ކުޅުދުއްފުށީގައި ޢިމާރާތްކޮށްފައިވާ ރޯހައުސްތަކުގެ ތެރެއިން 18 ރޯހައުސް ހަވާލުކޮށްފި
40 ރޯހައުސް ޙަވާލުކުރުމުގެ މަސައްކަތް ފަށާފައި ވަނީ ޑިސެމްބަރ 27 ގައި
ކުޅުދުއްފުށީގައި އިމާރާތްކޮށްފައިވާ 40 ރޯހައުސް ޙަވާލުކުރުމުގެ މަސައްކަތުގެ ތެރެއިން
ހދ. ކުޅުދުއްފުށީގައި އިމާރާތްކޮށްފައިވާ 40 ރޯހައުސް ޙަވާލުކުރުމުގެ މަސައްކަތް ފަށައިފިއެވެ.
ޑިސެމްބަރ 27 ގައި ކުޅުދުއްފުށީ ކައުންސިލުން މި މަސައްކަތް ފަށާފައިވާއިރު، މިހާތަނަށް 18 ފަރާތަކަށް ރޯހައުސް ހަވާލުކޮށްފައިވާ ކަމަށް ޕްލޭނިން މިނިސްޓްރީން ބުނެއެވެ.
ރޯހައުސްތައް ރައްޔިތުންނާއި ހަވާލުކުރުމުގެ މަސައްކަތް ކުރަމުން މިދަނީ އަލުން މަރާމާތުކުރުމަށް ފަހުއެވެ.
އެގޮތުން "މާފަލު ހިޔާ" ގައި އިމާރާތްކޮށްފައިވާ 40 ރޯހައުސްގައި ހުރި މަރާމާތުގެ މަސައްކަތްތައް ކުރުމުގެ އެއްބަސްވުމުގައި ހައުސިން މިނިސްޓްރީން ފެނަކަ ކޯޕަރޭޝަން ލިމިޓެޑާއި އެކު ސޮއިކޮށްފައިވަނީ މިދިޔަ ނޮވެމްބަރު މަހުގެ 18 ގައެވެ. މިއީ 2012 ވަނަ އަހަރު ރައީސް ނަޝީދުގެ ސަރުކާރުގައި އިމާރާތްކޮށްފައިވާ ރޯހައުސްތަކެކެވެ.
ރޯހައުސްތަކުގެ ތަޅުދަނޑި 2018 ވަނަ އަހަރު ނިމިގެން ދިޔަ ރިޔާސީ އިންތިހާބާ ދިމާކޮށް ވެރިފަރާތްތަކާއި ހަވާލުކުރި ނަމަވެސް އެތަން ވަރަށް ބޮޑަށް މަރާމާތަށް ބޭނުންވެފައި ހުރުމުން މީހުންނަށް ވަދެވޭގޮތެއް ނުވިއެވެ.
އެހެން ކަމުން އެ ރޯހައުސްތައް މަރާމާތުކުރުމަށް ފެނަކަ ކޯޕަރޭޝަނާއި ހަވާލު ކޮށްފައިވަނީ 190 ދުވަހުގެ ތެރޭގައި ނިންނާގޮތަށް 23،396161.00 (ތޭވިސް މިލިއަން ތިން ލައްކަ ނުވަދިހަ ހަ ހާސް އެއްސަތޭކަ އެއް ރުފިޔާ) އަށެވެ.
ރައީސް ނަޝީދުގެ ސަރުކާރުގައި ކުޅުދުއްފުށީގެ ތިން ސަރަހައްދެއްގައި ރޯހައުސްތައް އެޅުމަށް ހަވާލުކުރި ނަމަވެސް މީހުން ދިރިއުޅެމުންދަނީ ހަމައެކަނި "ކަނބޯރަނި ހިޔާ" ގައި އަޅާފައިވާ 20 ގޭގައެވެ.
