ކުރީ ސަރުކާރުތަކުން މިފްކޯ ތަރައްގީކުރިނަމަ، އުތުރުގެ މަސްވެރިންގެ ޝަކުވާތައް މިއަދު ނުހުންނާނެ: ފައުޒީ
ސަރުކާރުން ދަނީ މިފްކޯ ތަރައްގީކުރުމަށް ގިނަ މަސައްކަތްތަކެއް ކުރަމުން
މިފްކޯގެ މެނޭޖިންގ ޑިރެކްޓަރު އިސްމާޢީލް ފައުޒީ ރާއްޖެޓީވީއަށް ދެއްވި ހާއްސަ އިންޓަވިއުގެ ތެރެއިން
ކުރީގެ ސަރުކާރުތަކުން މިފްކޯ ތަރައްގީކުރިނަމަ އުތުރުގެ މަސްވެރިން މިއަދު ފާޅުކުރަމުންދާ ޝުއޫރުތައް ފާޅުކުރަން ނެޖެހޭނެ ކަމަށް މޯލްޑިވްްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ މެނޭޖިންގ ޑިރެކްޓަރު އިސްމާޢީލް ފައުޒީ ވިދާޅުވެއްޖެއެވެ.
އަންގާރަ ދުވަހު ގިނަ އަދަދެއްގެ މަސްވެރިން ފެލިވަރުގައި އިހުތިޖާޖުކުރުމާ ގުޅިގެން ރާއްޖެޓީވީއަށް ދެއްވި ހާއްސަ އިންޓަވިއުއެއްގައި ފައުޒީ ވިދާޅުވީ މިފްކޯގެ ވަސީލަތްތަކަށް ބަލާއިރު، ފެލިވަރުގައި މަސްކިރުމުގެ އިންތިޒާމުތައް ދަށް ކަމަށާއި، ތަރައްގީއަށް ބަލާއިރު އެންމެ އެކަށީގެންވާ މަސް ފްރީޒް ކުރުމާއި، ސްޓޯރޭޖް ކެޕޭސިޓީއެއްވެސް ފެލިވަރުގައި ނެތް ކަމަށެވެ.
ކުރީ ސަރުކާރުތަކުން ފެލިވަރު ތަރައްގީކުރިނަމަ މިއަދު އުތުރުގެ މަސްވެރިން ފާޅުކުރަމުންދާ ޝުއޫރުތައް ފާޅުނުކުރާނެކަން ފާހަގަކުރައްވާ ފައުޒީ ވަނީ މި ސަރުކާރުން މިފްކޯ ތަރައްގީކުރުމަށް ގިނަ މަސައްކަތްތަކެއް ކުރަމުން އަންނައިރު، އެންމެ ބޮޑު ސަމާލުކަމެއްދޭ އެއް ތަނަކީ ފެލިވަރު ކަމަށް ވިދާޅުވެފައެވެ.
އެގޮތުން ފެލިވަރުގައި 4،000 ޓަނުގެ ސްޓޯރޭޖާއި، ފްރީޒީން ކެޕޭސިޓީ އިތުރު 200 ޓަނުން އިތުރުކުރުމާއި، އާރްއެސްޑަބްލިއުގެ އިތުރު 80 ތަނު ގާއިމުކުރުމުގެ މަސައްކަތްކުރަމުންދާކަން ފައުޒީ ފާހަގަކުރެއްވިއެވެ. މީގެ އިތުރުން ފެލިވަރުގެ ކޭނަރީ އިތުރަށް ތަރައްގީކުރުމުގެ ގޮތުން އައު ކޭނަރީއެއް ފެލިވަރުގައި ގާއިމުކުރެވޭނެ ކަމަށާއި، މި ކޭނަރީ ވެގެންދާނީ ދުވާލަކަށް 100 ޓަނުގެ މަސް ޕްރޮސެސް ކުރެވޭ ކޭނަރީއަކަށް ކަމަށްވެސް ފައުޒީ ވިދާޅުވިއެވެ.
ފައުޒީ ވަނީ ފެލިވަރުގެ މި ޕްރޮޖެކްޓުތަކާއެކު އުތުރުގެ މަސްވެރިންނަށް އިތުރު އުންމީދުތަކެއް ލިބިގެންދާނެ ކަމަށް ވިދާޅުވެފައެވެ.
މަސްވެރިންގެ އެންމެ ބޮޑު ކަންބޮޑުވުމެއް އޮތީ މަސްކިރުމަށް ކިއުގައި ތިބެންޖެހުންކަން ފާހަގަކުރައްވާ ފައުޒީ ވިދާޅުވީ މި ސަރުކާރުން މަސްވެރިން ބޭނުންވާ ތަރައްގީ ގެނަސްދިނުމަށް މަސައްކަތްކުރާނެ ކަމަށާއި، އެ ތަރައްގީ ބޭނުންވާ މިންވަރަށްވުރެ ބޮޑުކޮށްވެސް ހާސިލުކުރެވޭނެ ކަމަށެވެ. އެގޮތުން ފެލިވަރު ތަރައްގީކުރުމަށް ޕްލޭން ކޮށްފައިވަނީވެސް ބޮޑުކޮށް ކަމަށާއި، ފެލިވަރު ތަރައްގީކުރެވޭނީ ބޭރު ބަނދަރަކާއި، ކެރިއަރަކާ އެކުގައިކަން ފައުޒީ ފާހަގަކުރެއްވިއެވެ.
މީގެ އިތުރުން މަސްވެރިންގެ ކަންބޮޑުވުންތަކުގެ ތެރޭގައި ކީކިމިނި އަކީ އަމިއްލަ ފަރާތެއްގެ އެސެޓަކަށްވުމުން، ކީކިމިނި މިފްކޯއަށް ނުވަތަ ސަރުކާރަށް ނެގުމުގައި ގޮތް ނިންމަން އުނދަގޫވާނެ ކަމަށްވެސް ފައުޒީ ވިދާޅުވިއެވެ.
މައިގަނޑު ހަތަރު ކަމަކަށް ފެލިވަރުގައި އިހުތިޖާޖުކުރި މަސްވެރިން ޑިމާންޑް ކޮށްފައިވާއިރު، އެގޭތެރޭގައި މަހުގެ ހަމަ އަގު 20 ރުފިޔާއަށްވުރެ ދަށް ނުވާނެހެން ދެމެހެއްޓުމާއި، ފެލިވަރުން ލުއި ފަސޭހަ ގޮތެއްގައި މަސްވެރިންނަށް އައިސް ލިބޭނެ އިންތިޒާމުތައް ހަމަޖެއްސުން އަދި މިފްކޯގެ ބެލުމުގެ ދަށަށް ކީކިމިނި ގެނެސް، ކީކިމިނި ބޭނުން ކުރެވޭނެ ހާލަތަށް ގެނައުމުގެ އިތުރުން، ދުވަހުން ދުވަހަަށް މަސް ކިރޭނެ އިންތިޒާމު ހަމަޖެއްސުންވެސް ހިމެނެއެވެ.
އަންގާރަ ދުވަހުގެ ހެނދުނު 7:30 ހާއިރު، މަސްވެރިން އިހުތިޖާޖުކުރަން ފަށާފައިވާއިރު، އިހުތިޖާޖުގައި 17 ދޯނި ބައިވެރިވިއެވެ. އަދި މިއިން ކޮންމެ ދޯންޏެއްގައި ވިއްސަކަށް ފަޅުވެރިން ތިބެއެވެ.
