އަނެއްކާވެސް ރެކޯޑެއް މިފަހަރު ދުވާލެއްގެ މައްޗަށް 6000 ފަތުރުވެރިން!
އާދީއްތަ ދުވަހަކީ ބޯޑަރު ހުޅުވާލި ފަހުން ދުވާލެއްގެ މައްޗަށް އެންމެ ގިނަ ފަތުރުވެރިން ރާއްޖެއައިސްފައިވާ ދުވަސް
ރާއްޖެެއިން ބޭރުން އައި ފަތުރުވެރިންތަކެއް ފްލައިޓުން ފައިބަނީ - ބޯޑަރު ހުޅުވާލި ފަހުން ރާއްޖެއަށް އަންނަ ފަތުރުވެރިންގެ އަދަދު ދުވަހެއް ދުވަހަކަށް ދަނީ އިތުރުވަމުން
ބޯޑަރު ހުޅުވާލިފަހުން ފުރަތަމަ ފަހަރަށް ރާއްޖެއަށް ދުވާލެއްގެ މައްޗަށް އައި ފަތުރުވެރިންގެ އަދަދު 6000ށް ވެރި މައްޗަށް އަރައިފިއެވެ.
ފަތުރުވެރިކަމާއި ބެހޭ ވަޒީރު އަބްދުﷲ މައުސޫމް އާދީއްތަ ދުވަހުގެރޭ ކުރެއްވި ޓްވީޓެއްގައި ވިދާޅުވީ ބޯޑަރުތައް ހުޅުވާލި ފަހުން އަނެއްކާވެސް އައު ރެކޯޑެއް ހަދާފައިވާ ކަމަށާއި، އެގޮތުން އާދީއްތަ ދުވަހަކީ ބޯޑަރު ހުޅުވާލި ފަހުން ދުވާލެއްގެ މައްޗަށް އެންމެ ގިނަ ފަތުރުވެރިން ރާއްޖެއައިސްފައިވާ ދުވަސް ކަމަށާއި، އެގޮތުން އާދީއްތަ ދުވަހު 6000 ފަތުރުވެރިން ރާއްޖެ އައިސްފައިވާ ކަމަށެވެ. މިއީ ކޮވިޑްގެ ކުރިން ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދާއި އެއްވަރު އަދަދެކެވެ.
މި ޓްވީޓުގައި ވަޒީރު ވަނީ ފަތުރުވެރިކަމުގެ ސިނާއަތުގައި މަސައްކަތް ކުރަމުން އަންނަ ފަރާތްތަކާއި، ފަތުރުވެރިންގެ އިތުރުން އެންމެހާ ދިވެހި ރައްޔިތުންނަށް މަރުހަބާ ދަންނަވާފައެވެ.
ކޮވިޑުގެ ސަބަބުން ރާއްޖޭގެ ބޯޑަރު ބަންދުކުރުމަށްފަހު އަލުން ބޯޑަރު ހުޅުވާލީ ޖުލައި މަހުގެ 15 ވަނަ ދުވަހުއެެވެ. އެގޮތުން ބޯޑަރު ހުޅުވާލި ފަހުން ރާއްޖެ އައި ފަތުރުވެރިންގެ އަދަދުވެސް ލައްކައަކަށްވުރެ މައްޗަށް ގޮސްފައިވާއިރު، ސަރުކާރުން ކަނޑައަޅާފައިވާ އަމާޒަށް ވާސިލު ވުމަށްޓަކައި ނިއު ނޯމަލްގެ ތެރޭގައި ރާއްޖެއަށް ފަސް ލައްކަ ފަތުރުވެރިން ޒިޔާރަތްކުރަން ޖެހޭކަމަށް ބުނެފައިވެއެވެ. އެއާއެކު މި ހިނގާ ޑިސެމްބަރު މަހުގެ 17 ވަނަ ދުވަހު އަހަރުގެ ފަސް ލައްކަ ވަނަ ފަތުރުވެރިޔާ އައުން ކާމިޔާބުކަމާއެކު ސަރުކާރުން މި ވަނީ ފާހަގަކޮށްފައެވެ.
އަންނަ އަހަރަށް ޓޫރިޒަމް މިނިސްޓްރީން ކަނޑައަޅާފައިވާ ޓާގެޓަކީ 1.5 މިލިއަން ފަތުރުވެރިންނެވެ. އަދި މިހާރު ހާލަތަށް އަންނަ ބަދަލާއެކު، އެ އަދަދަށް ފަތުރުވެރިން އަންނާނެ ކަމަށް ފަތުރުވެރިކަމާ ބެހޭ ވަޒީރު ޑރ. އަބްދުﷲ މައުސޫމް ވަނީ ވިދާޅުވެފައެވެ.
