ރައީސް ސޯލިހަކީ ޖަޒީރާ ސިއްހީ ނިޒާމުގެ ބާނީ: ވިސާމް
4 ޑިސެމްބަރު 2020 | ހުކުރު 04:48ރައީސް ސޯލިހު ކުރައްވާ މަސައްކަތްޕުޅަކީ މިރާއްޖޭގެ ތާރީޚުގައި އެއްވެސް ވެރިއަކަށް ނުކުރެވޭ ވަރުގެ މަސައްކަތްތަކެއް
ގަމުގައި ކުރިއަށްގެންދިޔަ ތަރައްޤީގެ ތިން މަޝްރޫޢެއްގެ ނިމުން ފާހަގަކުރުމުގެ ގޮތުން ބޭއްވި ރަސްމިއްޔާތުގައި ވިސާމް ވާހަކަ ދައްކަވަނީ
ސިއްހީ ފަރުވާ ހޯދުމަށް މާލެއަށް ބަރޯސާވެފައިއޮތް އޮތުން ނިމުމަކަށް ގެނެސް، އަތޮޅުތެރޭގެ ސިއްހީ ނިޒާމް ހަރުދަނާ ކުރުމަށް ރައީސް ސޯލިހު ކުރައްވަމުން ގެންދަވާ މަސައްކަތަކާއެކު އެމަނިކުފާނަކީ ޖަޒިރާ ސިއްހީ ނިޒާމުގެ ބާނީ ކަމުގައި ގަމު ދާއިރާގެ މެންބަރު މުހައްމަދު ވިސާމް ވިދާޅުވެއްޖެއެވެ.
ރައީސް އިބްރާހިމް މުހައްމަދު ސޯލިހު ހައްދުންމަތީގެ ދެ ރަށަކަށް ކުރެއްވި ދަތުރުފުޅުގެ ތެރެއިން ގަމަށް ވަޑައިގަންނަވާ، އެ ރަށުގައި ކުރިއަށްގެންދިޔަ ތަރައްޤީގެ ތިން މަޝްރޫޢެއްގެ ނިމުން ފާހަގަކުރުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަވަމުން ވިސާމް ވިދާޅުވީ ސިއްހީ ނިޒާމް ލާމަރުކަޒީ ކުރުމަށް ރައީސް ސޯލިހު ކުރައްވާ މަސައްކަތްޕުޅަކީ މި ރާއްޖޭގެ ތާރީޚުގައި އެއްވެސް ވެރިއަކަށް ނުކުރެވޭ ވަރުގެ މަސައްކަތްތަކެއް ކަމަށެވެ. އަދި ރައީސް ސޯލިހު އަތޮޅުތެރޭގެ ސިއްހީ ނިޒާމަށް އިންގިލާބީ ބޮޑު ބަދަލެއް ގެނެސްފައިވާކަމަށް ވިދާޅުވިއެވެ،
މީގެ އިތުރުން ޓާޝަރީ ފެންވަރުގެ 5 ހޮސްޕިޓަލުގެ ވައުދާއެކު މިރާއްޖެއަށް އަންނަމުންދާ ހެޔޮ ބަދަލާއެކު، އެމަނިކުފާނަކީ ޖަޒީރާ ސިއްހީ ނިޒާމުގެ ބާނީ ކަމަށް ވިސާމް ވިދާޅުވިއެވެ.
ވިސާމް ވިދާޅުވީ ދިވެހިރާއްޖޭގައި އޮތް އެންމެ ބިންބޮޑު ރަށް ތަރައްގީގެ ސަފުން ބާކީވެފައި އޮތްއޮތުން މި ސަރުކާރުން ނިމުމަމަށް ގެންނާނެކަމާމެދު ޝައްކުކުރާ ރައްޔިތަކު ގަމުގައި ނެތް ކަމަށެވެ. އަދި ދެކުނާއި މެދުރާއްޖެއަށް އަންނަ ތަރައްގީގެ ފޮނުމީރުކަން ހައްދުންމަތީގެ ރައްޔިތުންނަށް ނުލިބޭ ކަމަށާއި، ރާއްޖެ ތަރައްގީ ކުރެވޭނީ ގަން ފަދަ ބިންބޮޑު ރަށްތަކުގެ ބޭނުންގެ ހެޔޮ ގޮތުގައި ހިފައިގެން ކަމަށެވެ.
މީގެ އިތުރުން ރަށު ވާދަވެރިކަމާއި އަތޮޅު ވާދަވެރިކަން ދޫކޮށް ސަރަހައްދީ ތަރައްގީއަށް ޖާގަ ދޭންޖެހޭ ކަމަށް ވިސާމް ވިދާޅުވިއެވެ.
ހައްދުންމަތީ ގަމަކީ ރާއްޖޭގެ އެއްރަށެއްގައި ތިން އިންޖީނުގެ ހިންގި ހަމައެކަނި ރަށްކަން ފާހަގަކުރައްވަ ވިސާމް ވިދާޅުވީ ގަމު ރައްޔިތުންނަށް މި އަސާސީ ހައްގަށް ބަރޯސާވެގެން ދިރިއުޅުންވެފައިއޮތީ ތުރާލަކަށް ކަމަށެވެ. އަދި ރައްޔިތުންނަށް ދޭ ޚިދުމަތެއްގެ ނަމުގައި ދެމުންދިޔައީ ފެންވަރު ދަށް ޚިދުމަތެއް ކަމަށާއި، މިކަމަށް ހައްލެއް ހޯދުމަށް ސަރުކާރުތަކުން ދައްކަމުންދިޔައީ ބަހަނާ ކަމަށެވެ.
ނަމަވެސް ގަމު ރައްޔިތުންނަށް ފެންވަރު ރަނގަޅު ކަރަންޓުގެ ނިޒާމެއް ގާއިމުކޮށްދެއްވާނެ ކަމުގެ ވައުދުވެސް އެންމެ ފުރަތަމަ ވެވަޑައިގެންނެވީ ރައީސް ސޯލިހު ކަމަށެވެ. ވިސާމް ވިދާޅުވީ އިރާދަކުރެއްވިއްޔާ ކަރަންޓް ކެނޑިގެން އޭނާއަށް އަދި ފެނަކަ ކޯޕަރޭޝަންގެ އެމްޑީ ސައީދަށް ގަމު ރައްޔިތުން ގުޅާކަށް ނުޖެހޭނެ ކަމަށެވެ.
