ސަމަރ އައިލެންޑް ރިސޯޓުން ފުރައިގެން ދަތުރުކުރި އުޅަނދެއް ރީތިރަށް ރިސޯޓް ކައިރީ އޮތް އުޅަނދަކާ ޖެހިގެން ހިނގި އެކްސިޑެންޓްގައި 11 މީހަކަށް އޭޑީކޭގައި ފަރުވާ ދެމުންގެންދާ ކަމަށާއި އޭގެ ތެރެއިން ދެ މީހެއްގެ ހާލު ސީރިއަސް ކަމަށް އޭޑީކޭ ހޮސްޕިޓަލުން ބުނެފި އެވެ.

އެ ހޮސްޕިޓަލްގެ މެނޭޖިން ޑިރެކްޓަރ އަހްމަދު އަފްއާލް ވިދާޅުވީ ލޯންޗު އެކްސިޑެންޓާ ގުޅިގެން 14 މީހަކު އޭޑީކޭ ހޮސްޕިޓަލުގައި ފަރުވާ ދިނުމަށް ގެނެވުނު ކަމަށާއި އޭގެ ތެރެއިން ތިން މީހަކު ރޭގެ ވަގުތެއްގައި ދޫކޮށްލާފައިވާ ކަމަށެވެ.

އަފްއާލް ވިދާޅުވީ މިހާރު ފަރުވާ ދެމުންދާ 11 މީހުންގެ ތެރެއިން ހަތަރު މީހުން އެ ހޮސްޕުޓަލުގެ އައިސީޔޫގައި ފަރުވާ ދެމުންގެންދާ ކަމަށެވެ. މީގެ އިތުރުން ހަތަރު މީހުންނަށް ހައި ޑިޕެންޑެންސީގައި ފަރުވާ ދެމުންދާ ކަމަށާއީ ބާކީ ތިން މީހުންނަށް ފަރުވާ ދެމުންގެންދަނީ ވޯޑްގައި ކަމަށް އޭނާ ވިދާޅުވި އެވެ.

އައިސީޔޫގައި ފަރުވާ ދެމުންގެންދާ ހަތަރު މީހުންގެ ތެރެއިން ދެ މީހެއްގެ ހާލު ވަރަށް ސީރިއަސް ކަމަށާއި މިދެ މީހުންނަށް ފަރުވާ ދެމުންގެންދަނީ ވެންޓިލޭޓަރުގައި ކަމަށް އޭޑީކޭ އިން ބުނެ އެވެ.

މިދެ މީހުންވެސް އޮޕަރޭޝަނެއް ކޮށްފައިވާ އިރު އެކެއްގެ އެތެރޭގެ ގުނަވަންތަކަށް ބޮޑެތި ގެއްލުންތަކެއް ލިބިފައިވާ ކަމަށް އަފްއާލު އެވެ.

މިހާރު އެ ހޮސްޕިޓަލުގައި ފަރުވާ ދެމުންގެންދަނީ، 10 ދިވެހިންނާއި ބިދޭސީ ކަމަށެވެ. އައިސީޔޫގައި ފަރުވާ ދެމުންދާ ހަތަރު މީހުންނަކީ ދިވެހިންނެވެ. 

އަނިޔާވި މީހުން ސަލާމަތްކުރަން އެ ސަރަހައްދަށް ފުރަތަމަ ދިޔަ ލޯންޗްގެ ކްރޫއަކު ބުނި ގޮތުގައި، ސަމާ އައިލެންޑްގެ ލޯންޗް އޮތީ އެއްކޮށް ކަހަލަ ގޮތަކަށް ހަލާކުވެފަ އެވެ. އެ ހާދިސާގައި، ލޯންޗްގައި ތިބި އެންމެންނަށް އެކިވަރުގެ އަނިޔާ ލިބިފައިވާ ކަމަށާއި އެކެއްގެ ކޮނޑުހުޅު ނެތްޓިފައިވާ ކަމަށް އޭނާ ބުންޏެވެ. ބައެއް މީހުންގެ ބޯ ފަޅައިގެން ގޮސްފައިވާ ކަމަށް ވެސް އޭނާ މައުލޫމާތު ދިނެވެ.

މިހާދިސާ ފުލުހުން މިހާރު ދަނީ ތަހުގީގު ކުރަމުންނެވެ.