ދިވެހިންގެ އެއްބައިވަންތަ ކަމުގެ ދުވަހުގެ ތަހުނިޔާ ރައީސް ދަންނަވައިފި

ދިވެހިންގެ އެއްބައިވަންތަކަމުގެ ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ދަންނަވައިފިއެވެ.

ހޮނިހިރު ދުވަހު ރައީސް ކުރެއްވި ޓްވީޓެއްގައި ވިދާޅުވީ، ދިވެހިންގެ އެއްބައިވަންތަކަމުގެ ދުވަހުގެ ހެޔޮއެދުމާއި ތަހުނިޔާ ރާއްޖޭގެ ލޮބުވެތި ރައްޔިތުންނަށް ދަންނަވާ ކަމަށެވެ. އަދި އެންމެހައި ކާރިސާތަކުން ރާއްޖެއާއި ރާއްޖޭގެ ރައްޔިތުން ސަލާމަތްކުރައްވައި، ޤައުމީ މައްސަލަތައް ހައްލު ކުރުމުގައި އެއްބައިވަންތަކަމުގައި ސާބިތުވެ ތިބުމުގެ ހެޔޮ ތައުފީޤު ދެއްވުމަށް ރައީސް ވަނީ ދުއާ ކުރައްވާފައެވެ.

ދިވެހިންގެ އެއްބައިވަންތަކަމުގެ ދުވަހަކީ 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ކުރިމަތިވި ސުނާމީ ކާރިސާއަށްފަހު، ކޮންމެ އަހަރަކުވެސް ފާހަގަ ކުރަމުންދާ ދުވަހެކެވެ.

އިންޑޮނޭޝިއާގެ ސުމާޓްރާއަށް އައި ބާރުގަދަ ބިންހެލުމަކާއި ގުޅިގެން އުފެދުނު މި ސުނާމީގެ ސަބަބުން ރާއްޖޭގެ ބައެއް ރަށްތައް މީހުން ދިރިނޫޅެވޭ ވަރަށް ހަލާކު ވެފައިވާއިރު، އެތަކެއް ފުރާނަތަކެއް ވަނީ މި ދުނިޔެއާއި ޢަލްވަދާޢު ކިޔާފައެވެ. އެގޮތުން މި ދުވަސް އެއްބައިވަންތަ ކަމުގެ ދުވަހުގެ ގޮތުގައި ފާހަގަ ކުރަނީ އޭރު ދިވެހިން ދެއްކި އެއްބައިވަންތަކަމާއި، އެއްބައެއްވަންތަ ކަމުގެ ލާމަސީލު ނަމޫނާގެ ސަބަބުންނެވެ.

މި ކާރިސާއަށް 16 އަހަރު ފުރިފައިވާއިރު، އަދިވެސް އެ ދުވަހުގެ ހަނދާންތައް ދިވެހިން އައު ކުރެއެވެ. މި ކާރިސާގައި ދުނިޔޭގެ އެކި ޤައުމުތަކަށް އެކި ވަރުގެ ގެއްލުންތައް ލިބިފައިވާއިރު، ރާއްޖެއިންވެސް 84 މީހަކު މަރުވެ، 24 މީހުން ވީނުވީއެއް ނޭނގި ގެއްލިފައިވެއެވެ.

އަދި 15،000 ދިވެހި ރައްޔިތުންގެ ގެދޮރު ގެއްލި ބިކަ ހާލުގައި ޖެހުނުއިރު، ރާއްޖޭގެ އަބާދީގެ 62 އިންސައްތަ މީހުންނަން މި ހިތްދަތި ހާދިސާގައި އެކިވަރުގެ ގެއްލުންތައް ވެފައިވެއެވެ.