ޕޮލިސް ބޯޑު އެކުލަވާލާތާ 4 މަސްދުވަސްތެރޭ ތުހުމަތުކުރެވޭ ފުލުހުންނާ މެދު ގޮތެއް ނިންމާ އިސްލާހާއެކު ބިލް ފާސްކޮށްފި
މިބިލް ފާސްކޮށްފައިވަނީ 59 މެންބަރުންގެ ވޯޓުން
ފުލުހުންތަކެއް
ޕޮލިސް ބޯޑް އައްޔަނުކުރާ ދުވަހުން ފެށިގެން 4 މަސް ދުވަހުގެ ތެރޭގައި ޤާނޫނަށް އަމަލުކުރަން ފަށާއިރު ދިވެހި ފުލުހުންގެ ޚިދުމަތުގައި ތިބި އޮފިސަރުންގެ ތެރެއިން ކޮމިޝަނަރ އޮފް ޕޮލިސް ފިޔަވައި ސްޕްރިންޑެންޓުން ޕޮލިސް އިން ފެށިގެން މަތީ ރޭންކުގެ ކޮމިޝަން އޮފިސަރުންގެ ތެރެއިން އެކިއެކި ތުހުމަތުކުރެވޭ ފުލުހުންނާ މެދު ގޮތެއް ކަނޑައަޅަންވާނެކަމަށް ހުށަހެޅި އިސްލާހާއެކު ދިވެހި ފުލުހުންގެ ޚިދުމަތުގެ ބިލް ރައްޔިތުންގެ މަޖިލީހުން ފާސްކޮށްފި އެވެ.
މަޖިލީހުގެ ކޮމިޓީގައި އެތައް ދިރާސާތަކެއް ކުރުމަށްފަހު ކޮމިޓީ ރިޕޯޓް ތަޅުމަށް އައިފަހުން ހުށަހެޅުނު ދެ އިސްލާހާއެކު މިބިލް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުން ވަނީ މިބިލް ފާސްކޮށްފައެވެ. އާދިއްތަ ދުވަހުގެ ހަވީރު 4:30ން ފެށިގެން ކުރިޔަށް ގެންދިޔަ ޖަލްސާގައި މިބިލަށް އިސްލާހު ހުށަހެޅުއްވީ ގަލޮޅު އުތުރު ދާއިރާގެ މެމްބަރ އީވާ އަބްދުﷲ އެވެ. އީވާ ވަނީ މިބިލަށް ދެ އިސްލާހެއް ހުށަހަޅުއްވާފައެވެ.
ފުރަތަމަ އިސްލާހަކީ އެބިލްގެ 75 ވަނަ މާއްދާއަށް ހުށަހެޅުއްވި އިސްލާހެކެވެ. އެއީ ފުލުހުންގެ ބޯޑު މިބިލް ޤާނޫނަކަށްވެ އަމަލުކުރަން ފަށާތާ 14 ދުވަހުގެ ތެރޭގައި އެކުލަވާލުމަށެވެ. ދެން އީވާ އިސްލާހު ހުށަހަޅުއްވާފައިވަނީ ބިލްގެ 3 ވަނަ މާއްދާގެ ނ ށް އިސްލާހު ގެނައުމަށެވެ.
އެއިސްލާހުގައި ބުނެފައިވަނީ ޕޮލިސް ބޯޑުން ފުލަހަކަށް ވީތީ އެމީހަކަށް ލިބިފައިވާ ޤާނޫނީ ބާރާއި އިޚުތިޔާރު ނަހަމަގޮތުގައި ބޭނުންކޮށް ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭ ނުވަތަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓްކުރެވިފައިވާ އޮފިސަރުންނަކީ އެމަގާމުތަކަށް ގާބިލް އަދި މަގާމާ އެކަށޭނެ ހުނަރާއި މަސައްކަތުގެ ތަޖުރިބާ އާއި ނަޒާހާތްތެރިކަން ހުރި އޮފިސަރުން ކަމާމެދު ޕޮލިސް ބޯޑުން ގޮތެއް ކަނޑައަޅަންވާނެ ކަމަށެވެ. އަދި މިއޮފިސަރުންނާ މެދު ގޮތެއް ނިންމާ ތަންފީޒުކުރެވެންދެން ޤާނޫނަށް އަމަލުކުރަން ފެށިއިރު އެމީހުން ތިބި އެރޭންކުތަކުގައި ދެމިތިބޭނެކަމަށްވެސް މިއިސްލާހުގައި ބުނެފައިވެއެވެ.
