އުސޫލުން ބޭރުން އާޒިމް ވަޒީފާދޭ ކަމަށް ބުނެ ޖާބިރު ހުށަހެޅުއްވި ކުއްލި މައްސަލަ ބޭރުކޮށްލައިފި
މައްސަލަ ބަލައިގަންނަން ފެންނަކަމަށް ވޯޓު ދެއްވީ 4 މެމްބަރުން
ކާށިދޫ ދާއިރާގެ މެމްބަރ އަބްދުﷲ ޖާބިރު
ވަޒީފާ ދިނުމާއި ވަކިކުރުމުގައި އަމަލުކުރަމުން އަންނަ އުސޫކުތަކާއި ޚިލާފަށް ސަރުކާރުގެ ހިއްސާ އޮންނަ ކުންފުންޏެއް ކަމުގައިވާ އެމްޓީސީސީގެ ސީއީއޯ އާދަމް އާޒިމް ބޭނުންވާ ފަރާތަކަށް ވަޒީފާދީ އަދި ބޭނުންވާ ފަރާތްތައް ވަޒީފާއިން ވަކިކުރަމުންދާތީ އެފަރާތްތަކުގެ ހައްގު ގެއްލިގެންދާތީ މިކަން ރަނގަޅަށް ބަލައި އިންސާފުގާއިމުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރަށް ގޮވާލާ ހުށަހެޅި ކުއްލި މައްސަލަ މަޖިލީހުން ބޭރުކޮށްލައިފި އެވެ.
ކުއްލި މައްސަލަ ހުށަހެޅުއްވީ ކާށިދޫ ދާއިރާގެ މެމްބަރ އަބްދުﷲ ޖާބިރު އެވެ. މިމައްސަލަ ބަލައިގަތުމަށް ފެނޭތޯ ނެގުނު ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން މައްސަލަ ބަލައިގަންނަން ފެންނަކަމަށް ވޯޓު ދެއްވީ 4 މެމްބަރުންނެވެ. 41 މެމްބަރަކު ވަނީ މިމައްސަލަ ބަލައިގަންނަން ނުފެންނަކަމަށް ވޯޓު ދެއްވާފަ އެވެ.
މިމައްސަލަ ހުށަހަޅުއްވަމުން ޖާބިރު ވިދާޅުވީ ވަޒީފާގެ ބިރުވެރިކަން ނައްތާލާއި އަމާންވެއްޓެއް ހޯދައި ދިނުމުގެ ވައުދަކީ މިހާރު ހިނގަމުންދާ ސަރުކާރު ރާއްޖޭގެ ވެރިކަމަށް އައުމަށްޓަކައި ވީ ވައުދުތަކުގެ ތެރޭގައި ހިމެނޭ އެއް ވައުދުކަމަށެވެ. އެހެން އެކަން އޮންނައިރު އާދަމް އާޒިމް ހަވާލުވާ ކޮންމެ ކުންފުންޏެއްގެ މުވައްޒަފުންތައް އިންސާފާއި ޚިލާފަށް އަދި އުސޫލުތަކާއިވެސް ޚިލާފަށް ވަކިކޮށް، އާޒިމް ބޭނުންވާ ފަރާތްތަކަށް ވަޒީފާ ދިނުމަކީ މިސަރުކާރުގެ ވައުދަކާއި އާޒިން ގަސްދުގައި ޚިލާފުވުންކަމަށް ޖާބިރު ވިދާޅުވި އެވެ.
އަދި އެކަމުގެ ސަބަބުން ސަރުކާރުގެ ހިއްސާ އޮންނަ ކުންފުނިތަކަށް ލިބޭ ކޮންމެ ގެއްލުމަކީ ސަރުކާރަށްވެސް ލިބޭ ގެއްލުންކަން އެނގެން އޮންނައިރު އާޒިމްގެ މި އަމަލުގެ ސަބަބުން ސަރުކާރުގެ ކުންފުނިތަކުގެ މުވައްޒަފުން ސަލާމަތްކޮށްދިނުމަށް އަދި ވަޒީފާ ގެއްލިފައިވާ ފަރާތްތަކަށް ހައްގު ލިބިދިނުމަށް އަޅަންޖެހޭ ފިޔަވަޅުތައް ވަގުތުން ވަގުތަށް އެޅުމަށް ސަރުކާރަށް ގޮވާލާކަމަށް ޖާބިރު މިމައްސަލަ ހުށަހަޅުއްވަމުން ވިދާޅުވި އެވެ.
