ރާއްޖެއަށް އެއަރ އަސްތާނާގެ ދަތުރުތައް ފަށައިފި
5 ޑިސެމްބަރު 2020 | ހޮނިހިރު 06:55އެއަރ އަސްތާނާގެ ދަތުރުތައް ފަށާފައި ވަނީ ހުކުރު ދުވަހު
އެއަރ އަސްތާނާގެ ފްލައިން
ކަޒަކިސްތާންގެ ގައުމީ އެއަރލައިން، އެއަރ އަސްތާނާއިން ރާއްޖެއަށް ދަތުރުތައް ފަށައިފިއެވެ.
ހުކުރު ދުވަހު އެއަރ އަސްތާނާގެ ދަތުރުތައް ރާއްޖެއަށް ފަށާފައިވާއިރު، ފުރަތަމަ ދަތުރުގައި 146 ފަތުރުވެރިން ވަނީ ރާއްޖެ އައިސްފައެވެ.
ހަފްތާއަކު ތިން ދުވަހު ރާއްޖެއަށް އަސްތާނާގެ ދަތުރުތައް ރާވާފައިވާއިރު، ދަތުރުތައް ކުރަން ހަމަޖެހިފައިވާ ދުވަސްތަކަކީ ކޮންމެ ހަފްތާއެއްގެވެސް ހޯމަ، ބުދަ އަދި ހޮނިހިރު ދުވަހެވެ.
އަސްތާނާއިން ރާއްޖެއާށް ކުރާ ދަތުރުތަކަށް އޮތް ޑިމާންޑް ރަނގަޅުކަމަށް އެއެއަރލައިނުން މީގެ ކުރިން ބުނެފައިވާއިރު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވަނީ ފިނި މޫސުމާ ދިމާކޮށް އަސްތާނާގެ ދަތުރުތައް ރާއްޖެއަށް ފެށި ނަމަވެސް ކުރިއަށް އޮތްތާގައި އެއެއަރލައިންގެ ޝެޑިއުލްޑް ދަތުރުތައް ރާއްޖެއަށް ކުރާނެ ކަމަށް އެކުންފުނިން އުންމީދުކުރާ ކަމަށް ފާހަގަކޮށްފައެވެ.
ކުރިން ރާއްޖެއަށް ދަތުރުތައް ނުކުރާ އެއަރލައިންތަކުން ރާއްޖެއަށް ދަތުރުތައް ފެށުމަކީ ބޮޑު ކާމިޔާބީއެއްގެ ގޮތުގައި އެމްއޭސީއެލް އިން ފާހަގަކުރާއިރު، މިއީ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ކުރާ ބުރަ މަސައްކަތުގެ ނަތީޖާކަމަށް އެމްއޭސީއެލް އިން ގަބޫލުކުރެއެވެ.
ކޮވިޑް-19 ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިފަހުން ރާއްޖެއަށް ދަތުރުކުރާ އެއަރލައިންތަކުގެ އަދަދު ދަނީ އިތުރުވަމުންނެވެ. އެގޮތުން ދުނިޔޭގެ ބޮޑު، ގިނަ އެއަރލައިންތަކުން ރާއްޖެއަށް ދަތުރުތައް ފަށާފައިވާއިރު، ގިނަ އެއަރލައިންތަކަކުން ވަނީ ދަތުރުތަކަށް އޮންނަ ޑިމާންޑް އިތުރުވުމުގެ ސަބަބުން އެއެއަރލައިންތަކުން ރާއްޖެއަށް ކުރާ ދަތުރުތައް އިތުރުކޮށްފައެވެ.