ފުލުހުންނާމެދު ގޮތެއް ނިންމުމުގައި ވަކި މައުލޫމާތުތަކެއް ހިމަނަންވާނެކަމަށް ބިލްގައި ބުނެފައިވެއެވެ. އަދި މައުލޫމާތު ހޯދުމަށް ޕޮލިސް ބޯޑުން އެދިއްޖެނަމަ ފުލުހުންގެ އިދާރާއިންނާއި ބަޔާންކޮށްފައިވާ އޮފިސަރުން އެމައުލޫމާތުތައް ބޯޑަށް ދޭންވާނެކަމަށާއި އަދި ވަކި މައުލޫމާތެއް ދިނުމަށް އެއްވެސް ފަރާތަކުން އުޒުރުވެރިވެއްޖެނަމަ އެކަން ޕޮލިސް ބޯޑުން ފާހަގަކުރަންވާނެ ކަމަށްވެސް މިއިސްލާހުގައި ބުނެފައިވެއެވެ.
އޮފިސަރުންގެ މައްސަލަތައް ބެލުމުގައި ޕޮލިސް ބޯޑުން ރިއާޔަތް ކުރަން ޖެހޭ ކަންތައްތައް ވެސް މިބިލްގައިވެ އެވެ. އޭގެ ތެރޭގައި އެ އޮފިސަރެއްގެ ތައުލީމީ ފެންވަރާއި ސުލޫކާއި ފުލުހުންގެ ތެރޭގައި އޭނާ އަދާ ކުރާ ދައުރާއި ހިދުމަތް ކުރި މުއްދަތާއި އޭނާއާ މެދު ކުރެވޭ ތުހުމަތުގެ ބާވަތަށް ބަލަން ޖެހެ އެވެ.
ޕޮލިސް ބޯޑުން މައްސަލަ ބަލާ ނިންމާ އެކުލަވާލާ ރިޕޯޓުގައި އެ އޮފިސަރެއްގެ އާމްދަނީ އާއި ދަރަނީގެ ތަފްސީލްތަކާއި އަނބިންނާއި ދަރިންގެ މާލީ ބަޔާނުން ކަމެއް ފާހަގަ ވާނަމަ އެކަމާއި އާދަޔާ ހިލާފު ކުރިއެރުންތަކެއް ލިބިފައިވާ ނަމަ އެކަންކަމާ އަދި މީގެ ކުރިން މައްސަލައެއްގައި ފިޔަވަޅެއް އަޅާފައިވާ ނަމަ އެކަން އަދި އިތުރު ކޮމިޝަނަކުން އެ އޮފިސަރަކާ މެދު މައްސަލައެއް ބަލަމުން ދާނަމަ އެކަމާ ގުޅޭ މައުލޫމާތު ހިމަނަންޖެހެ އެވެ.
ޕޮލިސް ބޯޑް އެކުލެވިގެންވަނީ 7 މެމްބަރުންގެ މައްޗަށެވެ. ރައީސް އައްޔަން ކުރައްވަން ޖެހޭގޮތަށް ޕޮލިސް ބޯޑް އޮތްއިރު ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަނުކުރާ 2 މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ 3 މީހުންގެ އިތުރުން އާންމު ރައްޔިތުންގެ ތެރެއިން ކުރިމަތިލާ 2 މީހުންނެވެ.
އާންމު ދެ މެންބަރުން ބޯޑަށް ހޮވަނީ މަޖިލީހުން އިއުލާންކުރުމުން ކުރިމަތިލާ ފަރާތްތަކުގެ ތެރެއިން މަޖިލީހުން ނަންތައް ދިރާސާކޮށް މަޖިލީހުން ފާސްކުރާ ދެ ނަމެކެވެ.
