ބޯޑަރު ހުޅުވާލިފަހުން އައި ފަތުރުވެރިންގެ އަދަދު 80،000 އަށް ވުރެ މައްޗަށް

ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިފަހުން ރާއްޖެ އައި ފަތުރުވެރިންގެ އަދަދު 80،000 އަށް ވުރެ މައްޗަށް އަރައިފިއެވެ.

ޓޫރިޒަމް މިނިސްޓްރީ އިން އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން ޑިސެމްބަރ 4 ވަނަ ދުވަހުގެ ނިޔަލަށް ރާއްޖެއައި ފަތުރުވެރިންގެ އަދަދު ވަނީ 82,902 އަށް އަރާފައެވެ. އެގޮތުން އެންމެ ގިނަ އަދަދެއްގެ ފަތުރުވެރިން ރަޝިއާއިން އައިސްފައިވާއިރު، ޑިސެމްބަރ 2 ވަނަ ދުވަހުގެ ނިޔަލަށް ރަޝިއާއިން 17,404 ފަތުރުވެރިން ވަނީ ރާއްޖެ އައިސްފައެވެ. ދެވެނަ އަށް އެންމެ ގިނަ އަދަދެއްގެ ފަތުރުވެރިން އައިސްފައިވާ އިންޑިއާއިން އައިސްފައި ވަނީ 10,318 ފަތުރުވެރިންނެވެ.

މީގެ އިތުރުން އެންމެ ގިނަ އަދަދަކަށް ރާއްޖެއަށް ފަތުރުވެރިން އައި ގައުމުތަކުގެ ތެރޭގައި ހިމެނޭ ގައުމުތަކަކީ އިނގިރޭސިވިލާތް، އެމެރިކާ، ޔޫއޭއީގެ އިތުރުން ޖަރމަނީ، ޔޫކްރެއިން، ފްރާންސް، ސްޕެއިން އަދި ބްރެޒިލްއެވެ.

ރާއްޖޭގެ ބޯޑަރުހުޅުވާލިފަހުން އެއްދުވަހުން އަނެއް ދުވަހަށް ރާއްޖެ އަންނަ ފަތުރުވެރިންގެ އަދަދު އިތުރުވަމުން ދާ އިރު، މިހާތަނަށް އެންމެ ގިނަ އަދަދެއްގެ ފަތުރުވެރިން ރާއްޖެ އައިސްފައި ވަނީ ނޮވެމްބަރ މަހުއެވެ. ނޮވެމްބަރ މަހު އެކަނިވެސް 35,759 ފަތުރުވެރިން ވަނީ ރާއްޖެ އައިސްފައެވެ.

ޖުލައި މަހު ބޯޑަރު ހުޅުވާލިފަހުން 1,701 ފަތުރުވެރިން ރާއްޖެ އައިރު، ޖެހިގެން އައި އޮގަސްޓް މަހު 7,628 ފަތުރުވެރިން ވަނީ ރާއްޖެ އައިސްފައެވެ. އަދި ސެޕްޓެމްބަރ މަހު 9,538 ފަތުރުވެރިން ރާއްޖެ އައިސްފައިވާއިރު، އޮކްޓޫބަރ މަހު ރާއްޖެ އައި ފަތުރުވެރިންގެ އަދަދު ވަނީ 21,515 ފަތުރުވެރިންނަށް އިތުރުވެފައެވެ.

ޑިސެމްބަރ މަހުގެ ފުރަތަމަ ހަތަރު ދުވަހު އެކަނިވެސް ރާއްޖެއަށް 6,761 ފަތުރުވެރިން ވަނީ އައިސްފައެވެ.

ކޮވިޑް-19 ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ބޮޑެތި ގޮންޖެހުންތަކަކާއި ކުރިމަތިލާން ޖެހުނު ނަމަވެސް ޖެނުއަރީ މަހުން ފެށިގެން އަހަރުގެ މިހާތަނަށް 465,749 ފަތުރުވެރިން ވަނީ ރާއްޖެ އައިސްފައެވެ. އަދި މިއަހަރު ނިމެންވާއިރަށް 500،000 ފަތުރުވެރިންގެ ޓާގެޓަށް ވާސިލްވާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމްވެސް ވަނީ ވިދާޅުވެފައެވެ.