އިރާގުގައި ހުންނަ އެމެރިކާގެ އެމްބަސީ ބަންދުކުރަނީ
26 ޑިސެމްބަރު 2020 | ހޮނިހިރު 04:44ފާއިތުވެދިޔަ ހަފްތާގެ ތެރޭގައި އެމްބަސީއަށް ވަނީ ސިލްސިލާ ރޮކެޓް ހަމަލާތަކެއް އަމާޒުވެފައި
އިރާގުގައި ހުންނަ އެމެރިކާގެ އެމްބަސީއަށް ދިން ރޮކެޓް ހަމަލާއެއް
އިރާގުގެ ހަނގުރާމަވެރި ޖަމާއަތްތަކުން ބަޣްދާދުގައި ހުންނަ އެމެރިކާގެ އެމްބަސީއަށް ދެމުން ގެންދާ ރޮކެޓް ހަމަލާތައް އިތުރުވަމުން ދިޔުމާއިއެކު އެންބަސީ ބަންދުކުރުމަށް އެމެރިކާއިން ނިންމައިފިއެވެ.
ވައިޓް ހައުސްގެ އިސް އޮފިޝަލަކު ބުނީ އިރާގުގައި ހުންނަ އެމެރިކާގެ އެމްބަސީ ވަގުތީ ގޮތުން ބަންދުކުރަން ނިންމާފައިވާ ކަމަށާއި، އެގޮތަށް ނިންމީ އިރާގުގެ ހަނގުރާމަވެރި ޖަމާއަތްތަކުން އެމްބަސީއަށް ރޮކެޓް ހަމަލާތައް ދެމުން އަންނާތީ ކަމަށެވެ.
އިރާގުގެ ބަޣްދާދުގެ އެންމެ ރައްކާތެރި ހިސާބުގައި އެމެރިކާގެ އެމްބަސީ ހުރިނަމަވެސް ފާއިތުވެދިޔަ ހަފްތާގެ ތެރޭގައި އެމްބަސީއަށް ވަނީ ސިލްސިލާ ރޮކެޓް ހަމަލާތަކެއް އަމާޒުވެފައެވެ. މި ހަމަލާތަކުގައި އެމްބަސީއަށް ގެއްލުންތަކެއް ވެފައިވާ ކަމަށް އެމެރިކާގެ ހާރިޖީ ވުޒާރާއިން ބުނެއެވެ.
އިރާގުގެ ބަޣްދާދުގައި ހުންނަ އެމެރިކާ އެމްބަސީ އަކީ ދުނިޔޭގެ ގައުމެއްގައިވާ އެމެރިކާގެ އެންމެ ބޮޑު އެމްބަސީއެވެ. މި އެމްބަސީގައި އެތަށް ސަތޭކަ މުވައްޒަފުން މަސައްކަތް ކުރަމުން އަންނައިރު، އެމެރިކާގެ އެމްބަސީއަކީ ޖާސޫސީ މަރުކަޒެއް ކަމަށް ބުނެ އިރާގުގެ ހަނގުރާމަވެރިން އަންނަނީ ތަކުރާރުކޮށް އެތަނަށް ހަމަލާ ދެމުންނެވެ.
