މަނަފަރު ރިސޯޓުގައި އަލިފާން ރޯވުން: އިންޖީނުގޭގައި ހުރި ޖަނަރޭޓަރާއި، ޕެނަލް ބޯޑު ވަނީ އަނދާފައި

ހއ މަނަފަރު ރިސޯޓުގައި އަލިފާން ރޯވެފައި ވަނީ، އެ ރިސޯޓުގެ އިންޖީނުގޭގައި އުސްކޮށް ހަދާފައިވާ މުދާ ރައްކާކުރާ ގުދަނެއްގައި ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.

އާދިއްތަ ދުވަހުގެރޭ ފަތިހު 4:30 ހާއިރު، ހިނގާފައިވާ މި ހާދިސާގެ މައުލޫމާތު ހިއްސާކުރަމުން އެމްއެންޑީއެފުން ބުނެފައި ވަނީ މަނަފަރު ރިސޯޓުގައި ހިނގި އަލިފާނުގެ ހާދިސާގައި އިންޖީނުގައި ހުރި ޖަނަރޭޓަރަކާއި ޕެނަލް ބޯޑަށް ގެއްލުން ލިބިފައިވާ ކަމަށެވެ. އަދި އަލިފާން ރޯވި އިމާރާތާއި ޖެހިގެން ހުރި އިމާރާތުގެ ފެން ޕްލާންޓަށްވެސް މި ހާދިސާގައި ގެއްލުން ލިބިފައިވާ ކަމަށް އެފަރާތުން މައުލޫމާތުދެއެވެ.

މީގެ އިތުރުން އެމްއެންޑީއެފުން ބުނީ މި ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާ ކަމަށާއި، އަލިފާނުގެ ހާދިސާ ރިޕޯޓު ކުރުމާއެކު އެމްއެންޑީއެފް ނޮދަން އޭރިއާގެ ކުޅުދުއްފުށި ފަޔަރ ސްޓޭޝަނުން ހަރަކާތްތެރިވެ ފަތިހު 5:45 ހާއިރު އަލިފާންގަނޑު ނިއްވާލާފައިވާ ކަމަށެވެ.

މަނަފަރުގައި ހިނގި އަލިފާނުގެ މި ހާދިސާގައި އެރަށުން ވަނީ އެއްކޮށް ކަރަންޓުގެ ހިދުމަތް ކެނޑިފައެވެ.