ޒިއޯން މޮބައިލްސްގެ ޚިދުމަތް ފުޅާކޮށް އިތުރު ފިހާރައެއް ހުޅުމާލޭގައި ހުޅުވައިފި

މޮބައިލް ފޯނުގެ ވިޔަފާރި ފުޅާދާއިރާއެއްގައި ކުރަމުން އަންނަ ޒިއޯން މޮބައިލްސްގެ ޚިދުމަތް އިތުރަށް ފުޅާކޮށް އިތުރު ފިހާރައެއް ހުޅުމާލޭގައި ހުޅުވައިފިއެވެ.

ހުކުރު ދުވަހުގެ ރޭ ބޭއްވި ރަސްމިއްޔާތެއްގައި މި ފިހާރަ ހުޅުވައިދެއްވީ ހުޅުމާލެ ދާއިރާގެ މެމްބަރު އަލީ ނިޔާޒުއެވެ.

ފިހާރަ ހުޅުވައިދެއްވުމުގެ ގޮތުން ވާހަކަދައްކަވަމުން އަލީ ނިޔާޒް ވިދާޅުވީ ފާއިތުވި ދެ ތިން އަހަރުދުވަހުގެ ތެރޭގައި ހުޅުމާލެއަށް ތަފާތު ވިޔަފާރިތައް ތަޢާރަފްވެގެން އަންނަކަމަށާއި, އެގޮތުން ކުރިއަރަމުން އަންނަ ވިޔަފާރިތަކުގެ ސަބަބުން ހުޅުމާލެ އިތުރަށް ތަރައްޤީވަމުން އަންނަކަމަށެވެ. އަދި މިފަދަ ފިހާރަތައް ހުޅުވިގެން ދިއުމުން ހުޅުމާލޭގައި ދިރިއުޅޭ ރައްޔިތުން މާލެ ނުގޮސް ޚިދުމަތް ހޯދޭނެ ފަސޭހަ ގޮތްތަކެއްވެސް ހަމަޖެހިގެންދާނެކަމަށް ވިދާޅުވިއެވެ.

"ޒިއޯން މޮބައިލްސް 5" ހުޅުމާލޭގައި ހުޅުވިގެންދިޔައިރު، މިއީ ޒިއޯން މޮބައިލްސްގެ ދަށުން ހުޅުވި 4 ވަނަ ޝޯވްރޫމެވެ. ޒިއޯން މޮބައިލްސްގެ ފަރާތުން ވާހަކަދައްކަވަމުން އިބްރާހިމް ހަމީޝް ވިދާޅުވީ، މިއީ މީގެ 6 އަހަރު ކުރިން ވަރަށް ކުޑަކޮށް ފެށި ވިޔަފާރިއެއް ނަމަވެސް، އެ ކުންފުނީގެ އަމާޒަކީ ކަސްޓަމަރުންނާއި ހަމައަށް ވީހާވެސް ރަނގަޅު ޚިދުމަތެއް ފޯރުކޮށްދިނުންކަމަށެވެ.

ހުޅުމާލޭގައި ދިރިއުޅޭ ރައްޔިތުންނަށް ޚާއްސަކޮށްގެން ހުޅުވި ފިހާރައިންވެސް އެންމެ ކުއަލިޓީ އުފެއްދުންތައް ކަސްޓަމަރުންނަށް ފޯރުކޮށްދޭނެކަމަށާއި ހުރިހާ ބްރޭންޑެއްގެ ފޯނުތަކާއި، އެކްސެސަރީސްތައް އިންޓަރނޭޝަނަލް އަދި ލޯކަލް ވޮރަންޓީއާއިއެކު ލިބެން ހުންނާނެކަމަށް ހަމީޝް ވިދާޅުވިއެވެ.

ވަކިން ހާއްސަކޮށް ޒިއޯންއިން ވިއްކާ އެޕަލްގެ އުފެއްދުންތަކަކީ މި ރީޖަންގެ އެޕަލް ކުންފުނިން ގެންނަ އުފެއްދުންތަކެއް ކަމަށާއި ރާއްޖޭގައި މިވަގުތު އެޕަލްގެ އުފެއްދުންތައް އެންމެ އަގުހެޔޮކޮށް ލިބޭނީވެސް ޒިއޯންގެ ފިހާރަތަކުންކަމަށް ހަމީޝް ވިދާޅުވިއެވެ.

ޒިއޯން މޮބައިލްސްގެ ފައުންޑަރ ރަފީއުއްދީން ނަސީމްއަކީ ރާއްޖޭގެ އެކި ކަންކޮޅުތަކުގައި ކޮމްޕިއުޓަރ ސައިންސް ދަރިވަރުންނަށް އުނގަންނައިދިނުމުގައި ވަރަށް ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ.