ކުރިއަށް އޮތް 2021 ވަނަ އަހަރު އިނގިރޭސިވިލާތުގެ ފަތުރުވެރިން ޗުއްޓީ ހޭދަކުރުމަށް އެންމެ ދާން ބޭނުންވާ މަންޒިލަކީ ރާއްޖެ ކަމަށް ދިރާސާއަކުން ދައްކައިފިއެވެ.

ގޫގްލް ސަރޗް ޑޭޓާގެ މައްޗަށް ބިނާކޮށް ކްލަބްމެޑް އިން ކުރިއަށް ގެންދިޔަ ދިރާސާއިން ދައްކާގޮތުން އެ ދިރާސާ ކުރިއަށްގެންދިޔަ މުއްދަތުގައި އިނގިރޭސިވިލާތުގެ 2،960 މީހުން ވަނީ ގޫގްލްގައި ރާއްޖެ ސަރޗްކޮށްފައެވެ. ދެ ވަނައަށް އެންމެ ގިނަ މީހުން މެކްސިކޯ ސަރޗް ކޮށްފައިވާއިރު، އެއީ 2،930 މީހުންނެވެ.

މީގެ އިތުރުން، މި އަހަރު އިނގިރޭސިވިލާތުގެ ފަތުރުވެރިންގެ މެދުގައި އެންމެ މަގްބޫލް މަންޒިލަކީ ގްރީސް އެވެ. ރާއްޖެ އޮތީ 300 މީހުންގެ ތަފާތަކާއިއެކު މި ލިސްޓުގެ ދެ ވަނާގައިއެވެ. އެގޮތުން 74،500 މީހުން ގޫގްލްގައި ގްރީސް ސަރޗް ކޮށްފައިވާއިރު، ރާއްޖެ ސަރޗްކޮށްފައި ވަނީ 74،200 މީހުންނެވެ.

ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށް ފަހު އަލުން ހުޅުވާލިފަހުން ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުގެ ލިސްޓުގެ ތިން ވަނައިގައި އިނގިރޭސިވިލާތް ހިމެނޭ އިރު، ބޯޑަރު ހުޅުވާލިފަހުން އެގައުމުން 16,987 ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. މިއީ ބޯޑަރު ހުޅުވާލިފަހުން ރާއްޖެ އަންނަ މީހުންގެ 11.9 އިންސައްތަ މީހުންނެވެ.

އަހަރުގެ މިހާތަނަށް ރާއްޖެއަށް ހަތަރު ވަނައަށް އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމަކީ އިނގިރޭސިވިލާތެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ނޮވެމްބަރ މަސް ނިމުނު އިރު 38,285 ފަތުރުވެރިން ވަނީ އިނގިރޭސިވިލާތުން ރާއްޖެ އައިސްފައެވެ.