އެއަރ ފްރާންސްގެ ދަތުރުތައް އަލުން ރާއްޖެއަށް ފަށައިފި
އެއަރ ފްރާންސްގެ ދަތުރުތައް ފަށާފައި ވަނީ ޑިސެމްބަރ 19 ގައި
ބޯޑަރު ހުޅުވާލިފަހުން ރާއްޖެއައި އެއަރ ފްރާންސްގެ ފުރަތަމަ ފްލައިޓް ވެލާނާ އިންޓަނޭޝަނަލް އެއަރޕޯޓްގައި
ކޮވިޑް-19 ގެ ސަބަބުން ހުއްޓުމަކަށް އައި އެއަރ ފްރާންސްގެ ދަތުރުތައް އަލުން ރާއްޖެއަށް ފަށައިފިއެވެ.
ޑިސެމްބަރ 19 ވަނަ ދުވަހު އެއަރ ފްރާންސްގެ ފުރަތަމަ ދަތުރު ރާއްޖެއަށް ކޮށްފައިވާއިރު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނީ އެއަރ ފްރާންސް އިން ރާއްޖެއަށް ހަފްތާއަކު ތިން ދަތުރު ކުރާނެ ކަމަށެވެ. އެއަރ ފްރާންސްގެ ދަތުރުތައް އަލުން ފަށައި، ބޭއްވި ފުރަތަމަ ފްލައިޓްގައި 268 ފަސެންޖަރުން ރާއްޖެ އައިސްފައިވެއެވެ.
އެއަރ ފްރާންސްގެ ދަތުރުތައް ފެށުމާއި ގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމް ކުރެއްވި ޓުވީޓެއްގައި ވިދާޅުވީ 2019 ވަނަ އަހަރު ފަތުރުވެރިކަމުގެ ސިނާއަތުގެ 3.5 އިންސައްތަ ފްރާންސް މަރކެޓް ހިއްސާކޮށްފައިވާކަމަށެވެ. އެގޮތުން ފްރާންސުން 59,738 ފަތުރުވެރިން އެ އަހަރުގެ ތެރޭގައި ޒިޔާރަތްކޮށްފައިވާކަމަށް މިނިސްޓަރ ވިދާޅުވި އެވެ. މިނިސްޓަރ ވިދާޅުވިގޮތުގައި އެއަރ ފްރާންސްގެ ދަތުރުތައް އަލުން ރާއްޖެއަށް ފެށުމަކީ، ރާއްޖޭގެ ފަތުރުވެރިކަމުގެ ސިނާއަތް ރަނގަޅުވަމުން އަންނަ ކަމުގެ ހެއްކެއް ކަމަށެވެ.
މިހާރު ރާއްޖެއަށް 19 އިންޓަނޭޝަނަލް އެއަރލައިނަކުން ދަތުރުތައް ކުރާއިރު، ކުރިއަށް އޮތްތާގައިވެސް ގިނަ އަދަދެއްގެ އެއަރލައިންތަކުން ރާއްޖެއަށް ދަތުރުތައް ފަށަން ހަމަޖެހިފައިވާ ކަމަށް އެމްއޭސީއެލް އިން ބުނެއެވެ. އެގޮތުން ފެބްރުއަރީ މަހާއި ހަމައަށް އިތުރު 13 އެއަރލައިނަކުން ރާއްޖެއަށް ދަތުރުތައް ފަށާނެކަމަށް އެމްއޭސީއެލް އިން ބުނެއެވެ.
ކޮވިޑް-19 ގެ ސަބަބުން މާޗް 27 ގައި ރާއްޖޭގެ ބޯޑަރު ބަންދުކޮށްފައިވާއިރު، އަލުން ބޯޑަރު ހުޅުވާލާފައި ވަނީ ޖުލައި 15 ވަނަ ދުވަހުއެވެ. އެއާއި އެކު ރާއްޖެ އަންނަ ފަތުރުވެރިންގެ އަދަދު މަޑުމަޑުން އިތުރުވާން ފަށާފައިވާއިރު، ބޯޑަރު ހުޅުވާލިފަހުން ރާއްޖެއައި ފަތުރުވެރިންގެ އަދަދު ވަނީ އެއް ލައްކަ އަށް ވުރެ މައްޗަށް އަރާފައެވެ. އަދި މިއަހަރު މުޅި ޖުމްލަ ރާއްޖެއަށް އައި ފަތުރުވެރިންގެ އަދަދު ފަސް ލައްކައަށް ވުރެ މައްޗަށް އަރާފައިވާއިރު، އަހަރުގެ ބާކީއޮތް ދުވަސްތަކުގައި ގިނަ އަދަދެއްގެ ފަތުރުވެރިން ރާއްޖެ އަންނާނެ ކަމަށް ކަމާބެހޭ މާހިރުން ލަފާކުރެއެވެ.
ރާއްޖޭގެ ބޯޑަރު އަލުން ހުޅުވާލިފަހުން ރާއްޖެއަށް ފަތުރުވެރިން އެންމެ ގިނައިން އަންނަ 10 ގައުމުގެ ތެރޭގައި ފްރާންސް ހިމެނޭއިރު، ޑިސެމްބަރ 16 ވަނަ ދުވަހުގެ ނިޔަލަށް އެގައުމުން 3,109 ފަތުރުވެރިން ވަނީ ރާއްޖެ އައިސްފައެވެ.
