ޔުވެންޓަސްއިން އައު އެއްބަސްވުމެއް ހުށަހަޅާފައެއް ނުވޭ: ޑިބާލާ

ޔުވެންޓަސްއިން އައު އެއްބަސްވުމެއް ހުށަހަޅާފައި ނުވާ ކަމަށް އެ ޓީމަށް ކުޅެމުން އަން އާޖެންޓީނާގެ ފޯވާޑް ޕައުލޯ ޑިބާލާ ބުނެފިއެވެ.

އުމުރުން 27 އަހަރުގެ ޑިބާލާ ޔުވެންޓަސްއާއެކު މިހާރު ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، ޔުވެންޓަސްއިން އަންނަނީ އޭނާގެ އެއްބަސްވުން އާކުރުމަށް މަސައްކަތް ކުރަމުންނެވެ.

އެގޮތުން ދާދި ފަހުން ޔުވެންޓަސްގެ ރައީސް އަދްރެއާ އަގްނެލީ ވަނީ ޑިބާލާއަށް އައު އެއްބަސްވުމެއް ހުށަހަޅާފައިވާ ކަމަށާއި، މިހާރު މަޑުކުރަނީ ޑިބާލާގެ ޖަވާބަކަށް ކަމަށް ވިދާޅުވެފައެވެ. އަދި އައު އެއްބަސްވުމާއެކު ޔޫރަޕުގައި އެންމެ ބޮޑު މުސާރައެއް ދޭ 20 ކުޅުންތެރިންގެ ތެރޭގައި ޑިބާލާ ހިމެނޭނެ ކަމަށްވެސް ވިދާޅުވިއެވެ.

އެކަމަކު އެ ވާހަކަތަކަށް ރައްދު ދެމުން ޑިބާލާ ބުނީ އޭނާގެ އެއްބަސްވުމާ ގުޅޭ ގޮތުން ދޮގު މައުލޫމާތުތަކެއް މީޑިއާގައި ހިއްސާކޮށްފައިވާ ކަމަށެވެ. އެގޮތުން އޭނާގެ އޭޖެންޓް ވަރަށް ގިނަ ދުވަސް ވަންދެން ޓިއުރިންގައި ހުރި ކަމަށާއި، އެ މުއްދަތުގައިވެސް އެއްބަސްވުމާ ގުޅޭ ގޮތުން މަޝްވަރާ ކުރުމަށް ކުލަބުން އެއްވެސް މަސައްކަތެއް ކޮށްފައިނުވާ ކަމަށްވެސް ބުންޏެވެ. އެހެންކަމުން އަދި މިހާތަނަށް ޔުވެންޓަސްއިން އައު އެއްބަސްވުމެއް ހުށަހަޅާފައި ނުވާ ކަމަށްވެސް ޑިބާލާ ބުންޏެވެ.

ޔުވެންޓަސްގެ އައު ކޯޗު އަންދްރެއާ ޕިރްލޯގެ ކޯޗުކަމުގައި ޑިބާލާއަށް ފުރުސަތު ލިބުން މަދުވެފައިވީ ނަމަވެސް، މީގެ ކުރިން ޕިރްލޯ ބުނީ ޑިބާލާ އަކީ ޔުވެންޓަސްގެ ކުރިމަގާ ގުޅިފައިވާ ކުޅުންތެރިއެއް ކަމަށާއި، ޔުވެންޓަސްއިން އޭނާ ވިއްކާ ނުލާނެ ކަމަށެވެ. އަދި ބުނީ ޔުވެންޓަސްއިން ޑިބާލާ ވިއްކާލަން އުޅޭ ކަމަށް ބުނެ ދެކެވެމުން އަންނަ ވާހަކަތަކަކީ ކަނޑައެޅިގެން ހަގީގަތާއި ޚިލާފު ވާހަކަތަކެއް ކަމަށާއި، އެއީ ހަގީގަތް އޮޅުވާލުމަށް މީހުން ދައްކަމުން އަންނަ ވާހަކަތަކެއް ކަމަށެވެ.

މީގެ ކުރިން ޕަލޭމޯއަށްވެސް ކުޅުނު ޑިބާލާ ޔުވެންޓަސްއާ ގުޅުނީ 2015 ވަނަ އަހަރުއެވެ. އޭގެ ފަހުން އޭނާ ވަނީ މިހާތަމަށް ޔުވެންޓަސްއަށް ކުޅެދިން 240 މެޗުގައި 97 ލަނޑު ޖަހާފައެވެ. އަދި ވަނީ ޔުވެންޓަސްއާއެކު އިޓާލިއަން ލީގު ފަސް ފަހަރު އަދި އިޓާލިއަން ކަޕް ތިން ފަހަރު ކާމިޔާބުކޮށްފައެވެ.