ކޯޓަށް ހުށަހަޅާފައިނުވާ ލިޔުންތަކެއް ހޯދަން ރައީސް ޔާމީން އެދިވަޑައިގަންނަވާތީ، މައްސަލަ ކުރިއަށް ނުގެންދެވިފައި!
މިމައްސަ؛ލާގައި މިހާތަނަށް ތިން އަޑުއެހުން ބޭއްވިއިރު، މުޅިން ވެސް ލިޔެކިޔުންތައް ހަމަނުވެގެން އެޝަކުވާ
ކްރިމިނަލް ކޯޓުގައި މިއަދު ބޭއްވި ރައީސް ޔާމީންގެ އަޑުއެހުމުގެ ތެރެއިން
އެމްއެމްޕީއާރުސީ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީ ކުރުމަށް ކުށްޔަށް ދޫކުރި ރ. ފުއްގިރި މައްސަލައިގައި، ކޯޓަށް ހުށަހަޅާފައި ނުވާ ލިޔެކިޔުންތަކެއް ހޯދަން ކުރީގެ ރައީސް އަބްދުﷲ ޔާމީންގެ ފަރާތުން އެދިވަޑައިގަންނަވާތީ، މައްސަލައިގެ އަޑުއެހުން ކުރިއަށް ގެންދިއުމުގައި ދަތިތަކެއް ދިމާވެއްޖެ އެވެ.
އާދިއްތަ ދުވަހު ބޭއްވި އަޑުއެހުމުގައި ވެސް ރައީސް ޔާމީންގެ ފަރާތުން ތަކުރާރުކުރެއްވީ މިމައްސަލާގައި ހިމެނޭ ލިޔެކިޔުންތައް ހަމައަށް ލިބިފައި ނުވާކަމަށެވެ. ނަމަވެސް މިމައްސަލަ ބައްލަވާ ކްރިމިނަލް ކޯޓުގެ އިސްގާޒީ އަހުމަދު ޝަކީލު ވަނީ ކޮންމެ އަޑުއެހުމެއްގައި ލިޔެކިޔުންތައް ހަމަނުވާ ވާހަކަ ދައްކަވާތީ އާދިއްތަ ދުވަހުގެ އަޑުއެހުމުގައި އެކަމަށް ހައްލެއް ގެއްނެވުމަށް ދެފަރާތުގެ ކިބައި އެދިލައްވާފަ އެވެ. އެގޮތުން، ރައީސް ޔާމީންގެ ފަރާތުން ނުލިބޭކަމަށް ވިދާޅުވާ ލިޔެކިޔުންތައްކަކީ، ދައުލަތުން ސިއްރުކުރަން ހުށަހެޅި ލިޔެކިޔުންތަކުގެ އިތުރަށް ކޯޓަށް ހުށަހަޅާފައިނުވާ ލިޔެކިޔުންތަކެކެވެ.
ގާޒީ ވިދާޅުވީ، ސިއްރުކުރަން ދައުލަތުން ހުށަހެޅާފައިވާ ލިޔެކިޔުންތަކާމެދު ކޯޓުން ގޮތެއް ނިންމަވާނެ ކަމަށެވެ. ނަމަވެސް ދައުލަތުން ކޯޓަށް ހުށަހަޅާފައިނުވާ ލިޔެކިޔުންތަކަކީ މިމައްސަލާގައި ބެލޭނެ ލިޔެކިޔުންތަކަކަށް ނުވާތީ ދިފާއުއަށްވެސް ބޭނުންވާނެ ލިޔެކިޔުންތަކެއް ކަމަށް ދެކިނުލައްވާ ކަމަށެެވެ.
އިތުރަށް ރައީސް ޔާމީންގެ ފަރާތުން ފާހަގަކުރެއްވީ ބޭންކް ސްޓޭޓްމަންޓްތައް ހިމެނޭ 20 ގަޑިއިރުގެ ސީޑީ ބެލޭ އިންތިޒާމު ހަމަޖައްސާ ދެއްވުމަށެވެ. އަދި 15 ދުވަހުގެ މުއްދަތެއް ސީޑީއާއި ލިޔެކިޔުންތައް ދިރާސާ ކުރުމަށް ދެއްވުމަށެވެ. ގާޒީ ވިދާޅުވީ 15 ދުވަސް ދެއްވިދާނެ ކަމަށާއި ނަމަވެސް ދެން އޮންނަ އަޑުއެހުމުގައި ލިޔެކިޔުންތައް ހަމަނުވާ ވާހަކައާއި ލިޔެކިޔުންތައް ދިރާސާ ނުކުރެވޭ ވާހަތައް ދެއްކެވުމުގެ ފުރުސަތު ނުދެއްވާނެ ކަމަށެވެ.
