ދައުލަތުގެ ޕްރޮކިއުމެންޓް ނިޒާމު ހަރުދަނާކޮށް ބަނޑޭރި ޕޯޓަލްގައި ރަޖިސްޓްރީވުމަށް ހުޅުވާލައިފި
މި ޕޯޓަލް މެދުވެރިކޮށް މައުލޫމާތު ބަދަލުކޮށް، މަސައްކަތާއި ގުޅިގެން އުފެދޭ ސުވާލުތައްކޮށް، އެފަދަ ސުވާލުތަކަށް ޖަވާބުލިބިގެންދާނެ
ފިނޭންސް މިިނިސްޓްރީ
ދައުލަތުގެ ޕްރޮކިއުމެންޓް ނިޒާމު ހަރުދަނާކުރުމަށްޓަކައި ފިނޭންސް މިނިސްޓްރީން ކުރަމުންދާ މަސައްކަތުގެ ތެރެއިން އެ މިނިސްޓްރީގެ ބަނޑޭރިޕޯޓަލްގައި "ގަވަރމަންޓް ޕްރޮކިއުމަންޓް ޕްރޮފެޝަނަލްސް ނެޓްވަރކް"ގެ ނަމުގައި ނޮލެޖް ޕޯޓަލްއެއް ގާއިމުކޮށް ރަޖިސްޓްރީވުމަށް ހުޅުވާލައިފިއެވެ.
އެގޮތުން ފިނޭންސް މިނިސްޓްރީން އާންމުކޮށްފައިވާސާކިއުލާއެއްގައިބުނީ ޕްރޮކިއުމަންޓްގެ މަސައްކަތްތަކުގައި އުޅޭ ހުރިހާ މުވައްޒަފުންނަށް ހާއްސަކޮށްގެން ގާއިމުކުރެވުނު މި ޕޯޓަލް މެދުވެރިކޮށް މައުލޫމާތު ބަދަލުކޮށް، މަސައްކަތާއި ގުޅިގެން އުފެދޭ ސުވާލުތައްކޮށް، އެފަދަ ސުވާލުތަކަށް ޖަވާބުލިބިގެންދާނެ އިންތިޒާމު ހަމަޖެހިފައިވާނެ ކަމަށެވެ.
އެހެންކަމުން ޕްރޮކިއުމަންޓްގެ މަސައްކަތްތަކުގައި އުޅޭ ހުރިހާ މުވައްޒަފުން ޕްރޮކިއުމަންޓް އާއި ގުޅިގެން ކުރަންބޭނުންވާ ސުވާލުތައް ކުރުމުގައި އާއި، އަދި ޕްރޮކިއުމަންޓް އާއި ގުޅޭ އިތުރު މައުލޫމާތު ހޯދުމަށް މި އެ ޕޯޓަލް ބޭނުންކުރުމަށް ފިނޭންސް މިނިސްޓްރީން ބާރު އަޅައެވެ.
މީގެ އިތުރުން ދައުލަތުގެ މާލިއްޔަތު ގަވާއިދުގެ 10.67 ގެ (ށ) ގެ ދަށުން 15 ފަނަރަ އިންސައްތައަށް ވުރެ އިތުރަށް އެޑްވާންސްގެ ގޮތުގައި ފައިސާ ދިނުމުގައާއި، އެ މާއްދާގެ (ނ) ގައި ބަޔާންކުރާ އެއްފަހަރާ ފައިސާ ދައްކައިގެން ނޫނީ ލިބެން ނެތް މުދަލާއި ހިދުމަތުގެ އަގު 35,000 ރުފިޔާއަށް ވުރެ އިތުރުވާނަމަ، އެ ފައިސާ އެއްފަހަރާ ދޫކުރުމުގެ ކުރިން މިނިސްޓްރީގެ ހުއްދަ ހޯދަން ބަނޑޭރިޕޯރޓަލް މެދުވެރިކޮށް ހުށަހަޅަން ޖެހޭނެކަމަށް ފިނޭންސުން ބުނެއެވެ.
