މޯލްޑިވް ގޭހުގެ އެމްޑީ ޝަޒައިލްގެ ރިޝްވަތުގެ މައްސަލައިގެ ރިޕޯޓް މަޖިލީހަށާއި ރައީސް އޮފީހަށް
މޯލްޑިވް ގޭހުގެ އެމްޑީ ޝަޒައިލް ސަސްޕެންޝަނުގައި ހުންނަވާތާ އަހަރަކަށްވުރެ ގިނަ ދުވަސް ވެއްޖެ
މޯލްޑިވް ގޭސް ކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމް: މަނީ ލޯންޑަރިންގގެ ތުހުމަތުވެސް ކުރެވޭ
މޯލްޑިވް ގޭސް ކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމްގެ މައްޗަށް ތުހުމަތު ކުރެވޭ ރިޝްވަތުގެ މައްސަލަ ނިންމުމަށްފަހު، ރިޕޯޓް ރައީސުލްޖުމްހޫރިއްޔާގެ އޮފީހަށާއި ރައްޔިތުންގެ މަޖިލީހަށް ފޮނުވައިފި އެވެ.
އެމައްސަލަ ތަހުގީގުކުރި އެންޓި ކޮރަޕްޝަން ކޮމިޝަން (އޭސީސީ)ގެ އޮފިޝަލަކު "ރާއްޖެއެމްވީ" އަށް ވިދާޅުވީ، މޯލްޑިވްސް ގޭސް ކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމްގެ މައްޗަށް ތުހުމަތު ކުރެވޭ ރިޝްވަތުގެ މައްސަލަ އޭނާގެ މައްޗަށް ސާބިތު ނުވާކަމަށް އޭސީސީން ނިންމާފައިވާ ކަމަށެވެ. ނަމަވެސް އެމައްސަލައިގެ ތަހުގީގުން ޝަޒައިލްގެ މައްޗަށް މަނީ ލޯންޑަރިންގ އަމަލެއް ހިންގާފައިވާ ކަމުގެ ތުހުމަތު ކުރެވޭތީ، އެމައްސަލަ ތަހުގީގު ކުރުމަށް ފުލުހުންގެ އިދާރާއަށް ހުށަހަޅާފައިވާ ކަމަށް އޮފިޝަލް ވިދާޅުވި އެވެ.
މަނީ ލޯންޑަރިންގެ މައްސަލަތައް ބެލުމުގެ ގާނޫނީ ބާރު އޭސީސީއަކަށް ނޯވެ އެެވެ. އޭސީސީއިން ފުލުހުންނަށް އެ މައްސަލަ ފޮނުވީ އެހެންވެ އެވެ.
މައުލޫމާތު ލިބިފައިވާގޮތުގައި، ރިޝްވަތުގެ މައްސަލަ ސާބިތުވާވަރުގެ ހެކި ލިބިފައިނުވަނީ ޝަޒައިލް ހެކި ނައްތާލާފައިވާތީ އެވެ.
މައުލޫމާތު ލިބިފައިވާގޮތުގައި، ޝަޒައިލްގެ ފޯނު ކޯޓު އަމުރެއްގެ ދަށުން ތަހުގީގަށް ހިފަހައްޓައި އެ ފޯނުން ޑޭޓާ ދިރާސާކުރުމަށްފަހު، ފުލުހުންގެ އިދާރާގެ ފޮރެންސިކް ޑިޕާޓްމަންޓަށް ހުށަޅިއެވެ. ފޮރެންސިކްގެ ތަހުގީގު ރިޕޯޓުގައި ބުނެފައިވަނީ، އެންމެފަހުން އެފޯނުގެ އިނީޝިއަލް ސެޓްއަޕް ހަދައި، އެފޯނު ބޭނުންކުރަން ފެށިފައިވަނީ 30 ޖުލައި 2020 ގައި ކަން ދެނެގަނެވިފައިވެއެވެ. އަދި ފޯނުގެ ޑިވައިސް އިވެންޓް ލޮގް، ފޯނު ލޮގް އަދި ޑޭޓާބޭސް ކްރިއޭޝަން ޑޭޓްތައް ފެށިފައިވަނީ 30 ޖުލައި 2020ގައިކަން ފާހަގަކޮށްފައިވެއެވެ.
