އިނގިރޭސިވިލާތުން ފެނުނު ކޮރޯނާވައިރަސްގެ އައު ސްޓްރެއިން ނުވަތަ ވޭރިއެންޓްގެ ކަންކަން އެގައުމާއި ގުޅިގެން ގާތުން ބަލަމުން އަންނަކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ބުނެފިއެވެ.
އިނގިރޭސިވިލާތުން ފެނިފައިވާ ވައިރަސްގެ މި އައު ސްޓްރެއިން ވައިރަސްގެ އަސްލަށްވުރެ އަވަސް މިނުގައި އަންނަނީ ފެތުރެމުންނެވެ. އެހެންނަމަވެސް މި ވޭރިއެންޓްގެ ނުރައްކާތެރިކަން ބޮޑުކަމެއް އަދި މިހާތަނަށް ހޯދިފައެއްނުވެއެވެ.
ލަންޑަން ހިމެނޭ ގޮތަށް އިނގިރޭސިވިލާތުގެ އިރު ދެކުނު ސަރަހައްދުގެ ބޮޑުބައެއްގައި މިހާރު ވަނީ ވައިރަސް ފެތުރުން ކޮންޓްރޯލް ކުރުމަށްޓަކައި ވަރުގަދަ ފިޔަވަޅުތަކެއް އަޅާފައެވެ.
މިހާތަނަށް އައިއިރު ވައިރަސްގެ މި އައު ސްޓްރެއިން ކޮވިޑަށް އުފައްދާފައިވާ ވެކްސިނަށް ތަފާތު ގޮތަކަށް މަސައްކަތް ކުރާކަމެއް އަދި ހޯދިފައެއްނުވެއެވެ.
ކޮވިޑް-19 ކޮންޓްރޯލް ކުރުމަށް އިނގިރޭސިވިލާތުގައި އަންނަނީ ފައިޒަރގެ ވެކްސިން މިހާރު ޖަހަމުންނެވެ.
އަނެއްކޮޅުން އިނގިރޭސިވިލާތުގައި މި އައު ސްޓްރެއިން ހަލުވިކަމާއެކު ފެތުރެމުންދާތީ އާދިއްތަ ދުވަހު ނެދަރލެންޑްސް އިން ވަނީ އިނގިރޭސިވިލާތުން ފްލައިޓް އައުން މަނާކޮށްފައެވެ. ޖެނުއަރީ މަހުގެ 1 ވަނަ ދުވަހާ ހަމައަށް މިނިންމުން މިގޮތުގައި ދެމި އޮންނާނެ ކަމަށް ނެދަރލެންޑްސް ސަރުކާރުން ބުނެއެވެ.
ނެދަރލެންޑްސް އިން މިނިންމުން ނިންމާފައިމިވަނީ މިމަހުގެ ކުރީކޮޅު އެގައުން ނެގި ސާމްޕަލަކުން ވައިރަސްގެ މި ސްޓްރެއިން ފެނިފައިވާތީއެވެ.
އިނގިރޭސިވިލާތުން ފެނިގެން މިއުޅޭ އައު ސްޓްރެއިން އާ ގުޅިގެން ޑަބްލިޔުއެޗްއޯއިން ކޮށްފައިވާ ޓްވީޓެއްގައި ބުނެފައިވަނީ އެގައުމުގެ އޮފިޝަލުންނާއެކު ގާތުން މިކަން ބަލަމުން އަންނަކަމަށެވެ.
އިނގިރޭސިވިލާތުން މި އައު ސްޓްރެއިން ދިރާސާކުރަމުން އަންނައިރު އެކަމުގެ މައުލޫމާތު ޑަބްލިޔުއެޗްއޯއާ ހިއްސާކުރަމުން އަންނަ ކަމަށް އެޖަމިއްޔާއިން ވަނީ ބުނެފައެވެ. އަދި މި ސްޓްރެއިންގެ މައުލޫމާތު މެމްބަރު ގައުމުތަކަށާއި އާންމުންނަށް ފޯރުކޮށްދެމުން ގެންދާނެކަމަށް ޑަބްލިޔުއެޗްއޯއިން ބުނެއެވެ.
މި އައު ސްޓްރެއިން އާ ގުޅޭގޮތުން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވީ ވައިރަސްގެ އަސްލަށްވުރެ 70 އިންސައްތަ އިތުރަށް މި ސްޓްރެއިން އިން ވައިރަސް ފެތުރޭކަމަށެވެ. އެހެންނަމަވެސް މި ސްޓްރެއިން އިން މަރުވާ މީހުންގެ އަދަދު އިތުރުވާކަމެއް އަދި ހޯދިފައިނުވާކަމަށް އޮފިޝަލުން ބުނެއެވެ.
