ސިފައިންނަށް ކުރިއެރުން ލިބޭނީ ބުރަ މަސައްކަތުން ނަތީޖާ ނެރިގެން - ޑިފެންސް މިނިސްޓަރ
ސިފައިންގެ 66 ވަނަ އަސާސީ ޓްރެއިނިންގ ނިންމައި 97 ސިފައިން ވަނީ ހިދްމަތާ ގުޅިފައި
ސިފައިންގެ 66 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވުމަށް ޑިފެންސް މިނިސްޓަރ މާރިޔާ ވަޑައިގަންނަވަނީ
ދިވެހި ސިފައިންނަށް ކުރިއެރުން ހާސިލްކުރެވޭނީ، ތިމާގެ ހިތްވަރާއި ފަންވަރާއި މަސައްކަތުން ނަތީޖާ ނެރެގެން ކަމަށް ޑިފެންސް މިނިސްޓަރު މާރިޔާ އަހުމަދުދީދީ ވިދާޅުވެއްޖެއެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ 66 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުން ޑިފެންސް މިނިސްޓަރ މާރިޔާ ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ ވޭތުވެދިޔަ ދެ އަހަރުގެ ތެރޭގައި ސިޔާސީ ނުފޫޒުން ދިވެހި ސިފައިންގެ މުއައްސަސާ އެއްކިބާ ކުރުމަށް ކުރި މަސައްކަތުގެ ނަތީޖާއެއްގެ ގޮތުން މިއަދު ސިފައިންގެ ކޮންމެ މީހަކަށްވެސް ތިމާގެ ގާބިލްކަމާއި ބުރަ މަސައްކަތުން ނަތީޖާ ނެރެ އެކަން ސާބިތު ކޮށްދީފިނަމަ އެ އޮންނަ އުސޫލުގެ ތެރެއިން ކުރިއެރުން ހާސިލް ކުރެވޭނެ ކަމަށެވެ.
ހަމައެފަދައިން ސިފައިންގެ ބަދަހި ސަފުތަކާއި ގުޅިހެން، ރައްޔިތުންނާއި ގާތުން ހިދުމަތް ދިނުމުގައި ހަރަކާތްތެރިވާއިރު، އެއްވެސް ތަފާތެއްނެތި ހަމަހަމަކަމާއި އެކު ހިދުމަތް ދިނުމަށް ކޮންމެ ސިފައިންގެ މީހަކު ވެސް އިސްކަން ދޭންޖެހޭނެ ކަމަށް ވެސް މާރިޔާ ވިދާޅުވިއެވެ.
އަންގާރަ ދުވަހު، ސިފައިންގެ 66 ވަނަ އަސާސީ ތަމްރީން ކޯހުގެ ދަސްވެނިވުމުގެ ރަސްމިއްޔާތު ބާއްވާފައި ވަނީ ޅ. މާފިލާފުށީގައި ގާއިމުކޮށްފައިވާ އެމްއެންޑީއެފްގެ ބޭސިކް ޓްރެއިނިންގ ސްކޫލްގައެވެ. މިއީ އެ ޓްރެއިންނިންގ ސެންޓަރުގައި މިފަދަ ރަސްމިއްޔާތެއް ބޭއްވި ފުރަތަމަ ފަހަރެވެ. ސިފައިންގެ 66 ވަނަ އަސާސީ ތަމްރީނު ކޯސް ފުރިހަމަކޮށް 97 ސިފައިން ވަނީ ސިފައިންގެ ޚިދުމަތާ ގުޅިފައެވެ. މީގެ ތެރޭގައި 17 އަންހެން ސިފައިންނާއި 80 ފިރިހެން ސިފައިން ހިމެނެއެވެ.
މީގެކުރިން ސަފައިންގެ އަސާސީ ތަމްރީން ނިންމައި، ދަސްވެނިވުމުގެ ރަސްމިއްޔާތުގައި އެ ޓްރެނިންގއެއްގައި ބައިވެރިވާ ސިފައިންގެ އާއިލާތައް ބައިވެރި ކުރި ނަމަވެސް، ކޮވިޑް-19 ހާލަތާއި ގުޅިގެން މިފަހަރު ޓްރެއިނިންގ ހެދި ސިފައިންގެ އާއިލާތައް ބައިވެރިކޮށްފައެއް ނުވެއެވެ. އެހެންނަމަވެސް އެ އިވެންޓް ވަނީ ރާއްޖެޓީވީ މެދުވެރިކޮށް، ލައިވް ކޮށްފައެވެ.
މި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަތީފާއި، ކޮލެޖް އޮފް ޑިފެންސް އެންޑް ސެކިއުރިޓީ ސްޓަޑީސް (ސީޑީއެސްއެސް) ގެ ޖެނެރަލް އޮފިސަރ ކޮމާންޑިންގ ބްރިގޭޑިއަރ ޖެނެރަލް ވައިސް ވަހީދު އާއި އެމްއެންޑީއެފްގެ ޖެނެރަލް އޮފިސަރުންގެ އިތުރުން ނޯދަން އޭރިޔާ ކޮމާންޑަރ ކާނަލް އިސްމާއީލް ޝަރީފް ބައިވެރިވެވަޑައިގެންނެވިއެވެ.
