އެސްޓީއޯގެ ހުޅުމާލެ ހޮޓެލް ގަންނާނެ ފަރާތެއް ހޯދަނީ
ފަސް ތަރީގެ ހޮޓެލެއް ތަރައްޤީކުރުމުގެ މަސައްކަތް ފެށީ 2011 ވަނަ އަހަރުގައި
އެސްޓީއޯއިން ހުޅުމާލޭގައި ތަރައްޤީކުރަމުން އަންނަ ހޮޓެލް
އެސްޓީއޯއިން ހުޅުމާލޭގައި އިމާރަތްކުރަމުން އަންނަ ހޮޓެލް ގަންނާނެއް ފަރާތެއް ހޯދުމަށް އެ ކުންފުނިން އިއުލާންކޮށްފި އެވެ.
އެސްޓީއޯއިން ހުޅުމާލޭގައި ފަސް ތަރީގެ ހޮޓެލެއް ތަރައްޤީކުރުމުގެ މަސައްކަތް ފެށީ 2011 ވަނަ އަހަރުގަ އެވެ. އެއީ 250 ކޮޓަރީގެ ހޮޓެލެކެވެ.
އެސްޓީއޯއިން ކުރި އިއުލާނެއްގައި ވަނީ އެ ހޮޓެލް ގަންނާނެ ފަރާތެއް ނުވަތަ އިންވެސްޓްކުރުމަށް ޝައުޤުވެރިވަ ފަރާތްތަކުން އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުސަތު ހުޅުވާލާކަމަށެވެ. އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުހު ފުރުސަތަކީ އަންނަ މަހުގެ 15 ވަނަ ދުވަހުގެ ނިޔަލަށެވެ.
އެސްޓީއޯއިން ބުނީ ހޮޓެލުގެ މަސައްކަތުގެ ބޮޑުބައި ނޮވެމްބަރު މަހުގައި ނިންމާލާފައިވާކަމަށެވެ. އަދި މިހާރު ކުރިއަށްގެންދަނީ އިންޓިއާރާ މަސައްކަތްތަކާއި ފަރުނީޗަރު ހަރުކުރުމުގެ މަސައްކަތްތައްކަމަށް އެ ކުންފުނިން ބުންޏެވެ.
"ރެޑިސަން ބްލޫ ހޮޓެލް" ގެ ނަމުގައި ތަރައްގީކުރަން ފެށި ލަގްޒަރީ ހޮޓެލް ވިއްކާލުމުގެ މަސައްކަތް އެ ކުންފުނިން 2016 ވަނަ އަހަރުވެސް ކޮށްފައިވެއެވެ. އަދި އެ ހޮޓެލް ތަރައްޤީކުރުމަށް އެސްޓީއޯއިން ތައިލެންޑްގެ އެގްޒިމް ބޭންކުން 32 މިލިއަން ޑޮލަރުގެ ލޯނެއްވެސް ނެގި އެވެ.
