މާލޭ ވިޔަފާރި ބަނދަރުގައި ނުގެންގޮސް ގިނަދުވަހު ބެހެއްޓިފައިވާ، މުދާތައް ނީލަން ކިޔަނީ

ރާއްޖެއަށް މުދާ އެތެރެކޮށް މާލޭ ވިޔަފާރި ބަނދަރުގައި ނުގެންގޮސް ގިނަދުވަހު ބެހެއްޓިފައިވާ، މުދާތައް ނީލަން ކިޔަން ނިންމައި އެކަން ކުރުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) ން ފަށައިފިއެވެ.

އެމްޕީއެލުން ކޮށްފައިވާ އިއުލާނެއްގައި ބުނެފައިވަނީ, ނީލަން ކިޔާ މުދާ ބެލުމުގެ އިންތިޒާމު ހަމަޖެހިފައިވާކަމަށެވެ. އެގޮތުން، މިމަހުގެ 17 ވާ ބުރާސްފަތި ދުވަހުގެ 16:00 ގައި މުދާ ބެލުމަށް ނަން ނޯޓު ކުރުމަށާއި ހަމައެދުވަހު ހެނދުނު 09:00 ގެ ކުރިން ނީލަން މުދާބެލުމަށް އެދޭ ފޯމުhttps://rb.gy/obnqo2ފުރިހަމަކުރަން ޖެހެއެވެ. އަދި މުދާބެލުމަށް ވަޑައިގަންނަވާއިރު ޕޯޓްގެ ޤަވާއިދާ އެއްގޮތަށް (ބޫޓް، ވެސްޓް އަދި ހެލްމެޓް ހިއްޕަވައިގެން) ވަޑައިގެންނެވުމަށް ވެސް އެމްޕީއެލްގެ އިއުލާނުގައި ބުނެފައިވެއެވެ.

އެމްޕީއެލުން ބުނީ އެ ނީލަމުގައި ބައިވެރިވެވޭނީ 19 ޑިސެމްބަރ 2020 ވާ ހޮނިހިރު ދުވަހުގެ 14:00 ގެ ކުރިން، ނީލަމުގައި ބައިވެރިވުމަށް އެދި ނީލަމުގައި ރަޖިސްޓްރީ ކުރާ ފޯމު ފުރިހަމަކޮށް އެޑްވާންސް ޕޭމަންޓް ދައްކާ ފަރާތްތަކަށްކަމަށެވެ. ނީލަން ކިޔުން އޮންނާނީ، އެމްޕީއެލްގެ ހެޑް އޮފީސްގެ ބަނދަރު މާލަމުގައި، 20 ޑިސެމްބަރު 2020 ވާ އާދިއްތަ ދުވަހުގެ 14:00 އިން ފެށިގެން ކަމަށް ވެސް އެމްޕީއެލުން ބުނެއެވެ.

އެކިއެކި ބޭނުންތަކަށް ތަފާތު މުދާ ރާއްޖެ އެތެރެކުރަމުންދާއިރު، އެމްޕީއެލް ސަރަހައްދުގައި، ނުގެންގޮސް ގިނަ ދުވަސްވާ މުދާ ހުންނަތީ، އެ ކުންފުންޏަށްވެސް ގިނަ ދަތިތަކާ ކުރިމަތިލާން ޖެހިފައިވެއެވެ. ޕޯޓް ސަރަހައްދަކީ ކާރޫބާރު ބޮޑު، ޖާގައިގެ ދަތިކަތް އޮން ސަރަހައްދެއް ކަމަށްވާތީ، ވީހާވެސް އަވަހަކަށް މުދަލުގެ ވެރިފަރާތުން މުދާ ގެންދިއުމަށް އެމްޕީއެލުން އަބަދުވެސް ބާރު އަޅައެވެ.