ވެސްޓް ބްރޮމުގެ ކޯޗުގެ މަގާމުން ބިލިޗް ވަކިކޮށްފި

އިނގިރޭސި ޕްރިމިއާ ލީގުގެ ރެލިގޭޝަން ޒޯނުގައި އޮތް ވެސްޓް ބްރޮމުގެ ކޯޗުގެ މަގާމުން ކްރޮއޭޝިއާގެ ސްލަވެން ބިލިޗް ވަކިކޮށްފިއެވެ.

ވެސްޓް ބްރޮމުން ބިލިޗް ވަކިކުރިއިރު، އެ ޓީމު އޮތީ ތާވަލުގެ ފުލުން ދެވަނައިގައި 13 މެޗުން ހަތް ޕޮއިންޓާއެކުއެވެ. ބިލިޗުގެ އިރުޝާދުގެ ދަށުން ކުޅުނު ވެސްޓް ބްރޮމުން މިހާތަނަށް ވަނީ މި ސީޒަނުގައި އަށް މެޗުން ބަލިވެފައެވެ. އެކަމަކު އަންގާރަ ދުވަހުގެރޭ އެ ޓީމުން ވަނީ ވަރުގަދަ މެންޗެސްޓާ ސިޓީއާ 1-1 ން އެއްވަރުކޮށްފައެވެ. އަދި އެ މެޗަށްފަހު ބިލިޗް ވަނީ އެ ކުލަބުގެ ބޯޑުގެ ކޮންމެ ނިންމުމަކަށްވެސް އިޙުތިރާމުކުރާނެ ކަމަށް ބުނެފައެވެ.

ބުދަ ދުވަހުގެ ވަގުތެއްގައި ބިލިޗާއި އޭނާގެ ކޯޗިންގ ޓީމު އެއްކޮށް މަގާމުން ވަކިކުރިކަން ވެސްޓް ބްރޮމުން އިއުލާން ކުރިއިރު، އެ ކުލަބުން ނެރުނު ބަޔާނެއްގައި ވަނީ މިހާތަނަށް ބިލިޗް ވެސްޓް ބްރޮމަށް ކޮށްދިން ޚިދުމަތުގެ އަގުވަޒަންކޮށް އޭނާއަށް ޝުކުރުއަދާކޮށްފައެވެ.

މީގެ ކުރިން ކްރޮއޭޝިއާގެ ގައުމީ ފުޓްބޯޅަ ޓީމަށްވެސް އިރުޝާދުދިން އުމުރުން 52 އަހަރުގެ ބިލިޗް ވެސްޓް ބްރޮމާ ހަވާލުވީ ދެ އަހަރުގެ އެއްބަސްވުމެއްގެ ދަށުން މިދިޔަ އަހަރުގެ ޖޫން މަހުގެ ތެރޭގައެވެ. މިދިޔަ ސީޒަނުގައި އިނގިރޭސި ދެވަނަ ޑިވިޝަން (އީއެފްއެލް ޗެމްޕިއަންޝިޕް) ގައި ވެސްޓް ބްރޮމް ވާދަކުރިއިރު، އެ ޓީމު އަލުން ޕްރިމިއާ ލީގަށް ޕްރޮމޯޓުވީ ބިލިޗުގެ ކޯޗުކަމުގައެވެ.

ވެސްޓް ބްރޮމުގެ ކޯޗުގެ މަގާމުން ބިލިޗް ވަކިކުރިއިރު، ލީގުގައި ދެން އެ ޓީމުން މެޗެއް ކުޅޭނީ އަންނަ އާދީއްތަ ދުވަހުގެރެއެވެ. އެރޭ އަމިއްލަ ދަނޑުގައި ވެސްޓް ބްރޮމް ނުކުންނާނީ އެސްޓަން ވިލާއާ ދެކޮޅަށެވެ.