ނާއިންސާފާ ދެކޮޅަށް މޭ އައްޑަނައަކަށް ދިއްކޮށްލަންޖެހޭ ކަމަށާއި، ނާއިންސާފު ނެތިކޮށްލެވޭނީ މުޅި ޤައުމު އެކުގައި ތެދުވެގެންކަމަށް މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވެއްޖެ އެވެ.
އެމްޑީޕީން ޅ. ނައިފަރުގައި ބޭއްވި ޖަލްސާގައި ވާހަކަދައްކަވަމުން އެމްޑީޕީ ޕާލިމެންޓްރީ ގުރޫޕުގެ ނައިބް ލީޑަރުކަންވެސް ކުރައްވާ އިމްތިޔާޒް ފަހުމީ ވިދާޅުވީ، އަދުލު އިންސާފު ޤާއިމްކުރުމަށް، އުފައްދާފައިވާ މުއައްސަސާތަކުން ރައްޔިތުންނަށް އިންސާފެއް ނުލިބޭ ކަމަށާއި، ކުރިމަތިލާންޖެހެނީ ނާއިންސާފާ ކަމަށެވެ. އެގޮތުން މިސާލު ޖައްސަވަމުން އިމްތިޔާޒް ފަހުމީ ވަނީ ސިވިލް ކޯޓުގެ ގާޒީ މަރިޔަމް ވަހީދު މަޤާމުން ދުރުކުރެވުނު ގޮތް ފާހަގަކުރައްވާފަ އެވެ.
އިމްތިޔާޒް ވިދާޅުވީ ގާޒީއަކު ކުރެއްވި ހުކުމަކާ ގުޅިގެން ސުޕްރީމް ކޯޓުން އެ ގާޒީ މަޤާމުން ވަކިކުރިއިރު، ކޯޓުތަކުގެ ފަނޑިޔާރުންގެ މައްސަލަތައް ބެލުމަކީ ޖުޑީޝަލް ސާރވިސް ކޮމިޝަންގެ ޒިންމާއެއް ކަމަށެވެ. އޭގެއިތުރުން ސޯޝަލް މީޑިއާ އެކްޓިވިސްޓް ޝަމްއޫނު ޖަލީލް ގިނަ ދުވަސްތަކެއްވަންދެން ބަންދުގައި ގެންގުޅުމާއި، ކުރި ޓުވީޓަކާއި ގުޅިގެން ސޯޝަލް މީޑިއާ އެކްޓިވިސްޓް ތޮއްޔިބު ޝަހީމް ހައްޔަރުކޮށްފައިވާކަންވެސް އިމްތިޔާޒް ފާހަގަކުރެއްވި އެވެ. އަދި އެ ހުރިހާ ކަމަކީވެސް ނާއިންސާފުން ކޮށްފައިވާ ކަންތައްތަކެއް ކަމަށް އިމްތިޔާޒް ވިދާޅުވި އެވެ.
އިމްތިޔާޒް ފަހުމީ ވިދާޅުވީ، ނާއިންސާފު ނައްތާލެވޭނީ އެންމެ އެކުގައި މަސައްކަތްކޮށްގެން ކަމަށެވެ. އަދި ނާއިންސާފު ނައްތާނުލައިފިނަމަ، ނާއިންސާފާ ކުރިމަތިލާންޖެހެނީ މިއަދުގެ ތުއްތު ކުދިންކަމަށާއި، އެކަން އެގޮތަށްވުމުގެ ކުރިން ނާއިންސާފާއި ދެކޮޅަށް މޭ އައްޑަނައަކަށް ދިއްކޮށްލަންޖެހޭކަމަށް އިމްތިޔާޒް ވިދާޅުވި އެވެ.
"މިނާއިންސާފާ ދެކޮޅަށް އަޅުގަނޑުމެން ރާއްޖޭގެ ހުރިހާ ރައްޔިތުން ކުރިމަތިލާންޖެހޭ. ނާއިންސާފު ނެތިކޮށްލެވޭނީ ހިތްވަރެއް ލައިންގެން. އެހެން ނޫންނަމަ ނާއިންސާފު ކުރިމަތިލާނީ އަޅުގަނޑުމެންގެ ޅަ ދަރިންނަށް. ޅަ ދަރިންނަށް މި ނާއިންސާފު ކުރިމަތިވުމުގެ ކުރިން އަޅުގަނޑުމެންގެ މޭ އައްޑަނައަކަށް ދިއްކޮށްލަންޖެހޭ އެބަ." އިމްތިޔާޒް ވިދާޅުވި އެވެ.
އިމްތިޔާޒް ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބުގައި ރައީސް އަބްދުﷲ ޔާމީން ބަލިކުރާނެ ކަމަށެވެ. އަދި ރައީސް ޔާމީން ބަލިކުރުމަށް ހުރިހާ ރައްޔިތުންވެސް އިންތިހާބުގައި ވޯޓުލުމަށް ނިކުމެ، އެމްޑީޕީގެ ކެނޑިޑޭޓުންނަށް ވޯޓުދެއްވުމަށް އިމްތިޔާޒް އިލްތިމަސްކުރެއްވި އެވެ.