އިތުރަށް ގާޒީ ވިދާޅުވީ އަންނަ ޖެނުއަރީ މަހުގެ 7 ވަނަ ދުވަހު އިބްތިދާއީ އަޑުއެހުމެއް ބޭއްވޭނެ ކަމަށާއި ލިޔެކިޔުންތައް ހަމަކޮށް، ދިރާސާ ކުރައްވައިގެން ވަޑައިގެންނެވުމަށް އެދިވަޑައިގަންނަވާ ކަމަށެވެ.
އެންމެފަހުން ބޭއްވި އަޑުއެހުމުގައި ރައީސް ޔާމީން ވިދާޅުވީ ގާނޫނީ ވަކީލުންނާ ވަކިން ތިއްބަވައިގެން އަޑުއެހުން ކުރިއަށް ގެންދަވާތީ ދަތިފުޅުވާ ކަމަށެވެ. ނަމަވެސް ގާޒީ ވިދާޅުވީ ވަކީލުންނަށް ކޯޓަށް ވަޑައިގެން، ރައީސް ޔާމީންގެ އަރިހުގައި އިންނަވައިގެން ވަކާލާތު ކުރެއްވުމުގެ ފުރުސަތު އޮތްކަމަށް ވަކީލުންނަށް ދެންނެވިފައިވާނެ ކަމަށެވެ.
އާދިއްތަ ދުވަހުގެ އަޑުއެހުމުގައި ރައީސް ޔާމީންގެ ގަނޫނީ ވަކީލުން ތިއްބެވީ އެމަނިކުފާނާއެކު ކޯޓު ރޫމްގަ އެވެ.
އާދިއްތަ ދުވަހުގެ އަޑުއެހުމާ ހަމައަށް މިމައްސަލާގައި ތިން އަޑުއެހުމެއް ބާއްވާފައިވާއިރު، މުޅިން ވެސް ކުރިއަށް ގެންދެވިފައިވަނީ ލިޔެކިޔުންތައް ހަމަނުވެގެން ރައީސް ޔާމީނާއި އެމަނިކުފާނުގެ ގާނޫނީ ވަކީލުންގެ ކަންބޮޑުވުންތަކާ ގުޅޭ ކަންކަމެވެ.
ރ. ފުއްގިރި މައްސަލާގައި އިތުރު ފަރާތްތަކެއްގެ މައްޗަށް ދައުވާ ކޮށްފައިވާތީ، އިބްތިދާއީ އަޑުއެހުންތަކަށްފަހު، ޝަރީއަތުގެ އަޑުއެހުންތައް ބޭއްވޭނީ އެ ހުރިހާ ފަރާތްތަކެއްގެ އެއް ހާޒިރެއްގައި ކަމަށެވެ.
ރ. ފުއްގިރި މައްސަލައިގައި ރައީސް ޔާމީންގެ މައްޗަށް ދައުލަތުން އުފުލާފައިވަނީ، މަނީ ލޯންޑަރިންގ ކުށުގެ ދައުވާއަކާއި ރިޝްވަތު ގަބޫލު ކުރުމުގެ ކުށުގެ ދައުވާއެކެވެ.
މި މައްސަލައިގައި ރައީސް ޔާމީންއާއެކު މަނީ ލޯންޑަރ ކުރުމުގައި އުޅުއްވި ކަމުގެ ތުހުމަތުގައި އިތުރު ފަރާތްތަކެއްގެ މައްޗަށްވެސް ދައުވާކޮށްފައިވާއިރު، އޭގެ ތެރޭގައި އެ މަނިކުފާނުގެ އަރިސް ބޭފުޅެއް ކަމުގައިވާ ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމްގެ ހިއްސާ އޮންނަ ދެ ކުންފުންޏަކާއި، މއ. ކުރިކީލަހިޔާ، އަހުމަދު ކްރިކް ރިޒާ ހިމެނެއެވެ.
މި ދައުވާގައި ބުނެފައިވަނީ ރ. ފުއްގިރި ދޫކުރުމުގެ މުއާމަލާތާ ގުޅިގެން ރައީސް ޔާމީން ރިޝްވަތުގެ ފައިސާގެ ގޮތުގައި ހޯއްދެވި، 1،117،000 (އެއްމިލިއަން އެއްލައްކަ ސަތާރަހާސް) ޑޮލަރު ކްރިކް ރިޒާ މެދުވެރިކޮށް އަދި ސަން ކޮންސްޓްރަކްޝަން އެންޑް އިންޖިނިއަރިންގ ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން އެ ފައިސާ މަލޯންޑަރ ކުރުމަށްޓަކައި ފަށަލަކޮށްފައިވާ ކަމަށެވެ.
