ކަރަންޓު ކެނޑިގެނެއް ގަމުގައި ކުރިއަށް ގެންދާ އެއްވެސް މަޝްރޫއުއަކަށް ބުރުލެއް ނާރާނެ - ސައީދު
އަހަރެއްގެ މައްޗަށް 4.5 މިލިއަން ރުފިޔާ ގްރިޑް ލޮސް ގެ ގޮތުގައިވޭ
މެނޭޖިން ޑިރެކްޓަރ އަހްމަދު ސައީދު މުހައްމަދު
ކަރަންޓުގެ މައްސަލައާއި ގުޅިގެން ލ. ގަމުގެ ތަރައްގީއަށް ކުރިޔަށް ގެންދާ އެއްވެސް މަޝްރޫއަކަށް ބުުރުލެއް ނާރާނެ ކަމުގެ ޔަގީންކަން ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހްމަދު ސައީދު މުހައްމަދު ވިދާޅުވެއްޖެ އެވެ.
ސައީދު މިހެން ވިދާޅުވީ ލ. ގަމުގެ ތިން އަވަށުގެ އިންޖީނުގެތައް ބޭނުންކޮށްގެން ފޯރުކޮށްދެމުންދިޔަ ކަރަންޓުގެ ހިދުމަތް ރަނގަޅުކޮށް ކަރަންޓު ވިޔުގަ މީޑިއަމް ވޯލްޓޭޖް އެއް ވިޔުގައަކުން ގުޅާލާ މަރުކަޒީ އިންޖީނުގެ އަކުން ކަރަންޓު ދިނުމަށް ސަރުކާރުން ވެފައިވާ ވައުދު ފުއްދައި، މަރުކަޒީ އިންޖީނުގެ އިފްތިތާހު ކޮށްދެއްވުމަށް ބުރާސްފަތި ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
ސައީދު ވިދާޅުވީ މިހާރު ނެޓްވޯކް އަދި އިންޖީނުގޭގައި ވަރު ހުންނާނެ ކަމަށެވެ. ކަރަންޓާއި ގުޅިގެން ގަމުގެ ތަރައްގީއަށް އެއްވެސް ހުރަހެއް ނެތް ކަމަށާއި މަޑުޖައްސާލަން ޖެހޭ އެއްވެސް ޕްރޮޖެކްޓެއް ވެސް ނެތްކަމަށް ސައީދު ވިދާޅުވިއެވެ.
ގަމުގައި މީގެކުރިން ކަރަންޓު ފޯރުކޮށްދީފައިވަނީ ތިން އަވަށުގައި ވަކިން އިންޖީނުގެތައް ބަހައްޓައިގެންނެވެ. ބުރާސްފަތި ދުވަހު ބޭއްވި ރަސްމިއްޔާތުގައި ފެނަކަ އެމްޑީ އަހުމަދު ސައީދު ފާހަގަކުރެއްވި ގޮތުގައި، މި އަވަށު އިންޖީނުގެތަކުން ކަރަންޓު ފޯރުކޮށްދީފައިވަނީ 30 ނުވަތަ 40 އަހަރުވެފައިވާ ޖެނަރޭޓާރުތަކުންނެވެ.
މީގެ ސަބަބުން މާލީގޮތުން އެތައް ގެއްލުމެއް ފެނަކައަށް ލިބޭއިރު، ރައްޔިތުންނަށްވެސް ފޯރުކޮށްދެވޭ ހިދުމަތުގެ ފެންވަރުވެސް ދަށެވެ.
އެގޮތުން އަހަރެއްގެ މައްޗަށް 4.5 މިލިއަން ރުފިޔާ ގްރިޑް ލޮސްގެ ގޮތުގައިވާ ކަމަށާއި މި އައު އިންޖީނުގޭގެ ސަބަބުން އަހަރެއްގެ މައްޗަށް 9 މިލިއަން ރުފިޔާ ސަލާމަތް ކުރެވޭނެ ކަމަށް ފެނަކައިން ބުނެއެވެ. އަަދި މި ޕްރޮޖެކްޓް އާއެކު ކުރިއަށް އޮތް 7 އަހަރު ތެރޭގައި 38 މިލިއަން ރުފިޔާ ސަލާމަތް ކުރެވޭނެ ކަމަށާއި މި ޕްރޮޖެކްޓްގެ ސަބަބުން ކުރިއަށް އޮތް ހަތް އަހަރު ތެރޭގައި 79.8 މިލއަން ރުފިޔާ ފައިދާގެ ގޮތުގައި ލިބިގެން ދާނެ ކަމަށް ފެނަކައިން ބުނެއެވެ.
މީގެ އިތުރުން ފެނަކައިން ބުނީ ގަމުގައި ހުރި ބާ އިންޖީނު ގެތަކުގެ ސަބަބުން އަހަރަކު 586043 (ފަސް ލައްކަ އަށްޑިހަ ހަހާސް ސާޅީސް ތިން) ޓަނުގެ ނުސާފުވައި ޖައްވައް ދޫކުރާ ކަމަށެވެ. އަދި ގަމުގެ އައު އިންޖީނުގޭގެ ސަބަބުން މި އަދަދު 207338 (ދެ ލައްކަ ހަތް ހާސް ތިން ސަތޭކަ ތިރީސް އަށް) ޓަނަށް ދަށް ކުރެވޭނެ ކަމަށް ފެނަކައިން ބުންޏެވެ.
ގަމުގެ ކަރަންޓު އެއް ވިއުގައަކުން ގުޅާލައި، މަރުކަޒީ އިންޖީނުގެ އިފްތިތާހު ކޮށްފައިވާއިރު، މިއީ ގަމުގެ ރައްޔިތުންނަށް މުހިންމު މަޝްރޫއުއެކެވެ. އަދި މިއީ ރައީސް އިބްރާހީމް މުހައްމަދު ސޯލިހު ގަމުގެ ރަތްޔިތުންނަށް ވެލެއްވި ރިޔާސީ ވައުދުފުޅެކެވެ.
