ބަލިމަޑުކަމަށްފަހު އިތުރު އައު މާކެޓްތަކަށް ފުރުސަތު ހުޅުވިގެން ހިނގައްޖެ - ތޮއްޔިބު

ކޮވިޑް-19 ބަލިމަޑުކަމާއިއެކު ރާއްޖޭގެ ފަތުރުވެރިކަމަށް ގިނަ ގޮންޖެހުންތަކަކާއި ކުރިމަތިލާން ޖެހުނު ނަމަވެސް ބަލިމަޑުކަމަށްފަހު ރާއްޖޭގެ ފަތުރުވެރިކަމުގެ ސިނާއަތަށް އައު މާކެޓްތަކެއްވެސް ލިބިގެން ގޮސްފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ މެނޭޖިން ޑިރެކްޓަރ ތޮއްޔިބު މުހައްމަދު ވިދާޅުވެއްޖެއެވެ.

ރާއްޖެޓީވީއަށް ދެއްވި އިންޓަވިއުއެއްގައި ތޮއްޔިބު ވިދާޅުވީ، މިފަދަ ކާރިސާތަކާއި ނުވަތަ ހާދިސާތަކާއި ކުރިމަތިވުމުން މިފަދަ ހާލަތްތަކުގައި ލިބިދާނެ ކާމިޔާބީތަކާއި މެދުވެސް ވިސްނަންވާނެ ކަމަށެވެ. އެގޮތުން ކޮވިޑްގެ ބަލިމަޑުކަމަށްފަހު ރާއްޖޭގެ ފަތުރުވެރިކަމަށް ކާމިޔާބީތަކެއް ލިބުނުކަން ފާހަގަކޮށް ތޮއްޔިބު ވަނީ ބަލިމަޑުކަމުގެ ސަބަބުން ރާއްޖޭގެ ކީ މާކެޓުތައް ބަންދުވުމާއިއެކު މިހާރު މުޅިން އައު މާކެޓްތަކުން ރާއްޖެއަށް ފަތުރުވެރިން އަންނަ ފަށާފައިވާކަން ފާހަގަކޮށްފައެވެ.

ބޯޑަރު ހުޅުވާލިފަހުން ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ ގައުމުކަށް ރަޝިއާ ވެފައިވާއިރު، ރަޝިއާގެ އިތުރަށް ތަޖިކިސްތާން ފަދަ ގައުމުތަކަކީ މިހާރު ރާއްޖޭގެ ފަތުރުވެރިކަމުގެ މުހިންމު މާކެޓްތަކަށް ވެފައިވާކަމަށް ތޮއްޔިބު ފާހަގަކުރެއްވިއެވެ. އަދި ޔޫރަޕްގެ ގައުމުތަކުން އަންނަ ފަތުރުވެރިންގެ އަދަދު މަދު ނަމަވެސް ރާއްޖޭގެ ފަތުރުވެރިކަން ކުރިއަރަމުންދާ ކަމަށާއި ޔޫއޭއީ ފަދަ އަރަބި ގައުމުތަކުން ރާއްޖެ އަންނަ ފަތުރުވެރިންގެ އަދަދުވެސް ދަނީ އިތުރުވަމުން ކަމަށް ތޮއްޔިބު ވިދާޅުވިއެވެ.

ތޮއްޔިބު ވަނީ މިބަލިމަޑުކަމުން އަރަގަތުމުގެ އުންމީދު އެބައޮތް ކަމަށާއި މާގިނަ ދުވަސްތަކެއް ނުވެ މި އަޑިގަޑުން އަރައިގަނެވޭނެކަމުގެ އުއްމީދު އޮތްކަމަށް ވިދާޅުވެފަ އެވެ. ޖުލައި 15 ގައި ރާއްޖޭގެ ބޯޑަރު ހުޅުވާލެވުން އެއީ ރާއްޖޭގެ ފަތުރުވެރިކަން ކުރިއަރައިގެން ދިއުމުގެ ފެށުން ކަމަށާއި މިހާރު ރާއްޖެ އަންނަ ފަތުރުވެރިންގެ އަދަދު އަންނަނީ އިތުރުވަމުން ކަމަށް ތޮއްޔިބު ވިދާޅުވިއެވެ.

ރާއްޖޭގެ ބޯޑަރު އަލުން ހުޅުވާލިފަހުން ޑިސެމްބަރ 16 ވަނަ ދުވަހުގެ ނިޔަލަށް 23,226 ފަތުރުވެރިން ވަނީ ރަޝިއާއިން ރާއްޖެ އައިސްފައެވެ. މިއީ މިހާރު ރާއްޖެ އަންނަ ފަތުރުވެރިންގެ 20.1 އިންސައްތައެވެ. އަދި މިއަހަރުގެ މިހާތަނަށް ރާއްޖެއައި ޖުމްލަ ފަތުރުވެރިންގެ ތެރެއިން އެންމެ ގިނަ އަދަދެއްގެ ފަތުރުވެރިން އައިސްފައިވާ ގައުމަށް ރަޝިއާވެފައިވާއިރު، އެގައުމުން ރާއްޖެއައި ޖުމްލަ ފަތުރުވެރިންގެ އަދަދަ ވަނީ 46,065 އަށް އަރާފައެވެ.