ސޯމާލިއާގައި ތިބި އެމެރިކާގެ ސިފައިންގެ ތެރެއިން ގިނަ އަދަދެއްގެ ސިފައިން އެގައުމުން ފޭބުމަށް އެމެރިކާގެ ރައީސް ޑޮނާލްޑް ޓްރަމްޕް އަންގަވައިފިއެވެ.
އެމެރިކާގެ ޕެންޓަގަން އިން މައުލޫމާތުދޭ ގޮތުގައި އެގައުމުގެ ރައީސް ޓްރަމްޕްގެ އެންގުމަށް ސޯމާލިއާގައި ތިބި އެގައުމުގެ ގިނަ އަދަދެއްގެ ސިފައިން އަނބުރާ ގައުމަށް ގެނައުމަށް ވަނީ ނިންމާފައެވެ.
މިކަމާ ގުޅޭގޮތުން މާބޮޑު ތަފްސީލެއް ޕެންޓަގަންއިން ހިއްސާކޮށްފައި ނެތް ނަމަވެސް 2021 ވަނަ އަހަރުގެ ކުރީ ކޮޅު ސޯމާލިއާގައި ތިބި އެމެރިކާ ސިފައިންގެ ތެރެއިން ގިނަ އަދަދެއްގެ ސިފައި އަނބުރާ ގައުމަށް ގެންނާނެ ކަމަށް ވަނީ ބުނެފައެވެ. މިވަގުތު 700 އެއްހާ އެމެރިކާ ސިފައިން ދާނީ ސޯމާލިއާގައި އެކި މަސައްކަތްތައް ކުރުމުގައި ހަރަކާތްތެރިވަމުންނެވެ.
ސޯމާލިއާގައިި ތިބި އެމެރިކާ ސިފައިންގެ ތެރެއިން ގިނަ އަދަދެއްގެ ސިފައި އެގައުމުން ބޭލުމަށް ނިންމާފައިވާއިރު، ދާދިފަހުން ޓްރަމްޕް ވަނީ އަފްގާނިސްތާން އަދި އިރާގުގައި ތިބި އެމެރިކާ ސިފައިން އެގައުމުތަކުން ބޭލުމަށްވެސް ނިންމާފައެވެ.
