ހައުސިން ޑިވެލޮޕްމެންޓް ކޯޕަރޭޝަނުން ތަރައްގީކުރާ ހުޅުމާލެ ޓޫރިޒަމް އައިލެންޑްގެ މަސައްކަތްތަކަށް ޓެންޑަރ އަށް ހުޅުވާލައިފި އެވެ.

އެޗްޑީސީއިން ވަނީ ހުޅުމާލެގައި ތަރައްގީކުރާ ޓޫރިޒަމް އައިލެންޑްގެ ވެބްސައިޓް ޑިވެލޮޕް ކުރުމާއި ޑިޒައިން ކުރުމުގެ އިތުރުން އެރަށުގެ 3ޑީ މޮޑެލްއާއި ރެންޑަރިން އަދި ވޯކްތުރޫ ވީޑިއޯގެ މަސައްކަތްކުރާނެ ފަރާތެއް ހޯދަން ޓެންޑަރ ޑިސެމްބަރ 3 ވަނަ ދުވަހު ހުޅުވާލާފަ އެވެ.

އެގޮތުން ވެބްސައިޓް ޑިވެލޮޕްކޮށް ޑިޒައިން ކުރުމަށް ޝައުގުވެރިވާ ފަރާތްތަކުން ޑިސެމްބަރ 20 ވަނަ ދުވަހުގެ 13:00 ގެ ކުރިން ޓެންޑަރ ހުށައަޅަން ޖެހޭއިރު، އެރަށުގެ 3ޑީ މޮޑެލްއާއި ރެންޑަރިން އަދި ވޯކްތުރޫ ވީޑިއޯގެ މަސައްކަތްކުރަން ޝައުގުވެރިވާ ފަރާތްތަކުން ޓެންޑަރ ހުށައަޅަން ޖެހެނީ ޑިސެމްބަރ 20ގެ 11:00 ގެ ކުރިންނެވެ.

އެޗްޑީސީއަށް ހުށައެޅޭ ޓެންޑަރތައް ހުޅުވުމަށް ހަމަޖެހިފައި ވަނީ އެޗްޑީސީ އޮފީހުގައި ރިޕްރެސެންޓޭޓަރުންގެ ކުރިމަތީގައެވެ.

ހުޅުމާލެ ޓޫރިޒަމް އައިލެންޑްގެ ވެބްސައިޓް ޑިވެލޮޕްކޮށް ޑިޒައިން ކުރުމަށް ބޭނުންވާ ފަރާތްތަކަށް ޕްރީ-ބިޑް މީޓިން ބޭއްވުމަށް ހަމަޖެހިފައި ވަނީ ޑިސެމްބަރ އަށް ވަނަ ދުވަހުގެ 11:00 ގައެވެ. އަދި 3ޑީ މޮޑެލްއާއި ރެންޑަރިންގެ އިތުރުން ވޯކްތުރޫ ވީޑިއޯގެ މަސައްކަތްކުރުމަށް ޝައުގުވެރިވާ ފަރާތްތަކަށް ޕްރީ-ބިޑް މީޓިންތައް ބޭއްވުމަށް ހަމަޖެހިފައި ވަނީ ޑިސެމްބަރ އަށް ވަނަ ދުވަހުގެ 13:00 ގައެވެ.

މި މަސައްކަތްތަކަށް ޝައުގުވެރިވާ ފަރާތްތަކަށް ޓެންޑަރ އާއި ގުޅޭ އިތުރު މައުލޫމާތުތައް އެޗްޑީސީގެވެބްސައިޓުންލިބެން ހުންނާނެއެވެ.