ކޮވިޑް-19 ފެތުރުނަނުދީ ކޮންޓްރޯލް ކުރުމުގެ ގޮތުން ކްރިސްމަސްއާ ދިމާކޮށް އިޓަލީ ފުރަބަންދު ކުރަން އެ ގައުމުގެ ސަރުކާރުން ނިންމައިފިއެވެ.

އިޓަލީގެ ސަރުކާރުން ބުނީ ކްރިސްމަސްއާ ދިމާކޮށް "ރެޑް ޒޯން" ތައް ކަނޑައަޅާފައި ކަމަށާއި، ރެޑް ޒޯންގައި ހިމެނޭ ސަރަހައްދުތަކުގައި ކޮންމެހެން މުހިންމު ނޫން ފިހާރަތާކައި ރެސްޓޯރެންޓް އަދި ބާ ފަދަ ތަންތަން ބަންދުކުރަން ނިންމާފައިވާ ކަމަށެވެ. އަދި ރެޑް ޒޯންގައި ދިރިއުޅޭ ފަރާތްތަކުން ޒަރޫރީ ބޭނުންތަކަށް ނޫންގޮތަކަށް ބޭރަށް ނުނިކުތުމަށް ރައްޔިތުންނަށް ވަނީ އިލްތިމާސްކޮށްފައެވެ.

މި ނިންމެވުން ހާމަކުރައްވާ އިޓަލީގެ ބޮޑުވަޒީރު ޖުސޭޕޭ ކޮންޓޭ ވިދާޅުވީ މިއީ ވަރަށް އުނދަގޫވި ނިންމެވުމެއް ކަމަށާއި، ހާއްސަކޮށް ފަތުރުވެރިން ޒިޔާރަތްކުރަމުން އަންނަ ދަނޑިވަޅެއްގައި މި ނިންމުން ނިންމަން ޖެހުމުން އެކަމާއި ކަންބޮޑުވި ކަމަށެވެ. އެހެންނަމަވެސް، އިޓަލީގެ ސަރުކާރުން އަބަދުވެސް އިސްކުރާނީ އާންމު ފަރުދުންގެ ސިއްހަތު ކަމަށާއި، މި ނިންމުމަކީ ވެސް ސިއްހީ ވުޒާރާއިން އާއްމުންގެ ރައްކާތެރިކަން ކަށަވަރުކުރަން ނެގި އުނދަގޫ ނިންމެވުމެއް ކަމަށް ވިދާޅުވިއެވެ.

ވިލާތަށް ކޮވިޑުގެ ދެވަނަ ރާޅެއް އައިސް ބަލި ކޮންޓްރޯލް ކުރަން ދަތިތަކެއް ކުރިމަތިވެދާނެތީ، ޖަރުމަނުވިލާތް، ނެދެލޭންޑްސް އަދި އޮސްޓްރީއާ ފަދަ ގައުމުތަކުން ވަނީ ކްރިސްމަސްއާއި ދިމާކޮށް ލޮކްޑައުންއަކަށް ދާނެކަން ހާމަކޮށްފައެވެ.

އިޓަލީއަކީ މުޅި ދުނިޔެއިން 8 ވަނައަށް އެންމެ ގިނަ ކޮވިޑް ބަލި މީހުން ފެނިފައިވާ ގައުމެވެ. އެގޮތުން އެ ގައުމުން މިހާތަނަށް 1،938،083 މީހަކު ކޮވިޑަށް ޕޮޒިޓިވްވެފައިވާއިރު މި ބަލީގައި އެގައުމުން 68،447 މީހަކު ވަނީ މަރުވެފައެވެ.