ސައުދީގައި ކޮވިޑް-19 އަށް ވެކްސިން ޖަހަން ފަށައިފި

ސައުދީ އަރައްބިއްޔާއަށް ވެކްސިންގެ ފުރަތަމަ ޝިޕްމެންޓް ލިބުމާއިއެކު އެގައުމުގެ ރައްޔިތުންނަށް ވެކްސިންދޭން ފަށައިފިއެވެ.

އެމެރިކާގެ ފާމަސޫޓިކަލް ކުންފުނި ފައިޒަރ އަދި ޖަރުމަނުގެ ކުންފުނި ބައޯއެންޓެކް އިން ކޮވިޑް-19 އަށް އުފައްދާފައިވާ ވެކްސިންނަށް ސައުދީ އިިން ހުއްދަދީފައިވާއިރު، އެގައުމުގައި ރައްޔިތުންނަށް ވެކްސިން ދޭން ފަށާފައި މިވަނީ ބުރާސްފަތި ދުވަހުއެވެ.

ބުދަ ދުވަހު ސައުދީއަށް ފައިޒަރ ވެކްސިިންގެ ފުރަތަމަ ޝިޕްމެންޓް ލިބިފައިވާއިރު، އެގައުމުގައި ދިރިއުޅޭ ރައްޔިތުންގެ ތެރެއިން ވެކްސިން ޖަހަން ބޭނުންވާ ފަރާތްތައް ވެކްސިން ޖެހުމަށް ރަޖިސްޓްރީވުމަށް ހުޅުވާލާފައި ވަނީ އަންގާރަ ދުވަހުއެވެ. އެގޮތުން މޯބައިލް އެޕްލިކޭޝަން، ސިއްހަތީ މެދުވެރިކޮށް އެގައުމުގައި ދިރިއުޅޭ ރައްޔިތުންނަށް ވެކްސިންޖަހަން ރަޖިސްޓްރީވެވޭ އިރު، ރަޖިސްޓްރީ ވުމަށް ހުޅުވާލި ފުރަތަމަ ގަޑިއިރުގެ ތެރޭގައި 100،000 އަށްވުރެ ގިނަ މީހުން ރަޖިސްޓްރީވެފައިވާ ކަމަށް އެގައުމުން ބުނެއެވެ.

ތިން މަރުހަލާއަކަށް ބަހާލައިގެން ސައުދީގައި ވެކްސިން ދިނުމުގެ ކަންތައްތައް ކުރިއަށް ގެންދިއުމަށް ހަމަޖެހިފައިވާއިރު، ފުރަތަމަ މަރުހަލާގެ ދަށުން ވެކްސިން ދިނުމުގައި އިސްކަން ދޭނީ ހައިރިސްކް ކެޓަގަރީގެ މީހުންނާއި އުމުރުން 65 އަހަރުން މަތީގެ މީހުންގެ އިތުރުން އުމުރުން 40 އަހަރުން މަތީގެ މީހުންގެ ތެރެއިން ބޯޑީ މާސް އިންޑެކްސް މަތި މީހުންނާއި ބަރުދަން އިތުރުވުމުގެ މައްސަލަ ދިމާވެފައިވާ މީހުން އަދި ފްރަންޓްލައިންގައި މަސައްކަތްކުރާ ފަރާތްތަކަށް ކަމަށް ސައުދީ ސަރުކާރުން ބުނެއެވެ.

މީގެ އިތުރުން ހަށިގަނޑުގެ ގުނަވަނެއް ބަދަލުކުރުމަށް ސާޖަރީކޮށްފައިވާ ފަރާތްތަކާއި ދާއިމީ ބަލިތަކަށް ފަރުވާ ހޯދަމުންދާ ފަރާތްތަކަށާއި ސްޓްރޯކެއް ޖެހިފައިވާ މީހުންނަށް އިސްކަންދެވޭނެ ކަމަށް ސައުދީ ސަރުކާރުން ބުނެއެވެ.

ސައުދީ ސަރުކާރުން ބުނީ ދެވަނަ މަރުހަލާގެ ދަށުން ވެކްސިން ދިނުމުގައި އިސްކަންދޭނީ އުމުރުން 50 އަހަރުން މަތީގެ މީހުންނަށާއި ދާއިމީ ބަލިތަކަށާއި ކެންސަރަށް ފަރުވާހޯދަމުންދާ ފަރާތްތަކަށާއި ފުރަތަމަ ބުރުގެ ދަށުން ވެކްސިން ދެވިފައިނުވާ ސިއްހީ އެހީތެރިންނަށް ކަމަށެވެ. ތިންވަނަ މަރުހަލާގެ ދަށުން ސައުދީ ސަރުކާރުން ވެކްސިން ދޭން ނިންމާފައި ވަނީ ފުރަތަމަ ދެ މަރުހަލާގައި ވެކްސިން ޖަހާފައިނުވާ ފަރާތްތަކުގެ ތެރެއިން ވެކްސިން ޖަހަން ބޭނުންވާ ފަރާތްތަކަށެވެ.