ބަލިމަޑުކަމުން އަރައިގަތުމަށް ސާކްގެ ހުރިހާ ގައުމަކުން އެކުގައި މަސައްކަތްކުރުން މުހިންމު - ރައީސް ސޯލިހު
މިއަހަރުގެ ޗާޓަރ ޑޭ ފާހަގަކުރަން ޖެހިފައި މިވަނީ ބޮޑު ބަލިމަޑުކަމެއްގެ ތެރޭގައި
ރައީސް އިބްރާހިމް މުހައްމަދު ސޯލިހް
މިހާރު ކުރިމަތިވެފައިވާ ބަލިމަޑުކަމުން އަރައިގަތުމަށް ސައުތް އޭޝިއަން އެސޯސިއޭޝަން އޮފް ރީޖަނަލް ކޯޕަރޭޝަން (ސާކް) ގެ ހުރިހާ ގައުމެއް ގުޅިގެން މަސައްކަތްކުރުމަކީ މުހިންމުކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ސާކްގެ 36 ޗާޓަރ ޑޭގެ މުނާސަބަތުގައި ރައީސް ސޯލިހް ފޮނުއްވި މެސެޖްގައި އެމަނިކުފާނު ވިދާޅުވީ މިއަހަރުގެ ޗާޓަރ ޑޭ ފާހަގަކުރަން ޖެހިފައި މިވަނީ ބޮޑު ބަލިމަޑުކަމެއްގެ ތެރޭގައި ކަމަށާއި މިހާލަތުގައި ސާކްގެ ސަބަބުން ގައުމުތަކުގެ މެދުގައި އުފެދިފައިވާ ގާތްގުޅުން ވަރަށް ރަނގަޅަށް ފެނިގެން ގޮސްފައިވާކަމަށެވެ. އަދި ބަލިމަޑުކަމުން އަރަގަނެވޭނީ ސާކްގެ ހުރިހާ ގައުމުތަކެއް ގުޅިގެން އެކުގައި މަސައްކަތްކޮށްގެން ކަމަށް ރައީސް ފާހަގަކުރެއްވިއެވެ.
ރައީސް ސޯލިހްވަނީ އިންޑިއާއިިން އިސްނަގައިގެން ކޮވިޑް-19 ގެ ސަބަބުން ގައުމުތަކަށް ދިމާވެފައިވާ ގޮންޖެހުންތަކާއި ގުޅޭ ގޮތުން މަޝްވަރާކޮށް ސާކް ކޮވިޑް-19 އެމެޖެންސީ ރިލީފް ފަންޑް ގާއިމް ކުރުމަށްޓަކައި ކުރިއަށް ގެންދިޔަ ވީޑިއޯ ކޮންފަރެންސް އަކީ ސާކްގެ ސަބަބުން ގައުމުތަކުގެ މެދުގައި އޮތް ގުޅުން ވަރަށް ރަނގަޅަށް ދައްކައިދިން ކަމެއްކަމަށް އެމަނުކުފާނުގެ މެސެޖްގައި ފާހަގަކުރައްވާފައެވެ. އަދި މިއީ އުދަގޫތަކާއި އެކުވެސް މުޅި ސަރަހައްދުގެ ފައިދާއަށް ގައުމުތަކުން އެކުގައި ގުޅިގެން މަސައްކަތްކުރާކަތް ވަރަށް ރަނގަޅަށް ދައްކައިދިން ކަމެއް ކަމަށް ރައީސް ފާހަގަކުރެއްވިއެވެ.
މި އަހަރުގެ ސާކް ޗާޓަރ ޑޭ ފާހަގަކުރަމުންދާ އިރު، މި ޖަމިއްޔާގެ ބޭނުން އެންމެ ފުރިހަމަ ގޮތުގައި ބޭނުން ކުރުމަށް މިހާރަށްވުރެ ބޮޑަށް މަސައްކަތްކުރުމަށް ރައީސްވަނީ ވިދާޅުވެފައެވެ. އެހެން ކަމުން ގައުމުތަކުގެ މެދުގައި މިއޮތް ގުޅުން އެންމެ ފުރިހަމަ ގޮތުގައި ހިފުމަށް އެއްގައުމު އަނެއް ގައުމާއިއެކު ކުރާ މަޝްވަރާތައް އިތުރުކޮށް ހުރިހާ ގައުމުތަކަށް ފައިދާވާ މަސައްކަތްތައް ގުޅިގެން ކުރިއަށް ގެންދިއުމަށް ރައީސް ވިދާޅުވިއެވެ.
މީގެ އިތުރުން، 1985 ވަނަ އަހަރު ރާއްޖެ އިން ސާކްއާއި ގުޅުފަހުން ރާއްޖެ އިން ދަނީ އަބަދުވެސް ސާކް އަށް ފުރިހަމަ އެއްބާރުލުން ދެމުން ކަމަށާއި ދެކުނު އޭޝިއާގެ ސުލްހައާއި އަމާންކަން ކަށަވަރުކޮށް މި ސަރަހައްދު ތަރައްގީކުރުމަށް ސާކްގެ ގައުމުތަކާއި އެކު މަސައްކަތްކުރުމަށް ރާއްޖެ އޮތީ ތައްޔާރަށްކަމަށް ރައީސް ސޯލިހް ވިދާޅުވިއެވެ.
ސާކްގެ މެމްބަރު ގައުމުތަކުގެ ތެރޭގައި ހިމެނެނީ ރާއްޖެ އާއި އިންޑިއާގެ އިތުރުން އަފްގާނިސްތާން، ބަންގްލަދޭޝް، ބޫޓާން، ނޭޕާލް އަދި ޕާކިސްތާނާއި ސްރީލަންކާއެވެ.
