އެމްއެމްޕީއާރްސީގެ ބޮޑު ހިޔާނާތާ ގުޅިގެން އެ ކުންފުނީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔަތުގެ މައްޗަށް އިއްވާފައިވާ 11 އަހަރުގެ ޖަލު ޙުކުމް ތަންފީޒު ކުރުމަށް އޭނާ މާފުށީ ޖަލަށް ގެންގޮސްފިކަމަށް ކަރެކްޝަންސް އިން މައުލޫމާތު ދީފިއެވެ.

އެމްއެމްޕީއާރްސީ ޙިޔާނާތާ ގުޅިގެން އިއްވާފައިވާ ގިނަ ދައުވާތަކެއް ސާބިތުވެ ޒިޔަތަށް ޙުކުމްކޮށްފައިވަނީ މި ހިނގާ ޑިސެމްބަރު މަހުގެ 7 ވަނަ ދުވަހުއެވެ. އެގޮތުން ކްރިމިނަލް ކޯޓުންވަނީ ދައުލަތުން އޭނާއާއެކު ވެފައިވާ އިއުތިރާފު އެއްބަސްވުމުގެ ދަށުން، އެ ހިޔާނާތާ ގުޅިގެން ޒިޔަތުގެ މައްޗަށް އުފުލާފައިވާ 32 ދައުވާގެ ހުކުމް ވަކިވަކިން އިއްވާފައެވެ.

ދައުލަތަށް ލިބެންޖެހޭ ބޮޑެތި ފައިސާގެ އަދަދުތަކަށް ޒިޔާތު ހިޔާނާތް ވެފައިވާއިރު، އިއްވާފައިވާ ހުކުމްތައް ބޮޑުތަނުން ލުއިދީފައިވަނީ، އެމްއެމްޕީއާރުސީގެ ހިޔާނާތުގެ މައްސަލަތައް ތަހުގީގު ކުރުމަށް އޭނާގެ ފަރާތުން އެއްބާރުލުން ދިނުމާއި ކުށަށް އިއުތިރާފްވުމުގެ އެއްބަސްވުމުގެ ދަށުންނެވެ.

އެގޮތަށް ލުއިދިނުމުން، 2.5 މިލިއަން ޑޮލަރަށް ހިޔާނާތް ވެފައިވާ މައްސަލައެއްގައިވެސް ޒިޔަތަށް އަދަބެއްގެ ގޮތުގައި އިއްވީ 18 ދުވަހުގެ ޖަލު ހުކުމެކެވެ. އެއީ ކުށަށް އިއުތިރާފްވުމުންނާއި، އަދަބު ލުއިކޮށްދިނުމުގައި ގާނޫނުގައި ބުނާ ހަމަތަކުގެ މަތިންނެވެ.

ޒިޔަތުގެ މައްޗަށް ހިޔާނާތުގެ 32 ދައުވާ އުފުލާފައިވާއިރު، އެއީ މުޅިންވެސް އެމްއެމްޕީއާރުސީ މެދުވެރިކޮށް ރާއްޖޭގެ ފަޅުރަށްތަކާއި، ފަޅުތައް ރިސޯޓްގެ ގޮތުގައި ތަރައްގީކުރުމަށް ކުށްޔަށް ދޫކުރުމުގައި ހިންގާފައިވާ ހިޔާނާތެވެ. އޭގެ ތެރޭގައި ހިމެނޭ ގިނަ މައްސަލަތަކަކީ މިލިއަން ޑޮލަރުން މަތީގެ އަދަދުތަކުން ހިޔާނާތް ހިންގާފައިވާ މައްސަލަތަކެވެ.

އެމްއެމްޕީއާރްސީ ޙިޔާނާތުގެ މައްސަލަތަކުގެ ތެރެއިން ޅ. މާބިންހުރާ މައްސަލައިގައި ޒިޔަތުގެ މައްޗަށް މީގެކުރިން ވަނީ ކުށް ސާބިތުވެ އަށް އަހަރުގެ ޖަލު ހުކުމެއް އިއްވާފައެވެ. އޭނާ ގެންދަނީ އެ ހުކުމް ތަންފީޒު ކުރަމުންނެވެ. އަދި މި މައްސަލައިގެ އިސްތިއުނާފު މަރުހަލާ ސުޕްރީމް ކޯޓާ ހަމައަށް ގެންދިއުމަށްފަހު، އޭނާވަނީ އިއުތިރާފު އެއްބަސްވުމުގައިވާ ގޮތުގެ މަތިން ދައުލަތަށް އެއްބާރުލުން ދޭން ބޭނުންވާކަމަށް ބުނެ އިސްތިއުނާފު އަނބުރާ ގެންގޮސްފައެވެ.