ކުރި އަރަމުން އަންނަ ޓުއަރިޒަމް އިންޑަސްޓްރީއާ އެކު އެކައުންޓެންޓުންނަށް ވެސް ގިނަ ފުރުސަތުތަކެއް

ރާއްޖޭގައި ކުރިއަރަމުން އަންނަ ފަތުރުވެރިކަމުގެ ސިނާއަތާއި އެކު އެކައުންޓެންޓުންނަށް ގިނަ ފުރުސަތުތަކެއް ފަހި ވެގެންދާނެ ކަމަށް އިންސްޓިޓިއުޓް އޮފް ޗަރޓަރޑް އެކައުންޓެންޓްސް އޮފް ދި މޯލްޑިވްސްގެ ނައިބު ރައީސް ހަސަން އަހުމަދު ވިދާޅުވެއްޖެއެވެ.

ރާއްޖެޓީވީގެ 'ފަލަ ސުރުހީ' ޕްރޮގްރާމްގައި ވާހަކަދައްކަވަމުން ހަސަން އަހުމަދު ވަނީ އެކައުންޓިންގް ދާއިރާއިން ތައުލީމް ހާސިލު ކުރަމުންދާ ފަރާތްތަކަށް މުސްތަގުބަލުގައި އޮތް ފުރުސަތުތަކާއި ގުޅިގެން ވާހަކަދައްކަވާފައެވެ. އެގޮތުން އިގްތިސާދު ކުރިއަރަމުން އަންނަ ނިސްބަތަށް ބަލާއިރު، މި ދާއިރާއިން ތައުލީމު ހާސިލު ކުރަމުންދާ ފަރާތްތަކަށް ގިނަ ފުރުސަތުތަކެއް ހުޅުވިގެންދާނެ ކަން ފާހަގަކުރައްވާ އޭނާ ވިދާޅުވީ ކުރިއަށް އޮތް ތަނުގައި މިދާއިރާއަށް އޮންނަ ޑިމާންޑް އިތުރުވެގެންދާނެ ކަމަށެވެ.

މީރާގެ ބައެއް ތަފާސްހިސާބުތަކަށް އިޝާރާތް ކުރައްވާ ހަސަން އަހުމަދު ވިދާޅުވީ ރާއްޖޭގައި އެންމެ ބޮޑު އާމްދަނީތައް ލިބޭ ފަރާތްތަކުގެ ތެރޭގައި އެކައުންޓެންޓުން ހިމެނޭ ކަމަށެވެ. އަދި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ ތެރެއިން އެންމެ ބޮޑު އާމްދަނީ ލިބޭ ފަރާތްތަކުގެ ތެރޭގައި ވެސް 'ޕްރޮފެޝަނަލީ ކޮލިފައިޑް' އެކައުންޓެންޓުން ހިމެނޭ ކަމަށެވެ.

އެހެންކަމުން، އެކައުންޓިންގް ދާއިރާއިން ތައުލީމު ހާސިލް ކުރަމުންދާ ފަރާތްތަކުން 'ޕްރޮފެޝަނަލް ކޮލިފިކޭޝަންތަކަށް' ފޯކަސްކޮށްގެން ކުރިއަށް ދިއުމަށް އޭނާ އިލްތިމާސްކުރެއްވިއެވެ. އޭނާ ވިދާޅުވީ ޕްރޮފެޝަނަލް އިންސްޓިޓިއުޝަންތަކުގެ މެމްބަރުންނަށް ވުމަކީ ވަރަށް މުހިއްމު ކަމެއް ކަމަށެވެ.