ފީނޭންސް މިނިސްޓްރީން ވަނީ ދައުލަތުގެ މާލިއްޔަތުގެ ގަވާއިދުގެ 10.53 ވަނަ މާއްދާގައި ބަޔާންކޮށްފައިވާ މައުލޫމާތު ހާމަކުރުމުގެގޮތުން، ސަރުކާރުގެ އޮފީސްތަކުންނާއި، މިނިވަން މުއައްސަސާތަކުން ކުރިއަށްގެންދާ ޕްރޮކިއުމަންޓަކީ މާލިއްޔަތުގެ ގަވާއިދުގެ ބާބު 10 ގެ ޖަދުވަލު 1 ގެ 3 ވަނަ ނަންބަރުގައި ބަޔާންކޮށްފައިވާ އަގުގެ ޕްރޮކިއުމަންޓެއް ކަމަށްވާނަމަ އެފަދަ ޕްރޮކިއުމަންޓްތައް އެވޯޑްކޮށްފައިވާ ފަރާތުގެ މައުލޫމާތު، އެ ޕްރޮކިއުމަންޓެއް އެވޯޑްކުރެވުނު ތާރީހުން ފެށިގެން ސަރުކާރު ބަންދުނޫން ފަސް ދުވަހުގެ ތެރޭގައި ދިވެހި ސަރުކާރުގެ ގެޒެޓްގައި ޝާއިއުކުރަން ވާނެކަމަށް ބުނެފައެވެ.
އަދި ސަރުކާރުގެ އޮފީސްތަކުންނާއި، މިނިވަން މުޢައްޞަޞާތަކުން ކުރިއަށް ގެންދާ ޕްރޮކިއުމަންޓަކީ މާލިއްޔަތުގެ ގަވާއިދުގެ ބާބު 10 ގެ ޖަދުވަލު 1 ގެ 1 އަދި 2 ވަނަ ނަންބަރުގައި ބަޔާންކޮށްފައިވާ އަގުގެ ޕްރޮކިއުމަންޓެއް ނަމަ ކޮންމެ މަހެއްގައި އެފަދަ ޕްރޮކިއުމަންޓްތައް އެވޯޑްކޮށްފައިވާ ފަރާތުގެ މައުލޫމާތުވެސް، ދެން ފެށޭ މަހުގެ 10 ވަނަ ދުވަހުގެ ކުރިން ދިވެހި ސަރުކާރުގެ ގެޒެޓްގައި ޝާއިޢުކުރަން ޖެހޭނެ ކަމަށް ފިނޭންސް މިނިސްޓްރީން ބުނެއެވެ.
ދައުލަތުގެ މާލިއްޔަތުގެ ގަވާއިދުގެ 10.13 ވަނަ މާއްދާގެ ދަށުން ދައުލަތުގެ އޮފީސްތަކުގައި ގާއިމްކޮށްފައިވާ ބިޑް ކޮމިޓީތަކުގެ މައުލޫމާތު 31 ޑިސެންބަރު 2020 ވާ ބުރާސްފަތި ދުވަހުގެ 14:00 ގެ ކުރިން ފިނޭންސް މިނިސްޓްރީއަށް ހުށަހެޅުމަށް އެމިނިސްޓްރީން ވަނީ އަންގާފައެވެ. އެގޮތުން ބަނޑޭރި ޕޯޓަލް ބޭނުންކުރާ ހުރިހާ އޮފީސްތަކުން ބިޑް ކޮމިޓީގެ މެންބަރުންގެ މައުލޫމާތު އެ ޕޯޓަލްގެ މެދުވެރިކޮށް ހުށަހެޅުމަށް އަދި، ބަޑޭރި ޕޯޓަލް ބޭނުންނުކުރާ އޮފީސްތަކުން އެ އޮފީސްތަކުގެ މެންބަރުންގެ ދަފުތަރު ފުރިހަމަކުރެއްވުމަށްފަހު procurementinfo@finance.gov.mv އަށް ފޮނުއްވުމަށް މިނިސްޓްރީން ވަނީ އަންގާފައެވެ.
