ރާއްޖޭގައި މަސްވެރިކަންކުރާ އާބާދީގެ ބޮޑު ބަޔަކީ ކަންނެލި މަސްވެރިކަންކުރާ މީހުން ކަމަށާއި އެ މަސްވެރިންގެ ކަންބޮޑުވުމުގެ އަޑު ސަރުކާރަށް އިވެމުން ނުދާކަން ޔަގީންވާ ކަމަށް ބޮޑު ކަންނެލި މަސްވެރިންގެ ޔޫނިއަން (ބީކޭއެމްޔޫ) އިން ބުނެފިއެވެ.
ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހާއި ފިޝަރީޒް މިނިސްޓަރ ޒަހާ ވަހީދު ޓެގް ކުރައްވާ ބީކޭއެމްޔޫއިން ކޮށްފައިވާ ޕޯސްޓެއްގައި ވަނީ ބޮޑު ކަންނެލި މަސްވެރިކަންކުރާ މަސްވެރިންނަކީ މި ގައުމުގައި މަސްވެރިކަން ކުރާ ބައެއް ނޭނގެނީތޯ ބުނެ ސުވާލު އުފައްދާފައެވެ.
މީގެ އިތުރުން އެ ޖަމިއްޔާގެ ޕޯސްޓުގައި ބުނެފައިވަނީ ރާއްޖޭގެ އާބާދީގެ ބޮޑު ބައެއް ކަންނެލި މަސްވެރިކަމުގައި ހިއްސާވާ ކަމަށާއި ބޮޑު ކަންނެލި މަސްވެރިންގެ ނަންވެސް ނުގަނެވޭ ހިނދު، މަސްވެރިކަމުގެ ބަޖެޓުގައި ކަންނެލި މަސްވެރިންނަށް އޮތީ ސުމެއް ކަމަށެވެ.
ކަންނެލި މަސްވެރިންގެ ޔޫނިއަނުން އިތުރަށް ބުނެފައި ވަނީ ބޮޑު ކަންނެލި މަސްވެރިންނަށް ސަރުކާރުން ވަނީ ބޮޑުތަނުން އިހުމާލުވެފައި ކަމަށާއި ކަންނެލި މަސްވެރިންގެ އަޑު ސަރުކާރަށް ނުއިވޭކަން ސާފު ވެއްޖެ ކަމަށެވެ. ނަމަވެސް އެފަރާތްތަކުގެ އަޑު ސަރުކާރަށް އަދި އިއްވާނެ ކަމަށްވެސް ކަންނެލި މަސްވެރިންގެ ޔޫނިއަންގެ ޕޯސްޓުގައި ބުނެފައިވެއެވެ.
ދާދި ފަހަކުން ރަޖިސްޓްރީ ކުރެވުނު ބީކޭއެމްޔޫ ޖަމިއްޔާ އުފައްދާ ޖަލްސާ ބާއްވާފައި ވަނީ ކަނޑުމަތީ އިހުތިޖާޖެއްގެ ގޮތުގައެވެ. ކަނޑުމަތީގައި ކަންނެލި މަސްވެރިކަން ކުރާ އުޅަނދުފަހަރުތަކެއް ޖަމާވެ ބޭއްވި އެ ޖަލްސާގައި މި ޖަމިއްޔާ ހިންގާ ކޮމިޓީ ވެސް އެކުލަވާލާފައިވެއެވެ.
ރާއްޖޭގައި މަސައްކަތްކުރާ މަސްވެރިންނަށް މަހުގެ ހަމަ އަގު ނުލިބުމާއި، މަސް ފިނިކުރަން ބޭނުންވާ އައިސް ނުލިބުމުގެ ޝަކުވާއަކީ އެތައް ދުވަހެއް ވަންދެން މަސްވެރިން ދައްކަމުން އަންނަ ވާހަކަތަކެކެވެ. އަދި މި ކަންކަން ހައްލުކުރެވޭނެ ދުވަހެއް ހޯދުމަށް މަސްވެރިން އަންނަނީ ކެނޑިނޭޅި އެއިރެއްގައި އޮންނަ ސަރުކާރަކަށް ވެސް އެކަމުގެ ސުވާލުތައް އަމާޒުކުރަމުންނެވެ.
އެއާއެކު މަސްވެރިންނަށް ދިމާވެފައިވާ ތަފާތު އެކި މައްސަލަތަކަށް ހައްލު ހޯދައިދީ މަސްވެރިންގެ ކަންބޮޑުވުންތައް އަޑު އަހާނެ ކަމަށް ރައީސް އިބްރާހީމް މުހައްމަދު ޞާލިހު ވަނީ ވިދާޅުވެފައެވެ.