ޝަޒައިލްގެ ފޯނު ތަހުގީގުގެ ބޭނުމަށް ހިފަހައްޓަން އުޅޭކަމުގެ މައުލޫމާތު ޝަޒައިލްއަށް ކޮންމެވެސް ފަރާތަކުން ފޯރުކޮށްދީފައިވާކަން ތުހުމަތުކުރެވޭތީ މިމައްސަލާގައި ކަންހިނގާފައިވާގޮތް ބެލުމަށް ފުލުހުންގެ އިދާރާއަށް ފޮނުވާފައިވާ ކަމުގެ މައުލޫމާތުވެސް ލިބެއެވެ.
ޝަޒައިލްގެ މައްޗަށް ތުހުމަތު ކުރެވޭ ކޮރަޕްޝަންގެ މިމައްސަލައާ ގުޅިގެން އޭނާ ސަސްޕެންޑް ކޮށްފައިވަނީ މިދިއަ 2019 ވަނަ އަހަރުގެ އޮކްޓޯބަރު މަހުގެ ތެރޭގައެވެ. އަދި ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް (އެސްއޯއީ) ކޮމެޓީން އެމައްސަލަ ބަލައި އަދި ތަހުގީގުކުރުމަށް އޭސީސީއަށް ހުށަހަޅާފައިވެއެވެ.
ޝަޒައިލް ސަސްޕެންޑް ކޮށްފައިވަނީ، މޯލްޑިވް ގޭހުން ނުއަގުގައި ސަޕްލަޔަރެއްގެ އަތުން ގޭސް ގަންނަކަމުގެ މައްސަލައިގައެވެ. މި މައްސަލަ ބެލުމަށް ފަހު،މޯލްޑިވް ގޭހުން "ޑައިރެކްޓް ޕަރޗޭސް" ގެ ދަށުން ގޭސް ގަތުމަށްއެންގުމަށް ވެސް އެސްއޯއީ ކޮމިޓީއިން ފާސްކޮށްފައިވެއެވެ.
މޯލްޑިވް ގޭހުގެ ކޮރަޕްޝަންގެ މައްސަލައިގެ ތަހުގީގު ރިޕޯޓް ނިމުން ލަސްވަމުންދާތީ މި ޑިސެމްބަރު މަހު ބޭއްވި އެސްއޯއީ ކޮމެޓީގެ ބައްދަލުވުމުގައި މެމްބަރުން ކަންބޮޑުވުން ފާޅު ކުރެއްވުމަށްފަހު، ވަނީ އެމައްސަލައިގެ ތަހުގީގު ދެ މަސް ދުވަހުގެ ތެރޭގައި ނިންމާ ދެއްވުމަށް އޭސީސީގައި އެދުމަށް ނިންމާފަ އެވެ. އަދި އެސްއޯއީ ކޮމެޓީގެ އެރިޕޯޓް މަޖިލީހުން ވަނީ ފާސްކޮށްފަ އެވެ.
ކުރީގެ ރައީސް މައުމޫން އަބްދުލް ގައްޔޫމްގެ މޯލްޑިވްސް ރިފޯރމް މޫވްމަންޓް (އެމްއާރްއެމް) ގެ ސްލޮޓެއްގައި މޯލްޑިވް ގޭހުގެ އެމްޑީގެ މަގާމަށް ވަޑައިގެންނެވި ޝަޒައިލް ވަނީ، ކުރީގެ ރައީސް އަބްދުﷲ ޔާމިންގެ ސަރުކާރުގެ ފިޝަރީޒް މިނިސްޓްރީއާއި ޓޫރިޒަމް މިނިސްޓްރީގެ ޑެޕިއުޓީ މިނިސްޓަރގެ މަގާމު ފުރުއްވާފައެވެ.
