މިދިޔަ އަހަރު ނުމިގެންދިޔައީ ރާއްޖެއަށް ޒިޔާރަތްކުރާނެ ކަމަށް ލަފާކުރެވުނު އަދަދަށް ވުރެ ބޮޑު ތަނުން ފަތުރުވެރިން އިތުރުވެފައިވާ ކަމަށް ޓޫރިޒަމް މިނިސްޓްރީ އިން ބުނެފިއެވެ.

އެމިނިސްޓްރީ އިން ބުރާސްފަތި ދުވަހު ނެރެފައިވާ ތަފާސް ހިސާބުތައް ދައްކާ ގޮތުން މިދިޔަ އަހަރު ނިމުނު އިރު ރާއްޖެއަށް ވަނީ 1،389،542 (އެއް މިލިއަން ތިންލައްކަ އަށްޑިހަ ނުވަ ހާސް ފަސްސަތޭކަ ސާޅީސް ދެ) ފަތުރުވެރިން ޒިޔާރަތް ކޮށްފައެވެ. މިއީ އަށް ޕަސެންޓްގެ ކުރިއެރުމެކެވެ.

ޓޫރިޒަމް މިނިސްޓްރީ އިން ބުނީ ނިމިދިޔަ އަހަރުގެ ޑިސެމްބަރު މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު 2016 ވަނަ އަހަރާ އަޅާބަލާއިރު 19.7 ޕަސެންޓަށް އިތުރުވެފައިވާ ކަމަށެވެ. އަދި އެއީ ރާއްޖޭގެ ފަތުރުވެރިކަމުގެ ތާރީޚުގައި އެއްމަހެއްގެ ތެރޭގައި އެންމެ ގިނައިން ފަތުރުވެރިން ޒިޔާރަތް ކޮށްފައިވާ ކަމަށް ރެކޯޑް ކުރެވިފައިވާ އަދަދު ކަމަށް ވެސް އެ މިނިސްޓްރީން ބުންޏެވެ.

ޑިސެމްބަރު މަހު ރާއްޖެ ޒިޔާރަތްކޮށްފައި ވަނީ ޖުމްލަ 143،041 މީހުންނެވެ.

މިދިޔަ އަހަރު ރާއްޖެއަށް ޒިޔާރަތްކުރި ފަތުރުވެރިންގެ ތަފާސް ހިސާބުތަކަށް ބަލާއިރު، އެންމެ ގިނަ ފަތުރުވެރިން ޒިޔާރަތްކޮށްފައި ވަނީ ޔޫރަޕްގެ ގައުމުތަކުންނެވެ. އެއީ 646،343 (ހަ ލައްކަ ސާޅީސް ހަ ހާސް ތިން ސަތޭކަ ސާޅީސް ތިން) ފަތުރުވެރިންނެވެ. ދެވަނައަށް އެންމެ ގިނަ އިން ރާއްޖެ ޒިޔާރަތްކޮށްފައި ވަނީ 617،123 (ހަ ލައްކަ ސަތާރަހާސް އެއް ސަތޭކަ ތޭވީސް) މީހުންނާ އެކު އޭޝިއާ ޕެސިފިކް ސަރަހައްދުގެ ގައުމުތަކުންނެވެ. އަދި ތިންވަނައަށް އެންމެ ގިނައިން ޒިޔާރަތް ކޮށްފައި ވަނީ މެދުއިރުމަތީގެ ގައުމުތަކުންނެވެ. އެއީ 49،193 ފަތުރުވެރިންނެވެ.

މިދިޔަ މަހު އެންމެ ގިނަ ޓޫރިސްޓުން ރާއްޖެ އައިސްފައިވާ ގައުމަކީ ޗައިނާއެވެ. އެ ގައުމުން އެކަނި ވެސް 19،918 ޓޫރިސްޓުން އައިސްފައި ވެއެވެ.

ޔޫރަޕްގެ ގައުމުތަކުގެ ތެރެއިން މިދިޔަ މަހު އެންމެ ގިނަ ޓޫރިސްޓުން އައިސްފައި ވަނީ އިޓަލީންނެވެ. އެ ގައުމުން 14،756 ޓޫރިސްޓުން އައިސްފައިވެއެވެ.