ކޮވިޑް-19 ގެ މެދުކެނޑުމަށްފަހު ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން މާލެ ސަރަހައްދަށް ހުޅުވާލައިގެން ކުރިއަށްގެންދާ ފުރަތަމަ ބެޑްމިންޓަން މުބާރާތުގެ ކުޅުން އަންގާރަ ދުވަހު ފަށައިފިއެވެ.

އާދީއްތަ ދުވަހުން ފެށިގެން ކުޅިވަރު މުބާރާތްތައް ބޭއްވުމުގެ ހުއްދަ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދިނުމާއެކު، "ބެޑްމިންޓަން އެސޯސިއޭޝަން މިކްސްޑް ޓީމު ޗެމްޕިއަންޝިޕް 2020" ގެ ކުޅުން އަންގާރަ ދުވަހުގެ ހަވީރު ބެޑްމިންޓަން ހޯލުގައި ވަނީ ފަށާފައެވެ. އަދި މި މުބާރާތް ކުރިއަށްދަނީ ކުޅިވަރު މުބާރާތްތައް ބޭއްވުމަށް އެޗްޕީއޭއިން އެކުލަވާލާފައިވާ އުސޫލުތަކާ އެއްގޮތަށް ކަމަށް ބީއޭއެމްއިން މައުލޫމާތުދެއެވެ.

މި މުބާރާތުގައި އަށް ޓީމެއް ވާދަކުރާއިރު، އެ ޓީމުތައް ވަނީ ދެ ގްރޫޕަކަށް ބަހާލާފައެވެ. އެގޮތުން ގްރޫޕް އޭގައި ހިމެނެނީ އަޖުފާން އިންޓަނޭޝަނަލް ބެޑްމިންޓަން އެކެޑެމީ (އައިބާ) އާއި، ސައިރިކްސް ރެކްރިއޭޝަން ކުލަބާއި، ކުލަބު ސްޓެޓިކް އަދި އިންޑޯ ސްޕޯޓްސް ބެޑްމިންޓަން އެކެޑެމީއެވެ. އަދި ގްރޫޕް ބީގައި ހިމެނެނީ އެންމެ ފަހުގެ ފުރަތަމަ ޑިވިޝަން ޗެމްޕިއަން ރިވައިވަލް ސްޕޯޓްސް އާއި، ކުލަބު ސްކޯ ސްޕޯޓްސް އާއި، ޔުނައިޓެޑް ވިކްޓަރީ (ޔޫވީ) އަދި ދަ ގޯޅި ސްޕޯޓްސް ކުލަބެވެ.

މުބާރާތުގައި ކޮންމެ ދުވަހަކު ދެ މެޗެއް ކުޅޭއިރު، ކޮންމެ މެޗެއްގައި އަށް ގޭމް ހިމެނެއެވެ. އެއީ ފިރިހެން ޑަބަލްސް ތިން މެޗާއި، އަންހެން ޑަބަލްސް ތިން މެޗުގެ އިތުރުން މިކްސް ޑަބަލްސް ދެ މެޗެވެ. ހަފުތާއެއްހާ ދުވަހަށް ދިގު ދެމިގެންދާ މި މުބާރާތުގެ ފައިނަލް މެޗުތައް ކުޅުމަށް ތާވަލުކޮށްފައިވަނީ އަންނަ ހަފުތާގެ އަންގާރަ ދުވަހުއެވެ.

ބެޑްމިންޓަން އެސޯސިއޭޝަނުން މި އަހަރަށް ގިނަ ހަރަކާތްތަކެއް ރޭވި ނަމަވެސް، ކޮވިޑް-19 އާ ގުޅިގެން މާޗު މަހު ހުރިހާ ހަރަކާތްތަކެއް ވަނީ ހުއްޓާލާފައެވެ. އޭގެ ފަހުން މާލެ ސަރަހައްދުގައި މުބާރާތެއް ބާއްވާފައިނުވާއިރު، މި މުބާރާތަކީ އޭގެ ފަހުން ބީއޭއެމްއިން އިންތިޒާމުކުރާ ފުރަތަމަ މުބާރާތެވެ.