ކައިވެނި ހަފުލާއަކަށްދިޔަ 35 މީހަކު ކޮވިޑަށް ޕޮޒިޓިވްވެއްޖެ

މިމަހުގެ 20 ވަނަ ދުވަހު ބޭއްވި ކައިވެނި ހަފުލާއަކަށް ދިޔަ 35 މީހަކު ކޮވިޑް-19 އަށް ޕޮޒިޓިވްވެއްޖެއެވެ.

ޝީ ބިލްޑިންގުގައި ބޭއްވި މި ހަފުލާގައި ކޮވިޑުގެ އަލާމާތްތައް ހުރި ބަޔަކު ބައިވެރިވެފައިވާއިރު، ޕޮޒިޓިވްވި މީހުންގެ ތެރޭގައި ހައިރިސްކް މީހުންވެސް ހިމެނެއެވެ. މި ހަފުލާގައި ގާތްގަނޑަކަށް 120 މީހުން ބައިވެރިވި ކަމަށް މިހާތަނަށް ވަނީ މައުލޫމާތު ލިބިފައެވެ.

Advertisement

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމުކުރި ބަޔާނެއްގައި ބުނެފައި ވަނީ، މިހަފުލާގައި ބައިވެރިވި އެންމެން އަދި ހަފުލާގެ ކަންކަމުގައި ހަރަކާތްތެރިވި ފަރާތްތަކަށް ގުޅައި، އެންމެން ކަރަންޓީން ކުރަމުން އަންނަ ކަމަށާއި، އަދި އެންމެ ހައި ރިސްކް ފަރާތްތައް ޓެސްޓުކުރުމުގެ މަސައްކަތްވެސް ކުރަމުން އަންނަ ކަމަށެވެ.

އެޗްޕީއޭއިން ބުނީ މި ހަފުލާއަށް ދިޔަ ފަރާތްތަކުގެ ތެރެއިން އެޗްޕީއޭއިން ނުގުޅާ ފަރާތްތަކުން 1676 އަށް ގުޅުއްވާ ވިހާވެސް ގިނަ މައުލޫމާތު ހިއްސާ ކުރުމަށް އެދޭ ކަމަށާއި، އަދި އެޗްޕީއޭއިން މިހާތަނަށް ނުގުޅާ ތިބި، އެ ހަފުލާގައި ބައިވެރިވި އެންމެންވެސް ގެއިން ބޭރަށް ނުނިކުމެ ގޭގައި އެކަހެރިވެ ތިބުމަށް އެދޭ ކަމަށެވެ.

އެޗްޕީއޭއިން ބުނީ މިފަދަ ހަފުލާތައް ބާއްވާއިރު އެޗްޕީއޭ ގެ ގައިޑްލައިންތަކާ އެއްގޮތަށް އަމަލުކުރުމަށް ހާއްސަ ސަމާލުކަމެއް ދިނުމަކީ މުހިންމު ކަމެއް ކަމަށާއި، އެގޮތުން ބަލީގެ އަލާމާތްތައް ހުރި މީހުން މިފަދަ ހަފްލާތަކަށް ނުދިއުމާއި، ހާޒިރުވާ ފަރާތްތައް މާސްކް އެޅުމާއި، ގައިދުރުކަން ކަށަވަރުކުރެވޭނެ މިންވަރަށް ބަހާލައިގެން މީހުންނަށް ދައުވަތު ދިނުމަށް އަންގާ ކަމަށެވެ.

އަދި ކައިވެނި ޕާޓީ ފަދަ ހަފުލާތައް އިންތިޒާމުކުރާ ތަންތަނަކީ ރަނގަޅަށް ވައި ދައުރުވާ ގޮތަށް ހުންނަ ތަންތަންތޯ ބަލައި، ކާބޯތަކެތި ފޯރުކޮށްދިނުމުގައި އެޗްޕީއޭގެ ގައިޑްލައިންގައިވާ ގޮތުގެ މަތިން ކަންކަން އިންތިޒާމުކުރުމަށްވެސް އެޗްޕީއޭއިން ވަނީ ބުނެފައެެވެ.

ރާއްޖޭގައި ކޮވިޑުގެ ހާލަތު މި މަހު ވަރަށް ބޮޑުތަނުން ދަށަށް ގޮސްފައިވާއިރު، ހެދިފައިވާ ގިނަ ގަވައިދުތަކަށް ވަނީ ބަދަލުތައް ގެނެސް ލުއިތަކެއް ދީފައެވެ. އެއާއެކު މާލެ ސަރަހައްދު ލޮކްޑައުން ކޮށްފައި އޮތް އޮތުން ނިމުމަކަށް ގެނެސް ކާފިއު ވަނީ އުވާލާފައެވެ. އަދި އަތޮޅުތެރެއަށް ދަތުރުކުރާ ފަރާތްތަކަށްވެސް ވަނީ ހާއްސަ ހުއްދައެއްގެ ދަށުން ލުއިތަކެއް ދީފައެވެ.

ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވި މީހުންގެ އަދަދު 13,583 އަށް އަރާފައިވާއިރު، އޭގެ ތެރެއިން 48 މީހަކު ވަނީ ނިޔާވެފައެެވެ.