މޮޑާނާ ވެކްސިންގެ އިތުުރު 100 މިލިއަން ޑޯޒް އެމެރިކާ އަށް
މޮޑާނާ ވެކްސިންގެ 200 މިލިއަން ޑޯޒް އެމެރިކާއަށް ދޭނެ
ކޮވިޑް-19 އަށް ވެކްސިން އުފެއްދުމަށް މަސައްކަތްކުރަމުން އަންނަ މޮޑާނާގެ އޮފީހެއް
މޮޑާނާއިން ކޮވިޑް-19 އަށް އުފެއްދި ވެކްސިން އިތުރު 100 މިލިއަން ޑޯޒް އެމެރިކާއަށް ކަނޑައަޅާފައިވާ ކަމަށާއި އަންނަ އަހަރުގެ ދެވަނަ ކުއަރޓަރގައި މިޑޯޒްތައް ފޯރުކޮށްދެވޭ ވަރު ވާނެ ކަމަށް މޮޑާނާއިން ބުނެފިއެވެ.
މޮޑާނާގެ ވެކްސިން ބޭނުންކުރުމުގެ ހުއްދަ ދިނުމާމެދު އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ)އިން އަންނަ ހަފްތާގައި ގޮތެއް ނިންމާނެއެވެ. މޮޑާނާއިން އިތުރު ޑޯޒް އެމެރިކާއަށް ދޭނެކަން ހާމަކުރުމާއެކު އެކުންފުނީގެ ޝެއަރ ވަނީ 2.8 އިންސައްތަ މައްޗަށް ޖެހިލާފަ އެވެ.
އެމެރިކާ ސަރުކާރުން ވަނީ މިހާތަނަށް މޮޑާނާ ވެކްސިންގެ 200 މިލިއަން ޑޯޒް ހޯދުމަށް އޯޑަރުޖަހާފައެވެ. ޑިސެމްބަރ މަސް ނިމޭހިސާބުގައި މީގެތެރެއިން 20 މިލިއަން ޑޯޒް އެމެރިކާއަށް ފޯރުކޮށްދޭނެ ކަމަށާއި ބާކީ ބައި 2021 ވަނަ އަހަރު އެމެރިކާ އަށް ފޯރުކޮށްދޭނެކަމަށް މޮޑާނާއިން ބުންޏެވެ.
އެމެރިކާއިން މޮޑާނާއެކު އެންމެ ފުރަތަމަ އެއްބަސްވުމަކަށް އައިސްފައިވަނީ އޮގަސްޓް މަހުއެވެ. އެއީ 1.5 ބިލިއަން އެމެރިކާ ޑޮލަރަށް 100 މިލިއަން ޑޯޒް ގަތުމަށެވެ.
އަނެއްކޮޅުން އެމެރިކާގެ އެފްޑީއޭއިން ވަނީ ފައިޒަރ އާއި ބައޯއެންޓެކްގެ ވެކްސިން އެމަރޖެންސީކޮށް ބޭނުންކުރުމުގެ ހުއްދަދީފައެވެ. އަދި އަންނަ ހަފްތާގެ ހޯމަ ނުވަތަ އަންގާރަ ދުވަހު ވެކްސިން ޖަހަން ފަށާނެކަމަށް އެމެރިކާގެ އޮފިޝަލުން ވަނީ ބުނެފައެވެ.
ވެކްސިން ޖެހުމުގެ ތައްޔާރީތައް އެމެރިކާގެ ކަމާބެހޭ ފަރާތްތަކުން އަންނަނީ ކުރަމުންނެވެ.
