އެންމެ މަދުން އަދި މެދު މިނުގައި އާމްދަނީ ލިބޭ ގައުމުތަކަށް ކޮވިޑް ވެކްސިންގެ 1 ބިލިއަން ޑޯޒް

އެންމެ މަދުން އާމްދަނީ ލިބޭ ގައުމުތަކާއި، މެދު މިނުގައި އާމްދަނީ ލިބޭ ގައުމުތަކަށް ކޮވިޑް-19 އަށް އުފައްދަމުން އަންނަ ވެކްސިންތަކުގެ 1 ބިލިއަން ޑޯޒް ހަމަޖެހިފައިވާކަމަށް ދުނިޔޭގެ ސިއްހަތާ ބެހޭ ޖަމިއްޔާ (ޑަބްލިޔުއެޗްއޯ)އިން ބުނެފި އެވެ.

ހުކުރު ދުވަހުގެ ރޭ ޑަބްލިޔުއެޗްއޯއިން ބޭއްވި ނޫސްވެރިންގެ ބައްދަލުވުމުގައި އެޖަމިއްޔާގެ ޑިރެކްޓަރ ޖެނެރަލް ޓެޑްރޯސް ވިދާޅުވީ ކޮވިޑް-19 ވެކްސިން ދުނިޔޭގެ އާބާދީއަށް ހަމަހަމަކަމާއެކު ފޯރުކޮށްދިނުމަށް އެކުލަވާލާފައިވާ ކޮވެކްސް ފެސިލިޓީގެ ދަށުން އެގައުމުތަކަށް 1 ބިލިއަން ޑޯޒް ހަމަޖައްސާފައިވާކަމަށެވެ. ކޮވެކްސް ފެސިލިޓީގައި 189 ގައުމަކުން ވަނީ ބައިވެރިވެފައެވެ. އަދި ފައިސާވެރި 76 ގައުމަކުން ވަނީ އެފެސިލިޓީގައި ބައިވެރިވެފައެވެ.

ކޮވެކްސް ފެސިލިޓީއަކީ ކޮވިޑް-19 ވެކްސިން ވަކި ބައެއްގެ އަތްމައްޗަށް އެއްކޮށް ދިޔުން ކޮންޓްރޯލްކޮށް ކޮންމެ ގައުމެއްގައިވެސް އެންމެ އަވަހަށް ވެކްސިން ބޭނުންވާ ހައިރިސްކު ކެޓަގަރީގެ މީހުންނަށް ވެކްސިން ލިބޭނެކަން ކަށަވަރުކުރުމަށް އުފައްދާފައިވާ ފެސިލިޓީއެކެވެ. އެހެންނަމަވެސް މި ފެސިލިޓީގެ މަސައްކަތްތައް ކާމިޔާބުވެދާނެ ކަމާމެދު ދާދިފަހަކާ ޖެހެންދެންވެސް ވަނީ ސުވާލު އުފެދިފައެވެ.

ވަކިން ޚާއްސަކޮށް އެމެރިކާއިން ކޮވެކްސްގައި ބައިވެރިނުވެ އެގައުމަށް ބޭނުންވާ ވެކްސިންގެ ޑޯޒްތައް ހޯދުމަށް އެކި ކުންފުނިތަކާއެކު އެއްބަސްވުންތައް ހަދަން ފެށުމުން އެކަމާމެދު ވަނީ ސުވާލު އުފެދިފައެވެ. އެހެންނަމަވެސް ކޮވިޑް-19 އަށް 4 ވެކްސިނެއް އުފައްދަމުން އަންނަ ޗައިނާއިން ވަނީ މިފެސިލިޓީގައި ބައިވެރިވެފައެވެ.

މި ފެސިލިޓީ އުފެއްދުމުގައި ޑަބްލިޔުއެޗްއޯއާއި ގުޅިގެން މަސައްކަތްކުރާ އެއް ބަޔަކީ ގަވީ ވެކްސިންސް އެލަޔަންސެވެ.