ހޯމަ ދުވަހު ސޮއިކުރެވިގެންދިޔަ އެކްސްޗޭންޖް އޮފް ނޯޓްސް އަދި ސެޕްޓެމްބަރ މަހު ސޮއިކުރެވުނު އެމްއޯޔޫއަށް ފަހު، އަންނަ އަހަރުގެ ކުރީކޮޅު ފިނޭންސް މިނިސްޓްރީ އާއި ޖަޕާން އިންޓަނޭޝަނަލް ކޯޕަރޭޝަން އެޖެންސީ (ޖައިކާ) އާ ދެމެދު ސޮއިކުރެވޭ އެއްބަސްވުމާއެކު ރާއްޖެއާއި ޖަޕާނާ ދެމެދު ދަރަނި ދެއްކުން ފަސްކުރުމާ ގުޅޭ އެއްބަސްވުން ގާއިމްކުރެވޭނެ ކަމަށް ފޮރިން މިނިސްޓްރީން ބުނެއެވެ. މިއާއި އެކު ޖަޕާނުން ރާއްޖެއަށް ދޫކޮށްފައިވާ ލޯނުތައް އަނބުރާ ދެއްކުން ފަސްކުރެވިގެންދާނެއެވެ.
