ކުރިއަށް އޮތް 17 ދުވަހު 50،000 ފަތުރުވެރިން ރާއްޖެ އަންނާނެ: އެމްއޭސީއެލް
12 ޑިސެމްބަރު 2020 | ހޮނިހިރު 07:35ހޮނިހިރު ދުވަހު އެއްލައްކަ ފަތުރުވެރިން ވަނީ ރާއްޖެ އައިސްފަ
ވެލާނާ އިންޓަނޭޝަނަލް އެއަރޕޯޓުން ރިސޯޓަށް ދިއުމަށް ފަތުރުވެރިން ފުރަނީ
މި މަސް ތެރޭގައި އިތުރު 50،000 ފަތުރުވެރިން ރާއްޖެ އަންނާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
ކޮވިޑް-19 އާއި ގުޅިގެން ރާއްޖޭގެ ބޯޑަރު ބަންދުކުރުމަށްފަހު، ޖުލައި މަހުގެ 15 ވަނަ ދުވަހު ބޯޑަރު އަލުން ހުޅުވާލުމާއެކު ހޮނިހިރު ދުވަހު ވަނީ ރާއްޖެއަށް އެއްލައްކަ ފަތުރުވެރިން ޒިޔާރަތްކޮށްފައެވެ.
ރާއްޖެއެމްވީއަށް މައުލޫމާތު ދެއްވަމުން އެމްއޭސީއެލްގެ ޖެނެރަލް މެނޭޖަރ ޓާމިނަލް އޮޕަރޭޝަންސް އިބްރާހީމް ހުސައިން ވިދާޅުވީ، ހޮނިހިރު ދުވަހަކީ ރެކޯޑް އަދަދަކަށް ފަތުރުވެރިން ރާއްޖެ ޒިޔާރަތްކޮށްފައިވާ ދުވަހެއް ކަމަށާއި، މި ދުވަހު އެކަނިވެސް 3800 އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކުރާނެ ކަމަށެވެ.
އިބްރާހީމް ހުސައިން ވިދާޅުވީ ގަތަރު އެއާވޭސް އިން ރާއެްޖެއާއި ދެމެދު މިހާތަނަށް ދުވާލަކަށް އެންމެ ފްލައިޓެއް އޮޕަރޭޓް ކުރަމުންދިޔަ ނަމަވެސް މި މަހުގެ 10 ވަނަ ދުވަހުން ފެށިގެން ކޮންމެ ދުވަހަކު އެ އެއަރލައިނުން ރާއްޖެއަށް ދެ ފްލަައިޓް އޮޕްރޭޓް ކުރަމުން އަންނަ ކަމަށެވެ. އަދި އެމިރޭޓްސް އިން ކޮންމެ ދުވަހަކު ދެ ފްލައިޓް އޮޕަރޭޓް ކުރަމުންގޮސް، މި މަހުގެ 10 އިން ފެށިގެން ކޮންމެ ދުވަހަކު 3 ފްލައިޓް ރާއްޖެއަށް ދަތުރުކުރަމުންދާ ކަމަށްވެސް އިބްރާހީމް ވިދާޅުވިއެވެ.
އެމްއޭސީއެލްގެ ތަފާސް ހިސާބުތަކަށް ބަލާއިރު، ފާއިތުވި ހުކުރު ދުވަހު އެކަނިވެސް އިންޓަނޭޝަނަލް 15 ފްލައިޓެއް ވަނީ އޮޕަރޭޓްކޮށްފައެވެ. އެގޮތުން ހުކުރު ދުވަހު 2516 ފަތުރުވެރިން ރާއްޖެ އައިސްފައިވާއިރު، 1649 ފަތުރުވެރިން ވަނީ އަނބުރާ ގައުމަށް ގޮސްފަ އެވެ.
ޑޮމެސްޓިކް ފްލައިޓުތަކުގެ ތަފާސް ހިސާބަށް ބަލާއިރު، ހުކުރު ދުވަހު 21 ފްލައިޓު ވަނީ އޮޕަރޭޓް ކޮށްފައެވެ. އެގޮތުން މޯލްޑިވިއަނުން 15 ފްލައިޓް، ފްލައިމީ އިން 4 އަދި މަންތާ އެއަރލައިނުން 2 ފްލައިޓް ވަނީ އޮޕަރޭޓްކޮށްފައެވެ. މީގެ އިތުރުން ހުކުރުދުވަހު 7 ޕްރައިވެޓް ޖެޓް ވަނީ ރާއްޖެއަށް އޮޕަރޭޓް ކޮށްފަ އެވެ.
